గన్నవరం ఎమ్మెల్యే వల్లభనేని వంశీ మోహన్, తాను ప్రజల మనిషిని అని మరోసారి నిరూపించారు. రోడ్డు ప్రమాదానికి గురైన వృద్ధ దంపతులను ఎమ్మెల్యే వంశీమోహన్‌ తన కారులో స్వయంగా ఎక్కించి ఆసుపత్రికి పంపించి మానవత్వాన్ని చాటుకున్నారు. కానూరుకు చెందిన తుమ్మల లక్ష్మీనరసింహ (55), శైలజ (52) దంపతులు తేలప్రోలు ఉషారామా ఇంజనీరింగ్‌ కళాశాలకు ద్విచక్ర వాహనంపై బయలు దేరారు. కేసరపల్లి సమీపంలోని వరుణ్‌ మోటార్స్‌ వద్ద మరో ద్విచక్ర వాహనం ఢీకొని రోడ్డుపై పడిపోయారు.
అదే సమయంలో విజయవాడ నుంచి మంత్రి నక్కా ఆనందబాబును తీసుకుని ముస్తాబాదలో జరిగే కార్యక్రమానికి వస్తున్న ఎమ్మెల్యే వంశీ ప్రమాదాన్ని గమనించి వెంటనే మంత్రి కాన్వాయ్‌ను ఆపించారు. మంత్రి సహా కారు దిగి గాయపడిన దంపతుల వద్దకు వచ్చారు. ఎమ్మెల్యే తన కారులో ఎక్కించి పిన్నమనేని ఆస్పత్రికి పంపారు. వారి వెంట అనుచరులను పంపి మెరుగైన వైద్యం అందించాలని చెప్పారు. డాక్టర్లతో మాట్లాడి, మెరుగైన వైద్యం అందించాలని, ఏ ఇబ్బంది ఉన్నా తనకు ఫోన్ చెయ్యమని చెప్పారు. తరువాత వారి పరిస్థితి పై ఆరా తీశారు.