ఏపీ సీఎం చంద్రబాబు తనయుడు, మంత్రి నారా లోకేశ్ పోటీ స్థానంపై స్పష్టత వచ్చింది. ఇప్పటి వరకూ భీమిలీ నియోజకవర్గం నుంచి పోటీ చేస్తారని పుకార్లు వచ్చినప్పటికీ వాటన్నింటికీ మంగళవారం మధ్యాహ్నం అధిష్టానం ఫుల్‌స్టాప్ పెట్టేసింది. విశాఖ నార్త్‌ నుంచి నారా లోకేష్ పోటీ చేస్తారని ఆయన పేరును చంద్రబాబు ఖరారు చేశారు. కాగా... లోకేశ్ భీమిలి లేదా విశాఖ ఉత్తర నియోజకవర్గం నుంచి పోటీ చేస్తారని ప్రచారం జరిగింది. విశాఖ ఉత్తర టిక్కెట్‌ ఆశిస్తున్నవారు పలువురు సోమవారం రాత్రి పార్టీ అధినేతను కలవగా..లోకేశ్ పోటీ చేస్తున్నారని, ఆయనకు సహకరించాలని సూచించినట్టు తెలిసింది. దాంతో ఆ స్థానంపై కూడా సందిగ్ధత తొలగిపోయింది. ఈ టిక్కెట్‌ను ఆశించిన మాజీ ఎంపీ సబ్బం హరి పేరును మాడుగులకు పరిశీలిస్తున్నట్టు తెలిసింది. ముఖ్యమంత్రి తనయుడే పోటీ చేస్తుండడంతో స్వాతి కృష్ణారెడ్డి కూడా వెనక్కి తగ్గారు.
అయితే విశాఖ నార్త్‌ నుంచి నారా లోకేష్ పోటీ చేస్తారని తెలియటంతో, కార్యకర్తలు షాక్ అయ్యారు. ఎందుకంటే లోకేష్ లాంటి హై ప్రొఫైల్ ఫిగర్ ఉన్న నాయకులు రిస్క్ తీసుకోరు. సేఫ్ సీట్ ఎక్కడ ఉందో చూసుకుంటారు. సామాజికవర్గం ఎక్కువ ఉన్న చోట, అన్నీ అనుకులతలు ఉన్న చోట చూసుకుని పోటీ చేస్తారు. కాని లోకేష్ మాత్రం, విశాఖ నార్త్‌ నుంచి పోటీ చేస్తున్నారు. అక్కడ సామాజిక సమీకరణాలు అంత తేలికగా ఉండవు. రిస్క్ తో కూడు కున్న పని. కాని, లోకేష్ చేసిన పనులే అక్కడ గెలుపుకు పునాది అవుతుందని, అన్ని సామాజిక వర్గాల ప్రజలు సమానంగా ఉండే చోటు నుంచి, ఎన్నిక అయ్యారు అనే పేరు వస్తుందని, ఇది సహసోపేత నిర్ణయమని అంటున్నారు. జగన రెడ్డిలు ఎక్కువగా ఉండే పులివెందుల నుంచి, పవన్ కాపులు ఎక్కువగా ఉండే చోటు నుంచి పోటీకి రెడీ అవుతుంటే, లోకేష్ ఇలా చెయ్యటం నిజమైన నాయకుడి లక్షణం అంటున్నారు.
ఇదిలా ఉంటే.. ఆయన నార్త్‌ నుంచి పోటీ చేస్తే.. గంటా విశాఖ ఎంపీగా వెళుతున్నారు. ఇప్పుడు భీమిలిలో తెలుగుదేశం పార్టీకి అభ్యర్థి ఎవరనేది ప్రశ్నార్థకంగా మారింది. అయితే కేంద్ర మాజీ మంత్రి పి.అశోక్‌గజపతిరాజు కుమార్తె అదితి పేరు కూడా వినిపిస్తోంది. గతంలో భీమిలి నుంచి అశోక్‌గజపతిరాజు తండ్రి పీవీజీ రాజు, సోదరుడు ఆనందగజపతిరాజు భీమిలి నుంచి ప్రాతినిథ్యం వహించారు. ఈ నేపథ్యంలో ఆమెకు కేటాయిస్తారా లేక ఇటీవల పార్టీలో చేరిన కర్రి సీతారామ్‌కు అవకాశం ఇస్తారా? లేదంటే మరెవరినైనా దించుతారా? అనేది రెండు, మూడు రోజుల్లో తేలుతుంది.