టీవీ9 మాజీ సిఈఓ రవి ప్రకాష్ పై కొత్తగా వచ్చిన యాజమాన్యం, టార్గెట్ చేస్తూనే ఉంది. ఇప్పటికే వివిధ కేసుల పై, కొత్త యాజమాన్యం, రవి ప్రకాష్ ను అరెస్ట్ చెయ్యగా, తాజాగా మరో కేసు పెట్టారు. అయితే పోలీసులు ఉన్నట్టు ఉండి ఎంట్రీ ఇచ్చి, రవి ప్రకాష్ ను అదుపులోకి తీసుకోవటంతో, కొంత సేపు గందరగోళ పరిస్థితి ఏర్పడింది. పది మంది పోలీసులు, ఒకేసారి రవిప్రకాష్ ఇంటికి వెళ్లి, ఏ కారణం చేపకుండా, అతన్ని అరెస్ట్ చేసి, తీసుకువెళ్ళారు. అయితే ఆయనకు ఎందుకు తీసుకువెళ్తున్నారో సమాచారం ఇవ్వకపోవటంతో, కొంత గందరగోళ పరిస్థితి ఏర్పడింది. అయితే తరువాత కేసు వివరాలు పోలీసులు చెప్పారు. ప్రస్తుతం, రవి ప్రకాష్ ని, బంజారాహిల్స్‌ పోలీసులు అతన్ని విచారిస్తున్నారు. అయితే తాజగా బంజారాహిల్స్‌ పోలీస్ స్టేషన్ లో టీవీ9 కొత్త యాజమాన్యం కేసు పెట్టింది. అదే ఈ అరెస్ట్ కు కారణం అని తెలుస్తుంది.
రవిప్రకాష్, మూర్తి, ఫెరీరియో పై శుక్రవారం, టీవీ9 యాజమాన్యం ఫిర్యాదు చేసింది. బోర్డు అనుమతి లేకుండా కంపెనీ ఎకౌంటులో నుంచి, రూ.18.31 కోట్లను సొంత ఖాతాలకు మళ్లించారని ఆరోపణ. తాము అన్ని రికార్డులు తిరగేస్తే, ఈ విషయం తెలిసిందని, దీని పై పోలీస్ స్టేషన్ లో ఫిర్యాదు చేసింది, కొత్త యాజమాన్యం. ఈ విషయంలో రవి ప్రకాష్ కావాలనే ఇలా చేసి, నిధులు మళ్ళించారని, కొత్త యాజమాన్యం ఆరోపిస్తుంది. అయితే ఈ కేసు విషయం పై, 41 సీఆర్‌పీసీ ప్రకారం రవిప్రకాష్‌కు బంజారాహిల్స్‌ పోలీసులు నోటీసులు జారీ చేసారని, ఆ నోటీసును తీసుకునేందుకు రవిప్రకాష్ నిరాకరించారని, ఈ నేపధ్యంలోనే, బంజారాహిల్స్‌ పోలీసులు రవిప్రకాష్‌ను అదుపులోకి తీసుకున్నారని చెప్తున్నారు.
రవిప్రకాష్‌పై టీవీ9 ప్రస్తుత యాజమాన్యం అలందా మీడియా పలు ఆరోపణలు చేసిన విషయం తెలిసిందే. ఫోర్జరీ, తప్పుడు పత్రాల సృష్టి, లోగో విక్రయం, సైబర్‌క్రైమ్‌ నేరాలకు పాల్పడ్డారంటూ బంజారాహిల్స్‌ పోలీసు స్టేషన్లలో ఫిర్యాదు చేసింది. ఈ కేసులకు సంబంధించి విచారణకు రవిప్రకాష్ హాజరై.. పోలీసుల ప్రశ్నలకు సమాధానమిచ్చారు. అయితే కొత్త యాజమాన్యం వెనుక కేసీఆర్ సన్నిహితులు అయిన రామేశ్వర రావు, మేఘా కృష్ణా రెడ్డి ఉన్నారని, వారు దురుద్దేసపుర్వకంగా వ్యవహరిస్తూ, టీవీ9 ను కైవసం చేసుకుని, రవి ప్రకాష్ ను బయటకు పంపి, కేసుల్లో ఇరికించారని, రవి ప్రకాష్ సన్నిహితులు ఆరోపిస్తున్న సంగతి తెలిసిందే. అలాగే నటుడు శివాజీకి, టీవీ9 లో ఉన్న షేర్లు పై కూడా, అతని పై కూడా కేసులు పెట్టి, వేధిస్తున్న సంగతి తెలిసిందే. ఇప్పుడు మరో కేసుతో, రవి ప్రకాష్ ని మరింత ఇబ్బందుల్లోకి నెట్టుతున్నారు.