జగన్ కు, మంత్రుల బహిరంగ లేఖ... మీరు అవినీతి చక్రవర్తి అనేది బహిరంగ రహస్యం. అభివృద్ధి చక్రవర్తి చంద్రబాబు నాయుడిపై మీ బురద జల్లాలని ప్రయత్నిస్తే అది మీ తిరిగి మీ ముఖంపైనే పడుతుంది. రూ.43వేల కోట్ల అవినీతిపై 12 ఛార్జి షీట్లలో ఏ-1 ముద్దాయిగా ఉంటూ కోర్టు చుట్టూ తిరుగుతున్నది వాస్తవం కాదా? సుమారు రూ.2వేల కోట్లు ఆస్తులు జప్తు అయింది వాస్తవం కాదా? లోటు బడ్జెట్‌లో ఉన్న రాష్ట్రానికి కేంద్రం సహకరించకపోయినా.. తనకున్న అనుభవంతో, తనకున్న ప్రతిష్టతో కష్టబడి ముఖ్యమంత్రి చంద్రబాబు నాయుడు రాష్ట్రాన్ని అభివృద్ధి, సంక్షేమ పథంలో అగ్రస్థానంలో నిలబెట్టారు. అవినీతిని అదుపు చేయడానికి బయోమెట్రిక్స్‌, జీపీఎస్‌, కాల్‌సెంటర్‌ ఏర్పాటు చేశారు. ''ట్రాన్స్‌పరెన్సీ ఇంటర్నేషనల్‌ ఇండియా-2018'' రిపోర్టు ప్రకారం అవినీతి తక్కువ ఉన్న మూడు రాష్ట్రాల్లో ఏపీ ఒకటిగా నిలిచింది. ఇలాంటి ప్రభుత్వాన్ని అక్రమంగా కూల్చడానికి గవర్నర్‌ కార్యాలయంలో గవర్నర్‌ను కలిసిన అనంతరం తెలుగుదేశం ఎమ్మెల్యేలు నాకు టచ్‌లో ఉన్నారు. ఈ ప్రభుత్వాన్ని కూలుస్తానని గవర్నర్‌ కార్యాలయం ఎదుటే ప్రకటించడం దుర్మార్గం కాదా. నీ దుర్మార్గాన్ని, దుష్ట రాజకీయాలను భరించలేక.. రాష్ట్రాభివృద్ధి కోసం, నియోజకవర్గాల అభివృద్ధి కోసం మీ వద్ద నుంచి 23 మంది బయటపడ్డాం. అమ్ముడుపోయే అలవాటు జగన్మోహన్‌ రెడ్డిగా మీకుందిగానీ.. మాకు లేదు. మీరు ఆనాడు బెయిల్‌ కోసం సోనియా గాంధీకి అమ్ముడు పోయారు. ఈ రోజు కాంట్రాక్టుల కోసం కేసీఆర్‌కు అమ్ముడు పోయారు. కేసుల మాఫీ కోసం మోడీకి అమ్ముడు పోయారు. ఇక నుంచైనా మాపై నిందలు మోపడం మానుకోవాలి. ప్రభుత్వానికి వ్యతిరేకంగా కుట్రలు చేయాలనే ఆలోచనలు విడనాడాలి.
ఈ కింది ప్రశ్నలకు సమాధానం చెప్పాలి... 1. వేల కోట్ల అక్రమార్జనతో జైలు పాలైన మీరు.. మీ కేసుల నుంచి బయటపడడానికే అవినీతి సొమ్ముతో పార్టీ స్థాపించారు. మీ నేరాలను ప్రశ్నించే అధికారులపైన, వ్యవస్థలపైన, ప్రత్యర్థులపైన ఎదురుదాడి కోసం అవినీతి పెట్టుబడులతో సాక్షి పత్రిక, ఛానల్‌ పెట్టడం వాస్తవం కాదా.? 2. ఇంత తక్కువ వ్యవధిలో అన్ని వేల కోట్ల ఆస్తులు ఎలా వచ్చాయని సుప్రీంకోర్టు, మీ అవినీతికి ప్రాథమిక ఆధారాలు ఉన్నాయి. అక్రమాలను చూస్తూ ఊరుకోలేం. ఆర్థిక నేరాలు ఉగ్రవాదం కంటే ప్రమాదకరమని హైకోర్టు వ్యాఖ్యానించి మీ అవినీతిని బట్టబయలు చేయలేదా.? 3. ''జగన్ ఓ సైకో. ఓ రోబో. మానవత్వం, జాలి కరుణ లాంటివేమీ లేవు'' అని మిమ్మల్ని దగ్గర నుంచి చూసిన మాజీ పార్లమెంటు సభ్యుడు సబ్బం హరి పేర్కొనడం వాస్తవం కాదా.? 4. నీ సోదరి షర్మిలను ఇంటర్య్వూ చేసిన సాక్షి ప్రతినిధిని ఉద్యోగం నుంచి తొలగించి నీ సైకోయిజాన్ని ప్రదర్శించడం నిజం కాదా.? 5. డిప్యూటీ ఫ్లోర్‌ లీడర్‌ జ్యోతుల నెహ్రూను మీ ప్రక్క సీటులో కూర్చోవద్దని శాసించి సీనియర్‌ నాయకుడన్న గౌరవం కూడా లేకుండా అవమానించడం మీ సైకో తనానికి నిదర్శనం. 