ప్రధానమంత్రి మోదీ.. తెలంగాణ ముఖ్యమంత్రి కేసీఆర్‌, వైకాపా అధ్యక్షుడు జగన్‌లతో కలిసి కుట్ర రాజకీయాలు చేస్తున్నారని గుంటూరు ఎంపీ గల్లా జయదేవ్ వ్యాఖ్యా నించారు. దేశంలోని అన్ని రాష్ట్రాల్లో గుజరాత్‌ తరహా రాజకీయం చేసేందుకు శతవిధాలా ప్రయత్నాలు చేస్తున్నారని మండిపడ్డారు. గుంటూరులో ఆదివారం నిర్వహించిన తెదేపా నాయకులు, కార్యకర్తల సమావేశంలో ఆయన మాట్లాడారు. ‘రాష్ట్రానికి మోదీ చేసిన ద్రోహాన్ని పార్లమెంట్‌లో ఎండగట్టానన్న కక్షతో నన్ను లక్ష్యంగా పెట్టుకుని ఈడీ, ఐటీ దాడులతో ఇబ్బందులు పెట్టాలనుకుంటున్నారు. బడ్జెట్‌ ప్రసంగం తర్వాత ఈడీ నోటీసులు ఇచ్చింది. 8 గంటలకు పైగా ప్రశ్నించారు.
దురుసుగా ప్రవర్తించారు. ఎక్కడా భయపడకుండా ప్రశ్నలన్నింటికీ సూటిగా సమాధానమిచ్చాను. కొన్నాళ్ల తర్వాత మళ్లీ పిలిపించారు. ఎంత భయపెట్టాలని చూసినా మీరు భయపడలేదని ఈడీ అధికారులే నాతో చెప్పారు. రాజకీయ ఒత్తిళ్ల వల్లే ఇదంతా చేస్తున్నామని చెప్పి మొదటిసారి కంటే రెండోసారి బాగా మాట్లాడి పంపించారు. తెలుగు రాష్ట్రాల్లో పక్కాగా పన్ను చెల్లిస్తున్న నంబర్‌వన్‌ టాక్స్‌ పేయర్ని.. ఐటీ సంస్థ అవార్డులు కూడా ఇచ్చింది. అలాంటి నాపై దాడులు చేసి ఇబ్బందులకు గురిచేస్తే నవ్వులపాలవుతారు. నా వద్ద ఏమీ దొరకలేదని, నా బంధువులు, స్నేహితులను వేధిస్తున్నారు. ఇలాంటి తాటాకు చప్పుళ్లకు భయపడేది లేదు. బ్రిటీష్‌ వాళ్లతో పోరాడి మా తాతతో పాటు ఎన్‌.జి రంగా జైలుకు వెళ్లారు. ఇప్పుడు ప్రధాని నరేంద్ర మోదీతో పోట్లాడి జైలుకు వెళ్లేందుకు నేను సిద్ధం. తెలంగాణ ముఖ్యమంత్రి కేసీఆర్‌, ఎంఐఎం అధినేత ఒవైసీతో కలిసి అవినీతి జగన్‌కు మద్దతు తెలుపుతూ చంద్రబాబునాయుడిని అధికారంలోకి రాకుండా అడ్డుకోవాలని చూస్తున్నారు’ అని ఎంపీ గల్లా జయదేవ్ వివరించారు.
ప్రధాని మోదీ, బీజీపీ జాతీయ అధ్యక్షుడు అమిత్‌ షా, జాతీయ భద్రతా సలహాదారు అజిత్‌ దోవెల్‌ త్రయం దేశంలో హిట్లర్‌ పాలన కొనసాగిస్తున్నారని ఆగ్రహం వ్యక్తంచేశారు. దేశ భవిష్యత్తుకు సంబంధించిన ముఖ్య విషయాలు సైతం వారు ముగ్గురే కలిసే నిర్ణయాలు తీసుకుంటున్నారని ఆరోపించారు. మోదీ, షాలు గుజరాత్‌ రాజకీయాన్ని దేశమంతా రుద్దాలని యత్నిస్తున్నారని ఆరోపించారు. జగన్‌, కేసీఆర్‌లతో కలిసి మోదీ కుట్రలుచేస్తున్నారని.. ఇప్పుడు వారి దృష్టి తనపై పడిందని, ఆవిశ్వాస తీర్మాన ప్రసంగం అనంతరం తనను ఈడీ పిలిచిందని తెలిపారు. తనతో కఠినంగా వ్యవహరించారని చెప్పారు. బడ్జెట్‌ ప్రసంగం తరువాత మళ్లీ పిలిచారన్నారు. ’నేను పక్కాగా ట్యాక్స్‌ కడుతున్నా.. రెండు తెలుగు రాష్ట్రాలో నెంబర్‌వన్‌ ట్యాక్స్‌ పేయర్‌ను నేను... నా వద్ద ఏమీ దొరకలేదు... దాంతో నా బంధువులు, స్నేహితులనూ ఐటీ అధికారులు వేధిస్తున్నారు’ అని గల్లా పేర్కొన్నారు.