వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి ప్రస్తుతం ఎన్నికల ప్రచారంలో బిజీగా ఉన్నారు. ఈ ఎన్నికల్లో ఎలాగైనా గెలిచి అధికారం చేపట్టాలని భావిస్తున్నారు. మరో 20 రోజుల్లో అధికారంలోకి వస్తానని పదేపదే చెప్పుకుంటున్న జగన్.. సీఎం పీఠాన్ని అధిష్టించాలని గట్టి పట్టుదలతో ఉన్నారు. ఇందుకోసం కేసీఆర్ దారిలో నడుస్తున్నట్టు తెలుస్తోంది. తెలంగాణ అసెంబ్లీ ఎన్నికల్లో గెలుపు కోసం తెలంగాణ ముఖ్యమంత్రి కేసీఆర్ రాజశ్యామల యాగం నిర్వహించిన సంగతి తెలిసిందే. ఆ యాగం నిర్వహించిన అనంతరం మలి విడత ప్రచారం మొదలుపెట్టిన కేసీఆర్... రెండోసారి తెలంగాణలో విజయందుందుభి మోగించారు. తాజాగా కేసీఆర్ బాటలో ఏపీ ప్రతిపక్ష నేత, వైసీపీ అధినేత వైఎస్ జగన్మోహన్ రెడ్డి కూడా నడిచినట్టు తెలుస్తోంది.
వైఎస్ జగన్ కూడా రాజశ్యామల యాగం నిర్వహించినట్టు వార్తలు వినిపిస్తున్నాయి. ఇందుకు సంబంధించి బెంగళూరు మిర్రర్ కథనాన్ని ప్రచురించింది. జగన్ తరపున స్వామి స్వరూపానందేంద్ర ఈ యాగాన్ని నిర్వహించారని... నెల్లూరులో జగన్‌కు సన్నిహితుడైన ఓ ఎంపీ ఈ మొత్తం యాగాన్ని దగ్గరుండి పర్యవేక్షించారని తెలుస్తోంది. ఈ నెల 27 నుంచి 29 వరకు జరిగిన యాగంలో జగన్‌కు అత్యంత సన్నిహితంగా ఉండే కొందరు నేతలు పాల్గొన్నట్టు వార్తలు వినిపిస్తున్నాయి. ఎన్నికల ప్రచారంలో తీరిక లేకుండా ఉన్న వైసీపీ అధినేత మాత్రం ఈ యాగానికి దూరంగా ఉన్నట్టు తెలుస్తోంది. ఈ సారి ఎలాగైనా అధికారంలోకి రావాలని పట్టుదలగా ఉన్న వైఎస్ జగన్మోహన్ రెడ్డి... ఇందుకోసం రాష్ట్రవ్యాప్తంగా ఎన్నికల ప్రచారం నిర్వహిస్తున్నారు.
మరోవైపు ఆయన సన్నిహితులు కొందరు జగన్ ముఖ్యమంత్రి కావాలని ఈ యాగం చేయించినట్టు తెలుస్తోంది. తెలంగాణ ముఖ్యమంత్రి కేసీఆర్ సలహాతోనే వైఎస్ జగన్ ఈ యాగం చేయించినట్టు ప్రచారం జరుగుతోంది. జగన్ కుటుంబ సభ్యులు నిర్వహించిన ఈ యాగంలో ఆ కుటుంబానికి సన్నిహితుడైన ఒక్క ఎంపీ మాత్రమే పాల్గొన్నట్టు తెలిపింది. రాజశ్యామల యాగంలో మొత్తం 27 మంది రిత్వికులు పాల్గొన్నట్టు బెంగళూరు మిర్రర్ పేర్కొంది. విశాఖ శారాదాపీఠం పీఠాధిపతి స్వామి స్వరూపానంద పర్యవేక్షణలో యాగం పూర్ణాహుతిని నిర్వహించినట్టు తెలిపింది. అలాగే, జగన్‌కు బదులు ప్రధాన రిత్వికులు వరుణ తీసుకుని యాగాన్ని పూర్తి చేసినట్టు వివరించింది. కాగా, తెలంగాణ అసెంబ్లీ ఎన్నికలకు ముందు కేసీఆర్ కూడా రాజశ్యామల యాగాన్ని నిర్వహించారు. ఇప్పుడు కేసీఆర్ సలహాతోనే జగన్ కూడా యాగం నిర్వహించారని తెలుస్తోందని ‘బెంగళూరు మిర్రర్’ పేర్కొంది.