వైసీపీ పాలనలో అరాచకాలు, అవినీతిలో ఫస్ట్ ప్లేస్ వస్తున్న ఆంధ్రప్రదేశ్ .. అభివృద్ధి, ఆదాయం,ఎగుమతులలో లాస్ట్ ప్లేస్ సాధిస్తోంది. సాఫ్ట్ వేర్ ఎగుమతుల్లో ఏపీ తీరు అధ్వానం ఉందని కేంద్రం వెల్లడించింది. సాఫ్ట్ వేర్ ఎగుమతుల్లో మొదటి స్థానంలో కర్నాటక, మూడో స్థానంలో తెలంగాణ ఉంటే చిట్టచివరి స్థానంలో ఆంధ్రప్రదేశ్ నిలిచింది. విదేశాలకు భారతదేశం నుంచి సాఫ్ట్ వేర్ ఎగుమతుల్లో ఏపీ వాటా కేవలం 0.1 శాతం మాత్రమేనని రాజ్యసభలో కేంద్ర ప్రభుత్వం గణాంకాలు వెల్లడించింది. రాజ్యసభలో సభ్యులు అడిగిన ప్రశ్నలకు కేంద్రమంత్రి రాజీవ్ చంద్రశేఖర్ డేటాతో సమాధానం ఇచ్చారు. దీని ప్రకారం 2021-22లో భారత్ నుంచి సాఫ్ట్ వేర్ ఎగుమతులు విలువ రూ.11.89 లక్షల కోట్లు అని వెల్లడించారు. సాఫ్ట్ వేర్ టెక్నాలజీ పార్క్స్ ఆఫ్ ఇండియా కింద నమోదైన యూనిట్లు రూ.6.29 లక్షల కోట్లు, సెజ్ కింద నమోదైన యూనిట్లు రూ.5.3 లక్షల కోట్లు ఈ సాఫ్ట్ వేర్ ఎగుమతుల్లో వున్నాయని పేర్కొన్నారు. అత్యధిక సాఫ్ట్ వేర్ ఎగుమతులు కలిగిన రాష్ట్రాలలో దక్షిణాది నుంచి కర్ణాటక, తెలంగాణ మొదటి మూడుస్థానాల్లో ఉన్నాయి. కర్ణాటక 3.96 లక్షల కోట్లు, మహారాష్ట్ర రూ.2.37 లక్షల కోట్లు, తెలంగాణ రూ.1.81 లక్షల కోట్లు సాఫ్ట్ వేర్ ఎగుమతులు సాధించాయి. ఆంధ్రప్రదేశ్ నుంచి ఎగుమతులు కేవలం రూ.1,256 కోట్లు మాత్రమేనని, ఇది మొత్తం దేశం సాఫ్ట్ వేర్ ఎగుమతులలో కేవలం 0.1 శాతం మాత్రమేనని కేంద్ర మంత్రి ప్రకటించాారు.