బాలీవుడ్ హీరో అక్షయ్ కుమార్ లోక్ సభ ఎన్నికల్లో ఓటేయకపోవడం, ఆయన కెనడా పౌరసత్వం గురించి విమర్శలు రావడం, మోడీతో కలిసి రాజకీయ ఇంటర్వ్యూ కాదంటూ చేసిన కార్యక్రమం, దానికి ఆయన ఘాటుగా బదులివ్వడం తెలిసిందే. తన పౌరసత్వం గురించి అనవసరంగా రాద్ధాంతం చేస్తున్నారని అక్షయ్ వాపోయారు. తన దగ్గర కెనడా పాస్‌పోర్ట్ ఉందనే విషయాన్ని ఎప్పుడూ దాచి పెట్టలేదని, ఏడేళ్లుగా అక్కడికి వెళ్లలేదన్నారు. భారత్‌లోనే ఉంటూ ఇక్కడే అన్ని రకాల పన్నులు కడుతున్నానని ఆయన తెలిపారు. నీ అక్షయ్ కుమార్‌పై మాత్రం నెటిజన్లు ట్రోలింగ్ ఆపలేదు. ‘టొరంటో నగరం నా ఇల్లు’ అని గతంలో అక్షయ్ మాట్లాడిన వీడియోను వాడేస్తూ.. ఈ బాలీవుడ్ హీరోను తెగ ట్రోల్ చేస్తున్నారు.
ఈ వ్యవహారంలో నటుడు సిద్ధార్థ్.. మోడీ, అక్షయ్ కుమార్‌పై వ్యంగాస్త్రాలు సంధించాడు. ఎక్కడా అక్షయ్ పేరు ప్రస్తావించకుండానే ఈ బొమ్మరిల్లు హీరో బాలీవుడ్ సూపర్ స్టార్‌కు చురకలు అంటించాడు. అమెరికా అధ్యక్షుడు డొనాల్డ్ ట్రంప్‌కి ట్వీట్ చేసిన సిద్ధూ.. ‘త్వరలోనే అమెరికా అధ్యక్షుడిగా తిరిగి ఎన్నికవడానికి మీరు సన్నద్ధం అవుతున్నారు. ఎన్నికల టైంలో నాకు ఇంటర్వ్యూ ఇవ్వాలని మీకు సలహా ఇస్తున్నా. మీరు ఏ పండ్లు తింటారు, ఎప్పుడు నిద్రపోతారు, ఎలా పని చేస్తారు, మీ క్యూటీ పర్సనాలిటీ తదితర విషయాలపై ముఖ్యమైన ప్రశ్నలు అడగాలని అనుకుంటున్నా. నాకు భారత పాస్‌పోర్ట్ ఉంది. వ్యక్తిగతంగా నాకు బదులివ్వండి’ అని కోరాడు. సిద్ధూ తన ట్వీట్‌లో ఎక్కడా అక్షయ్, మోడీ పేరు ప్రస్తావించనప్పటికీ.. కెనడా పాస్‌పోర్టు ఉన్న ఆయన ప్రధాని మోదీని ఇంటర్వ్యూ చేయడం పట్ల ఇలా సెటైర్ వేశాడు. అక్షయ్ కుమార్ అండర్ రేటెడ్ విలన్ అంటూ ఏప్రిల్ 24న కూడా సిద్ధూ ఓ ట్వీట్ చేశాడు.