పులివెందుల అసెంబ్లీ స్థానానికి నామినేషన్ దాఖలు చేయాల్సి ఉన్నందున వ్యక్తిగతంగా కోర్టుకు హాజరయ్యే విషయంలో మినహాయింపు ఇవ్వాలంటూ వైసీపీ అధ్యక్షుడు జగన్... సీబీఐ ప్రత్యేక కోర్టును కోరారు. జగన్ తరఫు న్యాయవాది అశోక్‌రెడ్డి శుక్రవారం ఈ మేరకు సీఆర్‌పీసీ సెక్షన్‌ 317 కింద పిటిషన్‌ దాఖలు చేశారు. దీనిని పరిశీలించిన కోర్టు జగన్‌కు వ్యక్తిగత హాజరు నుంచి మినహాయింపు ఇచ్చింది. ఇదే కేసులో నిందితులుగా ఉన్న సీనియర్‌ ఐఏఎస్‌ అధికారి వై.శ్రీలక్ష్మి, ఎమ్మెల్యే సబితా ఇంద్రారెడ్డి, మాజీ ఎంపీ వైవీ సుబ్బారెడ్డి, పెన్నా ప్రతా్‌పరెడ్డి, ఇందూ శ్యాంప్రసాద్‌రెడ్డి కోర్టుకు హాజరయ్యా రు. తదుపరి విచారణను ఈ నెల 29కి కోర్టు వాయిదా వేసింది.
జగన్ తనకు రూ.339.89కోట్ల ఆస్తులున్నట్లు నామినేషన్ అఫిడవిట్‌లో పేర్కొన్నారు. తన భార్య భారతి పేరున రూ.92.53కోట్లు, పిల్లలు వైఎస్‌ హర్షిణిరెడ్డి పేరున రూ.6.45కోట్లు, వైఎస్‌ వర్షారెడ్డి పేరున రూ.4.59 లక్షల ఆస్తులున్నట్లు వివరించారు. ఏటా రూ.12.30 కోట్ల ఆదాయ పన్ను కడుతున్నట్లు వెల్లడించారు. బీఎండబ్ల్యూతోపాటు మూడు స్కార్పియోలు, చేతిలో రూ.43,560 నగదు ఉందని, తనకు బంగారు ఆభరణాలు ఏమీ లేవని తెలిపారు. తనతోపాటు, భార్య, ఇద్దరు పిల్లల పేరున బ్యాంకులో డిపాజిట్లు ఉన్నట్లు వివరించారు. కాగా 2014 ఎన్నికల్లో సమర్పించిన అఫిడవిట్‌లో ప్రస్తావించిన ఆస్తుల కంటే ఇప్పుడు తగ్గాయి. ఆనాడు రూ.416.68 కోట్లు ఆస్తులు, రూ.137.2 కోట్ల అప్పులు చూపించారు. రూ.13.92 కోట్లు వార్షికాదాయం ఉందని పేర్కొన్నారు. తనపై మొత్తం 39 కేసులున్నట్లు అఫిడవిట్‌లో జగన్ ప్రస్తావించారు. ఇందులో చాలా వరకూ విచారణలో ఉన్నాయని వాటి వివరాలు వెల్లడించారు. వీటిల్లో సీబీఐ, ఈడీ దర్యాప్తులో ఉన్న కేసులు ఉన్నాయి. మొత్తం 47 పేజీల అఫిడవిట్‌ అందజేశారు.
జగన్ ఆస్తులు: ఆస్తులు రూ.339.89కోట్లు, అప్పులు రూ.1.19 కోట్లు, ఒక బీఎండబ్ల్యూ, 3 స్కార్పియోలు, చేతిలో నగదు రూ.43,560, డిపాజిట్లు 7.65లక్షలు, ఏటా కడుతున్న ఆదాయ పన్ను రూ.12.30కోట్లు, ముందస్తు పన్ను చెల్లింపులు రూ.7,67,29,900, రిసీవబుల్స్‌ టీడీఎస్‌ రూ.41,55,063, వ్యవసాయ భూముల విలువ రూ.42.44లక్షలు, వ్యవసాయేతర భూముల విలువ రూ.8.42 కోట్లు, వాణిజ్య భవనాల విలువ రూ.14.46కోట్లు, నివాస భవనాల విలువ రూ.35.30కోట్లు, భారతి సిమెంట్స్‌, కార్మల్‌ ఏషియా, క్లాసిక్‌ రిటైల్‌ హరిషా ఇన్‌ఫ్రాస్ట్రక్చర్‌, సందూర్‌ పవన్‌ కంపెనీ, సరస్వతి పవర్‌, సిలికాన్‌ బిల్డింగ్స్‌లో ఉన్న షేర్ల విలువ రూ.262.44 కోట్లు