ఆంధ్రప్రదేశ్ ఆర్ధిక పరిస్థితి పై, తెలుగుదేశం అధికార ప్రతినిధి కొమ్మారెడ్డి పట్టాభి రాం, కొన్ని ఆసక్తికర వ్యాఖ్యలు చేసారు. ఆయన మాటల్లోనే " జగన్ మోహన్ రెడ్డి రాష్ట్ర ప్రజలకు నెలకొక షాక్ ఇస్తున్నారు. రాష్ట్ర కాగ్ నివేదికలు చూస్తే జగన్ ఇస్తున్న షాక్ లు అందరికీ అర్థమౌతాయి. నెలనెల CAG విడుదల చేస్తున్న జగన్ అప్పల ప్రోగెస్ కార్డు (కాగ్ నివేదికలు) లు రాష్ట్ర ప్రజలపై గుది బండల్లా పడుతున్నాయి. జగన్ ప్రభుత్వం ఒక్క సెప్టెంబర్ నెలలోనే రూ. 8,038 కోట్లు అప్పు భారాన్ని రాష్ట్రంపై మోపారు. 2020-21 ఆర్ధిక సంవత్సరంలో మొదటి ఆరు నెలల కాలానికి అక్షరాల రూ. 55,189 కోట్లు అప్పు చేశారు. మొదటి ఆరు నెలల లెక్కలే ఇలా ఉంటే ఏడాది పూర్తయ్యే నాటికి అది ఎక్కడికి పోతుందో ఊహించుకోవాలంటేనే భయంగా ఉంది. కాగ్ నివేదికలను పరిశీలించి వీటిని అంచనా వేస్తే ఈ ఒక్క ఆర్ధిక సంవత్సరంలోనే వైకాపా ప్రభుత్వ అప్పులు దాదాపు రూ. 1,11,000 కోట్లకు చేరుకునే అవకాశం ఉంది. 2014-2019 వరకు ఐదేళ్లకు గత తెలుగుదేశం ప్రభుత్వం చేసిన అప్పు రూ. 1,25,000 కోట్లు. అంటే సరాసరి సంవత్సరానికి రూ. 25 వేల కోట్లు మాత్రమే. ఐదు సంవత్సరాలలో తెలుగుదేశం ప్రభుత్వం చేసిన అప్పు జగన్ మోహన్ రెడ్డి ఈ ఒక్క ఆర్ధిక సంవత్సరంలోనే చేస్తున్నారు. వైకాపా ప్రభుత్వం చేస్తున్న అప్పులను కప్పి పుచ్చుకోవడానికి కరోనా భారంతో ఇతర రాష్ట్రాలు కూడా అప్పులు చేస్తున్నాయని చెబుతున్నారు. ఆంధ్రప్రదేశ్ అప్పులు పొరుగు రాష్ట్రాల మొదటి ఆరు నెలల అప్పులతో పోల్చితే ఏపీ రెండున్నర రెట్లు కు పైగానే అప్పులు చేసింది."
"తెలంగాణ ప్రభుత్వం రూ. 26,060, కోట్లు, తమిళనాడు రూ. 31,512 కోట్లు, కర్ణాటక రూ. 16,078 కోట్లు, కేరళ రూ. 28,773 కోట్లు అప్పులు చేయగా ఆంధ్రప్రదేశ్ రూ.55,169 కోట్లు అప్పులు చేసి కరోనా కారణం చెప్పడం హాస్యాస్పదం. పొరుగు రాష్ట్రాలలో కూడా కరోనా ప్రభావం తీవ్రంగా ఉన్నప్పటికీ ఏపీ చేసినంతగా వాళ్లు అప్పులు చేయలేదు. తమిళనాడు, తెలంగాణ రెండు రాష్ట్రాలు చేసినంత అప్పు ఒక్క ఆంధ్రప్రదేశ్ చేయటం గమనార్హం. 13 జిల్లాల ఆంధ్రప్రదేశ్ కు రెండు రాష్ట్రాల కు సమానమైన అప్పు చేయడంపై జగన్ మోహన్ రెడ్డి ఏం సమాధానం చెబుతారు ఈ ఆర్థిక సంవత్సరం మొదటి ఆరు నెలల కాలానికి ఏపీ రెవెన్యూ డెఫిసిట్ రూ. 45, 472 కోట్లు. రాష్ట్ర విభజన సమయంలో రాష్ట్ర ఆర్ధిక లోటు రూ. 16 వేల కోట్లు ఉంది. చంద్రబాబు నాయుడు ముఖ్యమంత్రిగా బాధ్యతలు స్వీకరించి అత్యంత సమర్థవంతంగా పరిపాలన చేసి 2019 నాటికి రూ. 2 వేల కోట్ల ఆర్థిక లోటును తగ్గించి షుమారుగా దానిని రూ. 14 వేల కోట్లకు తగ్గించడం జరిగింది. కానీ, జగన్ చేతగాని తనంతో రాష్ట్ర ఆర్థిక లోటు ఈ ఆర్థిక సంవత్సరంలోనే దాదాపు మూడు రెట్లు పెంచి రూ.16 వేల కోట్లను రూ.45,472 కోట్లు పెంచేశారు. ఇది జగన్ అసమర్ధత కాదా?? చేతగానితనం కాదా? అభివృద్ధి కార్యక్రమాలపై ఖర్చు చేయకుండా తెస్తున్న అప్పులు కూడా దోచుకు తినడానికే అన్నట్లు ఉన్నాయి. జగన్ అధికారం చేపట్టిన నాటి నుండి ఒక్క ప్రాజెక్టు పూర్తి చేయలేదు. భారీ వర్షాలతో పంటలు నష్టపోయిన రైతులకు ఒక్క రూపాయి సహాయం చేయలేదు. వేల కోట్ల రూపాయల అప్పుచేసి మరీ తెచ్చిన సొమ్మంతా జగన్ మోహన్ రెడ్డి అవినీతికే ఆవిరైపోతోంది." అని పట్టాభి అన్నారు