వాహనాలకు సంభందించిన పత్రాలు మనతో పాటు తీసుకెళ్లడానికి ఎంతో ఇబ్బందిపడుతుంటాం. ట్రాఫిక్ పోలీసులు కూడా మన వాహనాలకు సంభందించిన పత్రాలు అన్నింటిని కూడా మన వెంట ఉంచుకోవాలని తెలిజేస్తుంటారు. కార్లు మరియు బైకుల్లో వీటిని తప్పనిసరిగా ఉంచుకోవాలి, అయితే వాటిని చాలా సందర్భాల్లో మనం ఎక్కువగా మరిచిపోతుంటాం.ఇక టూవీలర్లు వినియోగించే వారు అయితే ఎన్నో సార్లు తమ పత్రాలను తీసుకెళ్లినపుడు జాగ్రత్తగా ఉండాలి. వర్షం వచ్చినపుడు, సర్వీసింగ్ చేయించినపుడు వాహనాలకు సంభందించిన పత్రాలు తడిచిపోతుంటాయి.
ఇలాంటి కారణాల వలన ఎన్నో సార్లు జిరాక్సులు చేయించుకుంటుంటారు. ఇక మీదట బయటకు వెళ్లినప్పుడు మీవెంట తప్పకుండా డ్రైవింగ్‌ లైసెన్స్, వాహన రిజిస్ట్రేషన్ పత్రాలు, ఇన్యూరెన్స్‌ కాగితాలు తీసుకెళ్లకపోయినా ఫర్వాలేదు. ఎందుకంటే వాటిని డిజిలాకర్‌లో పెట్టుకుంటే సరిపోతుంది. ఇప్పటి వరకూ డిజిలాకర్‌లో వాహనాలకు సంబంధించి ఎటువంటి పత్రాలు చూపించినా పోలీసులు వాటిని పరిగణించలేదు. కానీ ఇప్పటి నుంచి డిజిలాకర్‌లో చూపించే ధ్రువీకరణ పత్రాలు పరిగణలోకి తీసుకోవాలంటూ కేంద్ర రవాణా మంత్రిత్వ శాఖ అన్ని రాష్ట్రాలకు, కేంద్ర పాలిత ప్రాంతాలకు నోటీసులు పంపించింది.
వాహనదారులు తమ వాహనాలకు సంబంధించిన ఏ పత్రాలనైనా డిజిలాకర్‌ యాప్‌ లేదా ఎంపరివాహన్‌ మొబైల్‌ యాప్‌లో భద్రపరుచుకోవచ్చు. ట్రాఫిక్ పోలీసులు వాహనాలను ఆపినప్పుడు ఒరిజినల్‌ ధ్రువపత్రాల స్థానంలో డిజిలాకర్‌లో ఉన్న వాటిని చూపిస్తే సరిపోతుంది. ఈ నిబంధన నేటి నుంచే అమల్లోకి వస్తుందని సదరు నోటీసుల్లో పేర్కొన్నారు. హార్‌, మధ్యప్రదేశ్‌, కర్ణాటక రాష్ట్రాల్లో తొలిసారిగా డిజిలాకర్‌లో ఉన్న పత్రాలను లీగల్‌ డాక్యుమెంట్స్‌గా పరిగణించారు. ఇప్పుడు అన్ని రాష్ట్రాలు, కేంద్రపాలిత ప్రాంతాలు కూడా డిజిలాకర్‌ లేదా ఎంపరివాహన్‌ యాప్‌లో ఉన్న డ్రైవింగ్‌ లైసెన్స్, ఇన్యూరెన్స్‌ కాగితాలు, వాహన రిజిస్ట్రేషన్ పత్రాలను అధికారికంగా ధ్రువీకరణ పత్రాలుగా గుర్తించాలని ఆదేశించింది.
ఇప్పటికే రైల్వే ప్రయాణికులకు కూడా ఈ సౌకర్యాన్ని అందుబాటులోకి తీసుకొచ్చారు. రైళ్లలో ప్రయాణించే సమయంలో ఐడీ ఫ్రూఫ్‌గా ఆధార్‌కార్డు, డ్రైవింగ్‌ లైసెన్స్‌లకు బదులుగా వాటి సాఫ్ట్‌ కాపీలు చూపిస్తే సరిపోతుందని రైల్వే శాఖ అధికారులు గతంలో ప్రకటించారు. ప్రధాని నరేంద్రమోదీ డిజిటల్ ఇండియా కార్యక్రమంలో భాగంగా ఈ డిజిలాకర్‌ను ప్రవేశపెట్టారు. ప్రధాన మంత్రి ప్రతిష్టాత్మకంగా ప్రారంభించిన డిజిటల్ ఇండియాలో మరో మైలు రాయి ఈ డిజి లాకర్. ఇప్పుడు వాహన రంగానికి చెందిన రిజిస్ట్రేషన్, లైసెన్స్, ఇన్సూరెన్స్, ఉద్గార పరీక్షలు, వంటి అనేక పత్రాలను ఇక మీదట తమ వెంట తీసుకెళ్లకుండా డిజి లాకర్‌లోభద్రత పరుచుకోవచ్చు.