ముఖ్యమంత్రి చంద్రబాబు నెమ్మదిగా ఎన్నికల మూడ్ లోకి వెళ్తున్నారు. దాదాపు ప్రతిరోజు కార్యకర్తల్తో సంభాషిస్తూనే ఉన్నారు. ఇంతవరకు తాము సాధించిన విజయాల్ని వివరిస్తూనే ఉన్నారు. భవిష్యత్‌ కార్యాచరణను వారికి తెలియ జేస్తున్నారు. దీర్ఘకాలిక లక్ష్యాల్ని నిర్దేశించుకున్నారు. ప్రపంచంలోనే ఆంధ్రప్రదేశ్‌ కు వస్తున్న గుర్తింపు వివరిస్తున్నారు. ఎన్ని కష్టాలు ఉన్నా, సంక్షేమం, అభివృద్ధి ముందుకు తీసుకు వెళ్తున్నారు. మరో పక్క, మన రాష్ట్రంలో ప్రస్తుతం ఉన్న హాట్ టాపిక్, కేంద్రం చేస్తున్న అన్యాయం. ఇక్కడ వింత ఏంటి అంటే, కేంద్రం పేరు ఎత్తటానికే, ప్రతిపక్షాలకు తడిసిపోతుంటే, ప్రజల సహకారంతో, కేంద్రం పై పోరాటం చేస్తున్నారు చంద్రబాబు. చంద్రబాబుకు, అన్నిటికంటే ఎన్నికల్లో కలిసి వచ్చే అంశం ఇదే అనే అభిప్రాయం ఉంది. ఇప్పటి నుంచే ఇంత పక్కాగా ఉన్న చంద్రబాబు, ఇంకా ఏడాది సమయం ఉంది కాబట్టి, చంద్రబాబు మార్క్ ఎన్నికల స్ట్రాటజీలు ఇంకా చాలా వస్తాయి. ఇక జగన్, పవన్ సంగతి చూద్దాం..
ప్రధాన ప్రతిపక్ష నేత జగన్ రాష్ట్ర వ్యాప్తంగా చేస్తున్న పాదయాత్రకు అనూహ్య స్పందనొస్తోంది అంటూ తన సొంత ఛానల్, పత్రికల్లో ఊదరగొడుతున్నాడు. నదుల పై వంతెనలు జగన్ దాటుకుంటూ అక్కడ జనాన్ని పోగేసి, ప్రత్యేకంగా ఒక సినిమా యూనిట్ ని తెప్పించి, అవి కవర్ చేసి, చూసారా మాకు వస్తున్న జనాలు అని చూపిస్తున్నారు. అప్పటి కప్పుడు అవి చూస్తే, ఇక సింహాసనం తమదేనన్న ధీమా ఆ పార్టీ కార్యకర్తల్లో వ్యక్తమౌ తోంది. అయితే జగన్ ఆ ఊర్నుంచి వెళ్ళిన తర్వాత అసలా సంగతే జనం మర్చిపోతున్నారు. పాదయాత్రగానీ, జగన్ చేసిన ఉపన్యాసాలు, విమర్శలుగాని గుర్తుండడంలేదు. ఎంత సేపు చంద్రబాబు భజన తప్పితే, తాను వస్తే ఏమి చేస్తాను అనే సంగతి కూడా చెప్పటం మరచిపోతున్నాడు. దీంతో పోలింగ్‌కొచ్చేసరికి పరిస్థితి ఏలా ఉంటుందోనన్న ఆందోళన కార్యకర్తల్లో కనిపిస్తోంది.
ఇక జనసేన అధినేత పవన్ కళ్యాణ్‌ పరిస్థితి మరీ వెరైటీ. ఎందుకు ఏమి చేస్తున్నాడో తెలీదు. ఎప్పుడు ఏది మాట్లాడతాడో తెలీదు. మోడీ అనే మాట పలకాలి అంటే భయం. ఓ పరిధికి లోబడి కార్యక్రమాలు నిర్వహిస్తున్నారు. అసలు ఆ పార్టీలో, పవన్ తరువాత ఎవరూ అంటే, ఒక్క నాయకుడు పేరు కూడా చెప్పే పరిస్థితి లేదు. అసలు ఇప్పటి వరకు, పార్టీ ఎన్నికల గుర్తు కోసం కూడా అప్లై చేసుకోలేదు. చివరకు వచ్చే సరికి, అసలు పోటీ చేస్తాడో కూడా డౌట్ గానే ఉంది. క్షేత్రస్థాయి నుంచి పార్టీ నిర్మాణ ప్రక్రియ పట్ల దృష్టిసారించడంలేదు. ఇలా ప్రతి పక్ష పార్టీలు రెండూ, చతికలబడి పోయాయి. ఎదో చేస్తున్నాం అంటే చేస్తున్నాం అని చెప్పటానికే కాని, ఒక్కరికి కూడా ప్రజలను తమ వైపుకు తిప్పుకునే లక్షణాలు లేవు. ప్రజలు వీరిద్దరినీ నమ్మి, రాష్ట్రాన్ని వీరి చేతిలో పెట్టే పరిస్థితి లేదు.