జగన్మోహన్ రెడ్డి తెలుగుదేశం పార్టీకి కులాన్ని అంటగట్టడం హాస్యాస్పదంగా ఉందని, ఆయన ముఖ్యమంత్రి అయినప్పటినుంచీ, భర్తీచేసిన ప్రభుత్వ పదవుల్లో ఎంతమంది తనకులంవారిని నియమించాడో, స్థానికఎన్నికల కోసం ప్రభుత్వం తరపున నియమించిన 5గురు వ్యక్తుల్లో రెడ్లు తప్ప వేరేకులంవారు లేరని, తన ఇష్టానుసారం రెడ్లను ప్రోత్సహి స్తున్న ఆయన, ఇతరులకు కూడా దాన్నే ఆపాదించాలని చూడటం దుర్మార్గమని టీడీపీ సీనియర్ నేత, మాజీ మంత్రి యనమల రామకృష్ణుడు మండిపడ్డారు. మంగళవారం ఆయన మంగళగిరిలోని పార్టీ రాష్ట్ర కార్యాలయంలో విలేకరులతో మాట్లాడారు. గతంలో మండలిలోకూడా ప్రభుత్వం ప్రాధాన్యత ఇచ్చిన రెడ్ల జాబితాను తాను చదివి వినిపించాన న్నారు. రాష్ట్ర ప్రభుత్వం దగ్గరుండి మరీ రౌ-డీ-యి-జం – పోలీస్ వ్యవస్థలను కలిపి ఎన్నికలను భ్రష్టు పట్టించాకనే రాష్ట్రంలో కరోనా వచ్చిందన్నారు. వైరస్ ప్రభావంతో ప్రపంచవ్యాప్తంగా ప్రమాద ఘంటికలు మోగాయని, డబ్యుహెచ్ వో (వరల్డ్ హెల్త్ ఆర్గనైజేష న్) అన్ని దేశాలను హెచ్చరించి, గ్లోబల్ ఎమర్జన్సీ ప్రకటించడం జరిగిందన్నారు. దేశాలతో పాటు రాష్ట్రాలను కూడా హెచ్చరించారన్నారు. ఈనేపథ్యంలో ఎన్నికల కమిషనర్ స్థానిక ఎన్నికలను 6వారాలు వాయిదా వేయడంజరిగిందని,ఎస్ఈసీ (స్టేట్ ఎలక్షన్ కమిషనర్) నిర్ణయాన్ని ప్రశ్నించే అధికారం ముఖ్యమంత్రి జగన్ కు ఎక్కడిదని యనమల నిలదీశారు.
ఆర్టికల్ 243-కే గానీ, ఆర్టికల్ 243-జెడ్ (ఏ) గానీ చదువుకుంటే, రాష్ట్ర ఎన్నికల కమిషన్, కేంద్ర ఎన్నికల కమిషన్ కు ఏమాత్రం తక్కువకాదని అర్థమవుతోందన్నారు. రెండూ సంస్థలు కూడా ఒకేవిధమైన అధికారాలు కలిగి ఉంటాయని, ఎన్నికలవేళ వాటి పనితీరుని, నిర్ణయాధికారాలను తప్పుపట్టే అధికారం ఎవరికీ ఉండబోదన్నారు. అటువంటి వ్యవస్థను అవమానించేలా జగన్మోహన్ రెడ్డి మాట్లాడారని, ఆయన వైఖరి చూస్తుంటే, రాజకీయనాయకుడిగా, ముఖ్యమంత్రిగా ఆయన పనికిరాడని స్పష్టమవుతోందన్నారు. సాక్షాత్తూ ముఖ్యమంత్రే రాజ్యాంగవ్యవస్థలను అవమానపరుస్తుంటే, ఆయా వ్యవస్థలను పరిరక్షించాల్సిన బాధ్యత అటురాష్ట్రపతికి, గవర్నర్ కు ఉంటుందన్నారు. ముఖ్యమంత్రి వ్యాఖ్యలపై తగిన సమాచారం తెప్పించుకొని, వెంటనే ఆయనపై గవర్నర్, రాష్ట్రపతి చర్యలు తీసుకోవాలని యనమల విజ్ఞప్తి చేశారు. ముఖ్యమంత్రి ఏదయితే మాట్లాడారో.. దానికి అనుకూలంగానే సీఎస్ లేఖ రాశారని, ఎన్నికల కోడ్ అమల్లో ఉన్నప్పుడు ముఖ్యమంత్రితోపాటు, ఆమెకు కూడా ఏవిధమైన అధికారాలుండవని తెలిసీకూడా లేఖరాసి, ఎన్నికలకమిషనర్ ని ఒత్తిడిచేయాలని చూడ టం ద్వారా ఆమె కూడా తప్పుచేసిందన్నారు.
