కేంద్ర బడ్జెట్‌ లో, ఆంధ్రప్రదేశ్ కు జరిగిన అన్యాయం విషయంలో ఇప్పటికే రాష్ట్రంలోని ప్రజలు కేంద్రం పై గుర్రుగా ఉన్నారు... సోషల్ మీడియాలో అయితే, కేంద్రం పై దుమ్మెత్తి పోస్తున్నారు... మిత్రపక్షంగా ఉన్న తెలుగుదేశం పార్టీ నేతలు కూడా బాహాటంగానే అసంతృప్తి వ్యక్తం చేస్తున్నారు... అటు వైపు నుంచి రాష్ట్ర బీజేపీ నేతలు, ఏమి ఇవ్వకపోయినా ఎదురుదాడి చేస్తూనే ఉన్నారు... ఈ నేపథ్యంలో గుంటూరు జిల్లాలోని ఎన్టీఆర్ స్టేడియం వద్ద ఏర్పాటు చేసిన ఫ్లెక్సీ చర్చనీయాంశమైంది...
కేంద్రం రాష్ట్రానికి చేస్తున్న అన్యాయం పై, అదే విధంగా తెలుగుదేశం మిత్రపక్షంగా ఉండటం పై, కొంత మంది ఎన్టీఆర్ స్టేడియం వద్ద ఫ్లెక్స్ ఏర్పాటు చేసారు... 'బీజేపీతో టీడీపీ పొత్తు..ఇంటికి రాదు విత్తు ..మన గింజలు కూడా మనకు దక్కవు' అన్న నినాదంతో రాసిన ఫ్లెక్సీ ఎన్టీఆర్ స్టేడియం వద్ద దర్శనమిస్తోంది. టీడీపీ అభిమానుల పేరుతో వెలసిన ఈ ఫ్లెక్సీని గుంటూరు వాసులు ఆసక్తిగా తిలకిస్తున్నారు.
కేంద్రం ప్రవేశపెట్టిన బడ్జెట్‌లో ఏపీకి తక్కువ నిధులు కేటాయించారన్న చర్చకు ఈ ఫ్లెక్సీ అద్దం పడుతోంది. ఇప్పటికే బడ్జెట్‌లో ఏపీకి అన్యాయం జరిగిందంటూ రాజకీయ నాయకులు, వామపక్షాలు రోడ్ల పై నిరసనలు చేపట్టారు. తాజాగా టీడీపీ అభిమానులు ఈ ఫ్లెక్సీని ఏర్పాటు చేయడం సంచలనంగా మారింది. అసలే అంతంతమాత్రంగా ఉన్న టీడీపీ-బీజేపీ సంబంధాలు బడ్జెట్‌లో ఏపీకి మొండిచేయి చూపించడంతో మరింత దిగజారాయి. ఇప్పుడు ఆ చిచ్చును ఈ ఫ్లెక్సీ మరింత దూరం తీసుకెళ్లేలా కనిపిస్తోంది.