మా రాష్ట్రానికి నిధులు ఇవ్వండిరా అంటే, మాత్రం చేద్దాం, చూస్తాం, చేస్తున్నాం, చేస్తూనే ఉంటాం అంటూ, కబ్రులు చెప్తారు... కాని మన రాష్ట్రానికి వస్తున్న కేంద్ర ప్రతినిధులు, మంత్రులు మాత్రం, ఆహా ఓహో మీ అంతటోడు లేడు, మిమ్మల్ని చూసి దేశం మొత్తం నేర్చుకోవాలి అంటారు... మా దమ్ము ఏంటో మాకు తెలుసు సార్, మా దమ్ముకి మీరు హ్యాండ్ హోల్డింగ్ ఇవ్వండి అంటే మాత్రం, అదిగో ఇదిగో అంటూ నాలుగేళ్ళు టైం గడిపేశారు... ఇంత ఆందోళన చేస్తున్నా, పాడిన పాటే పాడుతున్నారు... విషయం ఏంటి అంటే, నీతి ఆయోగ్ స‌భ్యులు డాక్ట‌ర్ ర‌మేష్ చంద్ ఈ రోజు అమరావతిలో పర్యటించారు...
ఆంధ్ర‌ప్ర‌దేశ్ ప్ర‌భుత్వం ఏర్పాటు చేసిన రియ‌ల్ టైమ్ గ‌వ‌ర్నెన్స్ వ్య‌వ‌స్థ అద్భుతంగా ప‌నిచేస్తోంద‌ని నీతి ఆయోగ్ స‌భ్యులు డాక్ట‌ర్ ర‌మేష్ చంద్ కితాబిచ్చారు. వెల‌గ‌పూడి స‌చివాల‌యంలోని రియ‌ల్ టైమ్ గ‌వ‌ర్నెన్స్ స్టేట్ క‌మాండ్ కంట్రోల్ కేంద్రాన్ని ఈ రోజు ఆయ‌న సంద‌ర్శించారు. ఈ సంద‌ర్భంగా ఆర్టీజీఎస్ చీఫ్ ఎగ్జిక్యూటివ్ ఆఫీస‌ర్ అహ్మ‌ద్ బాబు ఆర్టీజీఎస్ ప‌నితీరును వివ‌రించారు. ప‌రిష్కార వేదిక 1100 కాల్ సెంట‌ర్ ప్ర‌జ‌ల నుంచి ఫిర్యాదులు స్వీక‌రించి వాటిని ఎలా ప‌రిష్క‌రిస్తుందో వివ‌రించారు. తొమ్మిది నెల‌ల కాలంలో ప‌రిష్కార‌వేదిక ద్వారా 1,48,50,297 ఫిర్యాదులు స్వీక‌రించామ‌ని అందులో 93 శాతం ఫిర్యాదులు ప‌రిష్క‌రించామ‌ని తెలిపారు.
ఈ-ఆఫీసు ప‌నితీరు, కోర్ డ్యాష్‌బోర్డు గురించి తెలియ‌జేశారు. రాష్ట్ర వ్యాప్తంగా ఏర్పాటు చేసిన స‌ర్వైలెన్స్ కెమెరాల ద్వారా ఎలా ప‌ర్య‌వేక్షిస్తున్న‌ది కూడా సీఈఓ బాబు వివ‌రించారు. నీతి ఆయోగ్ స‌భ్యులు ర‌మేష్ చంద్ మాట్లాడుతూ.. ఆర్టీజీఎస్ వ్య‌వ‌స్థ అద్భుతంగా ప‌నిచేస్తోంద‌ని, టెక్నాల‌జీ వినియోగం వినూత్న ఆలోచ‌న‌ల‌తో దూసుకెళుతోన్న ఆంధ్ర‌ప్ర‌దేశ్ ప్ర‌భుత్వాన్ని ఆయ‌న అభినందించారు. ఏపీలో ఉన్న ఆర్టీజీఎస్ వ్య‌వ‌స్థ ఇత‌ర రాష్ట్రాల‌కు ఆద‌ర్శప్రాయం కావాల‌ని అన్నారు.