కొందరు అధికారులు, పోలీస్ వ్యవస్థ కలిసి ప్రభుత్వానికి సహకరిస్తూ, ప్రతిపక్షాలను అణచివేసే ధోరణితో ముందుకెళుతున్నారని, అటువంటి వారిపై కూడా చర్యలు తీసుకోవాలన్నారు. ఐఏఎస్, ఐపీఎస్ ల రూల్స్ చాలా ప్రత్యేకంగా ఉంటాయని, వాటికి అనుగుణంగా పనిచేయకుండా, వ్యతిరేకంగా పనిచేస్తే వారిపై కూడా చర్యలు తీసుకునే అధికారం భారత ప్రభుత్వానికి ఉంటుందన్నారు. ఆ విథంగా నిబంధనలకు విరుద్ధంగా పనిచేసిన కేంద్ర సర్వీసులకు చెందిన ఉద్యోగుల వివరాలనుకూడా సేకరించి డీవోపీటీకి పంపుతున్నామని యనమల చెప్పారు. ప్రభుత్వానికి పూర్తిగా లొంగిపోయి, చెప్పిందానికల్లా తలాడిస్తూ, ప్రతిపక్షంపై కక్షసాధింపులకు పాల్పడిన ఏ ఒక్క అధికారిని వదిలిపెట్టేదిలేదని ఆయన తేల్చిచెప్పారు. డీవోపీటీకి అటువంటి అధికారుల జాబితాను తెలుగుదేశంపార్టీ తరుపున పంపిస్తామన్నారు. ఎన్నికలు ఇప్పటికిప్పుడు నిర్వహించనంత మాత్రాన 14వ ఆర్థిక సంఘం నిధులేవీ రాష్ట్రానికి రాకుండా పోవని, ముఖ్యమంత్రి యొక్క తప్పుడు ఆలోచన, తప్పుడు విధానాలను ఆయన ప్రజలపై రుద్దాలని చూడటం దురదృష్టకరమన్నారు. కరోనాప్రభావం దృష్ట్యా ఎన్నికలు వాయిదావేస్తే, దాన్ని తప్పుపట్టేలా ముఖ్యమంత్రి, మంత్రులు మాట్లాడటం వారి అజ్ఞానానికి నిదర్శనమన్నారు. కేంద్రప్రభుత్వ నిధులు, కేంద్రానికి – రాష్ట్రాలకు సంబంధించినవి తప్ప, దానితో 14వ ఆర్థిక సంఘానికి ప్రమేయం ఉండదన్నారు.
కిరణ్ కుమార్ రెడ్డి హయాంలో స్థానిక ఎన్నికలను నిర్వహిస్తే, తమప్రభుత్వం వచ్చాక కేంద్రం నుంచి నిధులు వచ్చాయన్నారు. ఎన్నికలు నిర్వహిస్తేనే నిధులిస్తామని కేంద్రం ఎక్కడా చెప్పలేదన్నారు. కేవలం వైసీపీ ప్రభుత్వం ఆ విధంగా అపోహలు సృష్టించి, తెలుగుదేశాన్ని దోషిగా చూపాలని చూస్తోందన్నారు. తెలిసీ తెలియకుండా ప్రవర్తిస్తున్న ముఖ్యమంత్రికూడా పూర్తిగా వాస్తవాలు తెలుసుకొని మాట్లాడితే మంచిదని యనమల హితవుపలికారు. ఎన్నికల్లో గెలుపుకోసం ప్రభుత్వంచేసిన అక్రమాలన్నింటికీ, ఎన్నికల కమిషనర్ వత్తాసుల పలకలేదన్న అక్కసుతోనే జగన్ ప్రభుత్వం, ఈసీ నిర్ణయంపై సుప్రీంకోర్టుకు వెళ్లిందన్నారు. సుప్రీంకోర్టుకూడా ఎన్నికల ప్రక్రియలో జోక్యం చేసుకోదని తాను భావిస్తున్నానని, రాష్ట్ర ఎన్నికల కమిషనర్ ని అవమానించేలా మాట్లాడిన ముఖ్యమంత్రి తీరుని తీవ్రంగా ఖండిస్తున్నామన్నారు. కరోనా అనేది ప్రపంచవ్యాప్తంగా వ్యాప్తి చెందుతున్న ప్రస్తుత తరుణంలో దేశంలో బీహార్, పశ్చిమబంగా, మహారాష్ట్ర, ఒడిశా రాష్ట్రాలు కూడా ఎన్నికలను వాయిదా వేసుకున్నాయన్నారు. తిరిగి ఎన్నికలు నిర్వహిస్తే, నష్టపోతామన్న భావన ముఖ్యమంత్రిలో ఉన్నందునే, ఆయన సుప్రీం కోర్టుకు వెళ్లాడన్నారు.