త్వరలో జరగ నున్న రాజ్యసభ ఎన్నికల బరిలోకి తెదేపా దిగాలని నిర్ణయించుకుంది. చంద్రబాబు వ్యూహాత్మకంగా కొత్త ఎత్తు గడను తెరపైకి తీసుకు వచ్చారు. రాష్ట్రం నుంచి నాలుగు రాజ్యసభ స్థానాల కోసం ఎన్నికలు జరగనున్న నేపథ్యంలో సంఖ్యా బలం అధికంగా ఉన్న వైకాపా ఆ స్థానాల న్నింటిని కైవసం చేసుకునే పరిస్థితి ఉంది. అయితే టీడీపీ అధినేత చంద్రబాబు సంఖ్యా బలం లేనప్పటికీ పార్టీ తరుపున అభ్యర్థిని బరిలోకి దింపి ఎన్నిక ఏకగ్రీవం కాకుండా చూడాలన్న లక్ష్యంతో పావులు కదుపుతున్నారు. ఈ నేపథ్యంలోనే మంగళవారం మీడియా సమావేశం నిర్వహించి మరీ రాజ్యసభ బరిలోకి దిగుతు న్నామని తమ పార్టీ తరుపున పొలిట్ బ్యూరో సభ్యుడు వర్ల రామయ్యను అభ్యర్థిగా నిలబెడుతున్నట్లు ప్రకటించారు. ప్రస్తుతం శాసనసభలో తెదేపాకు కేవలం 23 మంది సభ్యులు ఉండగా అధికార పక్షమైన వైకాపా 151 మంది సభ్యులు ఉన్నారు. అయితే ఇటీవల గుంటూరు, గన్నవరం ఎమ్మెల్యే లు మద్దాలి గిరిధర్, వల్లభనేని వంశీలు తెదేపాకు గుడ్ బై చెప్పి అధికారపక్షంతో కలిసి నడుస్తున్నారు.
ఈ రాజ్యసభ ఎన్నికలను ఆసరాగా చేసుకొని చేజారిన ఇద్దరు ఎమ్మెల్యేలను తిరిగి తమ గుప్పిట్లోకి తెచ్చుకునేందుకు తెదేపా ప్రయత్ని స్తుందని రాజకీయ విశ్లేషకులు పేర్కొంటున్నారు. రాజ్యసభ ఎన్నికల సమయంలో ఎమ్మెల్యేలు పోలింగ్ జరిగేందుకు బ్యాలెట్ ను చూపి మరి ఓటు వేసే పరిస్థితి ఉండడంతో దీనిని కీలకంగా చేసుకొని చంద్రబాబు ఈ నిర్ణయానికి వచ్చారని చెబుతు న్నారు. పార్టీ ఎమ్మెల్యేలకు విప్ జారీ చేసి మరు క్షణం ఆ ఆదేశాలను ఉల్లంఘిస్తే అనర్హత వేటు పడుతుంది. దీంతో ఇరువురు రెబల్ ఎమ్మెల్యేలు ఓటు హక్కు వినియోగించుకోకుండా ఉండడం లేదా తెదేపాకు వేయాల్సిన పరిస్థితి ఉందని లేని పక్షంలో వారిపై వేటు పడుతుందని రాజకీయ విశ్లేషకులు స్పష్టం చేస్తున్నారు.
ఇదే విషయాన్ని చంద్రబాబు మీడియా సమావేశంలో స్పష్టంగా చెప్పడం జరిగింది. పార్టీ విప్ జారీ చేస్తుందని దాని ప్రకారం నడుచుకోకపోతే అనర్హత తప్పదని హెచ్చరించారు. ఈ ఎన్నికల్లో తాము గెలుస్తామా..? లేదా..? అన్నది కాదని అయితే రాష్ట్రంలో జరుగుతున్న ఆరాచకాలను ప్రజలకు తెలియజెప్పేందుకేనని ఆయన స్పష్టం చేశారు. మరోవైపు ఎస్సీ సామాజిక వర్గానికి చెందిన వర్ల రామయ్య కు రాజ్యసభ అభ్యర్థిత్వం ఇవ్వడం ద్వారా బడుగులకు ప్రాధాన్యత ఇస్తున్నట్లుగా ప్రజలకు స్పష్టమవు తోందని తెదేపా భావిస్తుంది. వన్ షాట్ .. టు బర్డ్స్ అనే విధంగా, ఇటు సామాజిక వర్గ సమీకరణం, మరోవైపు ఎన్నిక ఏకగ్రీవం కాకుండాచూడాలన్నదే టీడీపీ లక్ష్యంగా స్పష్టమవుతోంది. ఇక వంశీ, మద్దాల గిరి ఆడుతున్న డ్రామాలకు కూడా చెక్ పెట్టబోతున్నారు.