తొడగొట్టి చెబుతున్నా... పుట్లూరు, యల్లనూరు మండలాలకు హెచ్చెల్సీ నీరు తెప్పిస్తానని ఎంపీ జేసీ దివాకర్‌రెడ్డి తెలిపారు. స్థానికంగా ఆదివారం నిర్వహించిన ప్రచారసభలో టీడీపీ శింగనమల ఎమ్మెల్యే అభ్యర్థి బండారు శ్రావణితో కలిసి మాట్లాడారు. సమితి ప్రెసిడెంట్‌ అయినప్పటి నుంచి పలుమార్లు మా పొలాలకు వదలకుండా మీకు హెచ్చెల్సీ నీరు వదిలామన్నారు. ఈ మండలంలో రెండు కుటుంబాలే ఆధిపత్యం కొనసాగిస్తున్నాయని, టీడీపీ ఎంపీ అభ్యర్థి జేసీ పవన్‌రెడ్డిని, ఎమ్మెల్యే అభ్యర్థి బండారు శ్రావణిలను గెలిపిస్తే అలా జరగదన్నారు. ప్రతి మహిళ గుండెల మీద చేయివేసుకొని చేసిన అభివృద్ధిని చూసి ఓటేయాలన్నారు. చంద్రబాబునాయుడు ముఖ్యమంత్రి అయితేనే రాయలసీమకు నీళ్లు వస్తాయన్నారు.
కొందరికి కొన్ని మండలాల్లో అందలం ఎక్కిస్తే ఇప్పుడు మాకే ఎదురుతిరిగారన్నారు. ప్రజల అండ ఉండగా మమ్మల్ని ఎవరూ ఏమి చేయలేరని తెలిపారు. హెచ్చెల్సీ నీరు గండికోట నుంచి తెప్పిస్తామన్నారు. రెడ్డి...రెడ్డి అంటూ గ్రామాల్లో ఊరేగుతున్నారు కానీ కులం అన్నం పెట్టదన్నారు. మంచితనంతోనే ఏ రెడ్డి అయినా గెలుస్తాడని తెలిపారు. చీనీచెట్లు నరికిన వారినే మీరు ఆదరిస్తున్నారని విమర్శించారు. మీ పిల్లల భవిష్యత్తు కోసం ఓట్లు వేయాలని కోరారు. కార్యక్రమంలో నాయకులు పుట్లూరు పుల్లారెడ్డి, కులశేఖర్‌రెడ్డి, బ్రహ్మయ్య, రవి, చంద్రశేఖర్‌చౌదరి, రామాంజనేయులు పాల్గొన్నారు.