ఆంధ్రప్రదేశ్‌కు కేంద్ర ప్రభుత్వం తీవ్ర అన్యాయం చేస్తోందంటూ తీవ్ర విమర్శలు చేస్తున్న నేపథ్యంలో.. జనవరి 6న రాష్ట్ర పర్యటనకు వస్తున్న ప్రధానమంత్రి నరేంద్రమోదీకి ప్రొటోకాల్‌ ప్రకారం స్వాగతం పలికేందుకు తాను వెళ్లాలా? వద్దా? అనే అంశంపై ముఖ్యమంత్రి చంద్రబాబు శనివారం ముఖ్య నాయకులు, కొందరు మంత్రులతో చర్చించారు. విభజన చట్టంలోని అంశాలు, హామీలు నెరవేర్చకుండా, ప్రత్యేక హోదా ఇవ్వకుండా రాష్ట్రానికి ప్రధాని ద్రోహం చేశారని.. ఇలాంటి పరిస్థితుల్లో ఆయనకు స్వాగతం పలకాల్సిన అవసరం ఉందా? అనేదానిపై పార్టీ నాయకుల అభిప్రాయాలను అడిగి తెలుసుకున్నారు. ఒకరిద్దరు నాయకులు మాట్లాడుతూ.. మోదీ గుజరాత్‌ ముఖ్యమంత్రిగా ఉన్నప్పుడు ఆ రాష్ట్రంలో ప్రధానమంత్రి పర్యటించినా స్వాగతం పలకడానికి వెళ్లలేదని చెప్పారు. తమిళనాడు ముఖ్యమంత్రి జయలలిత సైతం ఇలాగే చేశారని వివరించారు. దీనిపై మరికొంత చర్చించిన అనంతరం నాలుగైదు రోజుల్లో తుది నిర్ణయానికి రానున్నారు.
మరో పక్క, మోడీ పర్యటన పై ఇప్పటికే రాజకీయ నిర్ణయం తీసుకున్నారు చంద్రబాబు. బీజేపీ వాళ్లకి, ముఖ్యంగా మోడీ, అమిత్ షా లకి, ఏమి చెయ్యకపోయినా, అన్ని లక్షల కోట్లు ఇచ్చాం, ఇన్ని లక్షల కోట్లు ఇచ్చాం అని చెప్పటం అలవాటు. అందుకే ఈ ప్రచారం తిప్పికొట్టటానికి, ఏపీకి బీజేపీ చేసిన అన్యాయమేమిటో .. కేంద్రం సాయం లేకపోయినా సాధించిన ప్రగతి ఏమిటో శ్వేతపత్రాల ద్వారా విడుదల చేసేందుకు, చంద్రబాబు కౌంటర్ ప్లాన్ చేసారు. అటు మోడీకే కాదు, ఇటు జగన్, పవన్ ల పిచ్చి ఆరోపణలకు కూడా చెక్ పెట్టే ప్లాన్ వేసారు. శ్వేతపత్రాలతో ప్రతిపక్షాలపై చంద్రబాబు అస్త్రాలను ఎక్కు పెడుతున్నారు. 014లో అధికారంలోకి వచ్చిన నాడు రాష్ట్రం ఉన్న పరిస్థితి పై ఆనాడు శ్వేత పత్రాలను విడుదల చేసిన ముఖ్యమంత్రి తాజాగా ఈ నాలుగున్నర సంవత్సరాల కాలంలో చేపట్టిన అభివృద్ది సంక్షేమ కార్యక్రమాలు, తీసుకువచ్చిన ప్రాజెక్టులపై శ్వేతపత్రాలను విడుదల చేయాలని నిర్ణయించారు.
ఎన్నికలకు నాలుగు నెలలు సమయం ఉండగానే.. ఎపీలో అధికార, ప్రతిపక్షాల మధ్య సమరం ప్రారంభమైంది. జనవరి ఆరో తేదీన ప్రధాని నరేంద్రమోదీ గుంటూరు సభలో పాల్గొననున్నారు. రాష్ట్రానికి ఇచ్చిన సంస్థలు, నిధుల పై ఆయన ప్రజలకు వివరించడంతో పాటు, బీజేపీ ఎపీ అభివృద్దికి కట్టుబడి ఉందని చెప్పబోతున్నారు. ముఖ్యమంత్రి చంద్రబాబు 2014 జూన్ లో ప్రమాణ స్వీకారం చేసిన ప్రదేశంలోనే ప్రధాని నరేంద్రమోడీ ప్రసంగించబోతున్నారు. ఇటీవల జనసేన అధినేత పవన్ కళ్యాణ్ కూడా అదే ప్రాంతంలో సభ పెట్టి తెలుగుదేశం పై విరుచుకుపడ్డారు. పాదయాత్రలో జగన్ కూడా ప్రభుత్వం పై అదేపనిగా అవినీతి ఆరోపణలు చేస్తుండటంతో వీటిని తిప్పికొట్టేందుకు తెలుగుదేశం ఎన్నికలకు ముందు పెద్ద కసరత్తే ప్రారంభించింది. రాష్ట్ర ఆర్ధిక పరిస్థితి, పారిశ్రామిక పురోగతి, వ్యవసాయం, ఉద్యానవనం, మత్స్య పరిశ్రమలో సాధించిన అభివృద్ది, రాజధాని, పోలవరం నిర్మాణం, రాయలసీమకు సాగు, తాగు నీరు, రాష్ట్రంలో నీటి పారుదల ప్రాజెక్టులు, రాయలసీమలో పరిశ్రమలు, విశాఖపట్నంలో ఐటీ పరిశ్రమలు వంటి పలు అంశాల పై రాష్ట్ర ప్రభుత్వం తాజా గణాంకాలతో శ్వేత పత్రాలను విడుదల చేయాలని నిర్ణయించింది.