నాలుగున్నరేళ్ళుగా దేశ వ్యాప్తంగా ప్రధాని మోడి పరిపాలనా విధానం, ఆంధ్రప్రదేశ్ పై చూపిస్తున్న వివక్ష, ప్రతిపక్షాలను నిర్వీర్యం చెయ్యటం, కుట్రలు చెయ్యటం వంటి వాటి పై, దేశ వ్యాప్తంగా చెప్పేందుకు, ఆంధ్రప్రదేశ్ ముఖ్యమంత్రి చంద్రబాబు నిన్న ఢిల్లీ పర్యటన చేసారు. రాష్ట్ర ప్రభుత్వం పై మూకుమ్మడిగా వ్యవస్థలను ఉపయోగించి దాడులు చేస్తున్న నేపథ్యంలో శుక్రవారం చంద్రబాబు ఢిల్లీకి వచ్చారు. కాన్‌స్టిట్యూషన్‌ క్లబ్‌లో జాతీయ మీడియాను ఉద్దేశించి మాట్లాడారు. అందర్నీ సమన్వయం చేసుకుంటూ... విభిన్న వేదికలు... విభిన్నకోణాల్లో దేశ ప్రజలకు అవగాహన కల్పిస్తూ... ఆలోచన రగిలిస్తూ తన ప్రస్థానాన్ని లక్ష్యం దిశగా తీసుకెళ్తానని శనివారం దిల్లీలో ఏర్పాటు చేసిన విలేకరుల సమావేశంలో ధీమాగా ప్రకటించారు. ఇది అంతం కాదు.. ఆరంభం అని కుండబద్దలుకొట్టారు.
కేంద్ర సర్కారు పై నిప్పులు చెరిగారు. 40 ఏళ్లుగా నేను క్రమశిక్షణతో ఉన్నాను. చిల్లర రాజకీయాలు చేయలేదు. ఇప్పుడు ఏం జరుగుతోందో దేశానికి చెప్పాల్సిన బాధ్యత కూడా నాపై ఉంది. మనది అద్భుతమైన దేశం. అందకే అమరావతిలో ఉండి మాట్లాడితే నేషనల్ మీడియాలో మీరు వెయ్యరని, ఢిల్లీ వచ్చి మాట్లాడుతున్నా అని, అయినా ఇక్కడ కూడా, మిమ్మల్ని ప్రసారం చెయ్యద్దు అంటూ ఆదేశాలు ఇచ్చి ఉంటారు, నాకు తెలుసని చంద్రబాబు అన్నారు. అన్ని వ్యవస్థలతో పాటు, మీడియాని కూడా వారి కంట్రోల్ లోకి తెచ్చుకున్నారని, వారికి వ్యతిరేకంగా వార్తలు రాస్తున్న వారి పై కూడా ఐటి, ఈడీ దాడులు చేపిస్తున్నారని, చంద్రబాబు అన్నారు. చంద్రబాబు అన్నట్టుగానే, నిన్న చంద్రబాబు మాట్లాడిన ప్రెస్ మీట్, నేషనల్ మీడియాలో లైవ్ రాలేదు.
ఒకటి రెండు ఛానెల్స్ మినహా ఎవరూ లైవ్ ఇవ్వలేదు. చంద్రబాబు మాయావతిని కలవటం దగ్గర నుంచి అప్డేట్స్ మొదలు పెట్టారు. కాని, ఎంతో కీలకమైన ప్రెస్ మీట్ మాత్రం, రాకుండా చేసారు. అయితే, వీటి పై ఢిల్లీలో టిడిపి నేతలు ఆరా తియ్యగా, అమిత్ షా ఆఫీస్ నుంచి, చానల్స్ కు ఫోన్ లు వచ్చాయని, ప్రసారం చెయ్యవద్దు, చంద్రబాబు ఢిల్లీ పర్యటన కవరేజ్ ఇవ్వద్దు అంటూ, ఆదేశాలు ఇచ్చినట్టు తెలిసిందని టిడిపి నేతలు ఆరోపిస్తున్నారు. దీనికి ఉదాహరిస్తూ, చంద్రబాబు పోయిన సారి ఢిల్లీ వచ్చి, రెండు చానల్స్ లో లైవ్ ఇంటర్వ్యూ ఇస్తూ ఉండగా, అర్ధాంతరంగా అవి ఆగిపోయాయని, అప్పుడు కూడా ఇలాంటి ఆరోపణలే వచ్చాయని అంటున్నారు. మొన్నటికి మొన్న, పవన్ కవాతు, ఎన్ని గంటలు అయినా లైవ్ ఇవ్వాలి అంటూ, తెలుగు మీడియాకు, రాం మాధవ్ ఫోన్ చేసి చెప్పటం కూడా ఉదాహరిస్తున్నారు. అన్ని వ్యవస్థలతో పాటు, మీడియాని కూడా మోడీ-షా నాశనం చేసారని, ఇది అప్రకటిత కర్ఫ్యూ లాగా ఉందని అంటున్నారు.