విశ్వవిఖ్యాత న‌టుడు, మాజీ ముఖ్య‌మంత్రి నంద‌మూరి తార‌క రామారావు జీవిత‌కథ ఆధారంగా `ఎన్టీయార్` పేరుతో ఓ బ‌యోపిక్ తెర‌కెక్కుతున్న సంగ‌తి తెలిసిందే. డైరెక్ట‌ర్ క్రిష్ రూపొందిస్తున్న ఈ సినిమాలో ఎన్టీయార్‌గా నంద‌మూరి బాల‌కృష్ణ న‌టిస్తున్నారు. ఎన్టీయార్ భార్య బ‌స‌వ‌తారకం పాత్ర‌లో విద్యాబాల‌న్‌, ఏఎన్నార్ పాత్ర‌లో సుమంత్ క‌నిపించ‌నున్నారు. ఇక, ఎన్టీయార్ అల్లుడు, ఆంధ్ర‌ప్ర‌దేశ్ ప్ర‌స్తుత ముఖ్య‌మంత్రి చంద్రబాబు నాయుడి పాత్ర‌లో ద‌గ్గుబాటి రానా న‌టిస్తున్నాడు.
వినాయ‌క చ‌వితి సంద‌ర్భంగా బుధ‌వారం నాడు చంద్రబాబు పాత్ర‌లోని రానా లుక్‌ను చిత్ర‌బృందం విడుదల చేసిన సంగ‌తి తెలిసిందే. తాజాగా మరో ఆస‌క్తిక‌ర పోస్టర్ను చిత్ర‌బృందం విడుదల చేసింది. ఎన్టీయార్ పాత్ర‌లోని బాల‌య్య, చంద్రబాబు పాత్ర‌లోని రానా క‌లిసి ఉన్న పోస్టర్ను రిలీజ్ చేశారు. `ఓ మ‌హా నాయ‌కుడి పాత్ర‌లో నంద‌మూరి బాల‌కృష్ణ, ఓ విజ‌న‌రీ లీడ‌ర్ పాత్ర‌లో రానా` అంటూ విడుదల చేసిన ఈ లుక్ ప్రేక్ష‌కులను ఆక‌ట్టుకుంటోంది.