దేశం నలుమూలలకు ఎగుమతవుతున్న ఏపీ చేపల్లో ప్రమాదకర ‘ఫార్మాలిన్‌’ అవశేషాలున్నాయని ప్రచారం ఎందుకు జరిగింది? 1976 నుంచి ఏపీ చేపలు ఈశాన్య రాష్ట్రాలకు ఎగుమతి అవుతున్నాయి. పకడ్బందీగా ప్యాకింగ్‌ చేసి పంపుతున్న చేపలపై ఫార్మాలిన్‌ పూత పూస్తున్నామన్న అపవాదు ఎలావచ్చింది? మన చేపల అమ్మకాన్ని ఆ ఐదు రాష్ట్రాలు ఎందుకు నిరాకరించాయి. ఇదీ ఏపీ ప్రభుత్వ అధికారులు, చేపల ఉత్పత్తి, ఎగుమతిదారుల్లో నెలకొన్న సందేహం. ఏపీ చేపల దిగుమతుల నిషేధం వెనుక రాజకీయ కుట్ర ఉందన్న వాదనకు బలం చేకూరుతోంది. 15 రాష్ట్రాలకు ఎగుమతి అవుతున్న ఏపీ చేపలపై కేవలం ఈశాన్య రాష్ట్రాల నుంచే అభ్యంతరాలు రావడం వెనుక మర్మం ఏమిటనే కోణం లో పరిశీలిస్తే.. రాజకీయ కుట్రే కారణమని అధికార వర్గాలు అంటున్నాయి.
రాష్ట్రంలో ఇటీవల నెలకొన్న రాజకీయ పరిస్థితులు తెలియని వారుండరు. ఏపీని చిన్నబుచ్చేందుకు తెర వెనుక శక్తుల పన్నాగమే.. మన చేపల నిషేధానికి కారణంగా భావిస్తున్నారు. ఈశాన్య రాష్ట్రాలైన నాగాలాండ్‌, అరుణాచల్‌ ప్రదేశ్‌, మేఘాలయ, మణిపూర్‌, అసోం, త్రిపుర ఇన్నాళ్లు లేని అభ్యంతరం ఇప్పుడెందుకు లేవనెత్తాయో ఇట్టే అర్థమవుతోందని ఆ రాష్ట్రాల్లో పర్యటించిన ఓ అధికారి వ్యాఖ్యానించారు. ఆయా రాష్ట్రాల్లో పాలక పార్టీలు ఒక్కటే కావడం, వైద్య మంత్రులు ఒకే పార్టీకి చెందిన వారు కావడమేనన్న అభిప్రాయం ఏపీ అధికార వర్గా ల్లో వ్యక్తమౌతోంది. కారణాన్ని ఆరా తీస్తే.. స్థానికుడైన ఆ రాష్ట్ర ఉన్నతాధికారి అక్కడి మంత్రికి స్వయానా సోదరుడు. ఆ అధికారి ఇటీవల కేంద్రంలో ఓ మంత్రిని కలిసిన తర్వాతే.. మన చేపలపై నిషేధం విధించారని సమాచారం. ఆ తర్వాతే దాని పక్క రాష్ట్రాలూ వంతపాడాయి.
ఏపీ చేపలపై ప్రమాదకర రసాయన పూతలు ఏమీ పూయట్లేదని భరోసా ఇస్తూ, ఆ రాష్ట్రాల ముఖ్యమంత్రులకు ఏపీ సీఎం చంద్రబాబు లేఖ రాయడంతో మూడు రాష్ట్రాలు మెత్తబడ్డాయి. అయినా నాగాలాండ్‌ మాత్రం భీష్మించింది. వ్యవసాయ ఉత్పత్తుల్లో నాణ్యతకు పెద్ద పీట వేస్తున్న రాష్ట్ర ప్రభుత్వం ఆక్వా సాగులోనూ యాంటీబయోటిక్స్‌ వినియోగంపై నిషేధం అమలు చేస్తున్నది. అయినా రాష్ట్ర ప్రయోజనాలను దెబ్బతీసేందుకే ఫార్మాలిన్‌ పేరిట దుష్ప్రచారంతో ఈశాన్య రాష్ర్టాల్లో మన చేపలపై నిషేధం విధించారన్న సందేహం మన అధికారుల్లో ఏర్పడింది. మొత్తం ఈశా న్య రాష్ట్రాలకు రోజూ మన చేపలు 52 ట్రక్కుల్లో వెళ్తాయి. అలాగే పశ్చిమబెంగాల్‌కు 150, ఒడిసాకు 30, బిహార్‌కు 50 యూపీకి 30, ఢిల్లీ+పంజాబ్‌లకు 20, ముంబైకి ప్రత్యేకంగా 6 ట్రక్కులు వెళ్తున్నాయి.