ఈ రోజు వచ్చిన మునిసిపల్ ఎన్నికల ఫలితాల్లో, టిడిపికి ఎదురు దెబ్బ తగిలినా, తాడిపత్రిలో మాత్రం, టిడిపి జెండా ఎగురవేసింది. అక్కడ 36 వార్డులకు, 21 వార్డులు టిడిపి మద్దతుదారులు గెలిచారు. తాడిపత్రి 24 వార్డు అభ్యర్ధిగా జేసీ ప్రభాకర్ రెడ్డి స్వయంగా రంగంలోకి దిగి, ఆయన గెలిపించుకున్నారు. ఎన్నికల్లో గెలిచిన తరువాత జేసీ ప్రభాకర్ రెడ్డి మీడియాతో మాట్లాడుతూ సంచలన వ్యాఖ్యలు చేసారు. తెలుగుదేశం పార్టీకి ఉన్నంత మంచి క్యాడర్ ఎక్కడా లేదని, ఎవరికీ లేదని, అయితే నాయకులు మాత్రం సగం మంది బోగస్ గాళ్ళే ఉన్నారు అంటూ, సంచలన వ్యాఖ్యలు చేసారు. చంద్రబాబు గారు ప్రక్షాళన చేయాలని, నాయకులను మార్చితే, కార్యకర్తలు గెలిపించుకుంటారని అన్నారు. నిలబడే నాయకులే కరువు అయ్యారని అన్నారు. ఇక్కడ మాకు ఎస్సీ, ఎస్టీ, మైనారిటీ ఓట్లు వచ్చాయంటే, ఊరికే వచ్చాయా, పార్టీ ఎంత బలంగా ఉందో తెలుస్తుంది కదా అంటూ, జేసీ అన్నారు. ఏ రోజు అయితే పెద్దారెడ్డి తన ఇంటికి వచ్చి, తనను బండ బూతులు తిట్టారో, అప్పుడే ఇక్కడ ప్రజలు తన వెంట వచ్చారని, ఇక్కడ వీళ్ళు చేస్తున్న అరాచకాలకు ఫుల్ స్టాప్ పడాలనే, సేవ్ తాడిపత్రి అనే నినాదం పెట్టమని అన్నారు. తాడిపత్రిని మీరే కాపాడుకోవాలని ప్రజలను కోరామని, ప్రజలు కూడా అర్ధం చేసుకుని, తాడిపత్రిని కాపాడుకున్నారని జేసీ అన్నారు.