6. కళ్లజోడు, జీన్స్‌ వేసుకుని నా దగ్గరకు వస్తావా అని సినీ నటుడు రాజశేఖర్‌ను అవమానించి పంపించడం వాస్తవం కాదా.? సార్‌ అని పిలిస్తేనే పార్టీలో ఉండాలని సీనియర్‌ నాయకుడు దాడి వీరభద్రరావును అవమానపరిచారు. 7. మీ రాజకీయ అరంగేట్రం కోసం మీ ఒత్తిడి భరించలేక చిన్నాన్న వివేకానందరెడ్డి రాజీనామా చేయడం వాస్తవం కాదా.? జగన్ పోరు పడలేకపోతున్నానని విజయమ్మ రోశయ్య వద్ద వాపోయిన మాట వాస్తవం కాదా.? 8. భూ ఆక్రమణలు, రౌడీయిజంతో వైసీపీ కార్యాలయం నిండిపోయిందని, ఫ్యాక్షనిస్టుల అడ్డాగా వైసీపీ మారిందని స్వయానా మీ చిన్నాన్న వైఎస్‌ వివేకానంద పేర్కొనడం నిజం కాదా.? 9. వైఎస్‌ మృతి వెనుక ''జగన్'' హస్తం ఉంది అని వ్యాఖ్యానించిన బొత్సను, బహిరంగ సభలో మీ అక్రమాస్తుల చిట్టా విప్పిన ధర్మానను అక్కున చేర్చుకున్న మీకు విలువలెక్కడ.? 10. తండ్రి శవం ఇంటికి చేరకముందే సీఎంను చేసేందుకు మద్దతివ్వాలని కోరారని, అందుకు నేనే ప్రత్యక్ష సాక్షినని నాటి కేంద్ర మంత్రి, సినీ నటుడు చిరంజీవి చెప్పడం నిజం కాదా.? 11. ఎమ్మెల్యేలను సంతలో పశువులను కొన్నట్లు కొన్నారని అంటున్నావు. కానీ.. మీ దగ్గర నుంచి బయటపడిన మేము కసాయి దగ్గర నుంచి విముక్తి లభించిందని బహాటంగానే చెబుతున్నామంటే మీ నిరంకుశత్వం ఎలా ఉండేదో అర్ధం చేసుకోండి. 12. గవర్నర్‌ బంగ్లాలో కేసీఆర్‌, గవర్నర్‌ నరసింహన్‌తో సమావేశమైన తర్వాత 21మంది ఎమ్మెల్యేలు టచ్‌లో ఉన్నారని, ప్రభుత్వాన్ని కూలగొడతానని ప్రకటించటం నీ అధికార దాహానికి, కుట్ర రాజకీయాలకు నిదర్శనం కాదా.?
13. ఇలాంటి వ్యక్తి ముఖ్యమంత్రి అయితే రాష్ట్రం నాశనమవుతుందని భావించే మేమంతా బయటపడ్డాం. అందుకు నీ సైకో ప్రవర్తన ప్రధాన కారణం కాదా.? 14. 2011 జులై18న కర్నూలు జిల్లా కృష్ణగిరి మండలం, అమకతాడులో గోపాల్‌ అనే వ్యక్తి కుటుంబాన్ని ఓదార్చేందుకు వెళ్లగా.. నా భర్త అనారోగ్యంతోనే చనిపోయాడు మీ ఓదార్పు మాకొద్దని మృతుడి భార్య సావిత్రమ్మ చెప్పడంతో నీ ఓదార్పు యాత్ర షెడ్యూల్‌ మార్చుకున్న మాట వాస్తవం కాదా.? దీని బట్టి సాధారణ మరణాలను కూడా సానుభూతికోసం వాడుకుంటారా.? 15. మీ షెల్‌ కంపెనీల్లో పెట్టుబడులు పెట్టిన వారికి గనుల శాఖ మంత్రిపై దారుణమైన ఒత్తిడి తెచ్చి ఐఏఎస్‌ అధికారిణి శ్రీలక్ష్మి జైలు పాలవ్వడానికి మీరు కారణం కాదా.? 16. ఈడీ దాఖలు చేసిన ఛార్జి షీట్లు, ఆస్తుల జప్తు మీ అక్రమార్జనకు, అవినీతికి రుజువులు. అయినా ఆ నడమంత్రపు సిరి మొత్తం సక్రమమేనని చెప్పుకోవడం దుర్మార్గం కాదా.? డబ్బుపై వ్యామోహం లేదంటున్న నీవు రూ.43వేల కోట్ల అక్రమ సంపాదనను ప్రజలకు పంచగలవా.? 17. డబ్బులు ఇవ్వలేదని సత్యం రామలింగరాజుపై దాడికి పాల్పడ్డారు. పరిటాల రవీంద్ర హత్యకు కుట్ర చేసిన పులివెందుల కృష్ణ మీ ప్రధాన అనుచరుడు. పులివెందుల కృష్ణతో కలిసి కడపలో పోలీస్‌స్టేషన్‌పై మీరు దాడికి పాల్పడ్డారు. మీపై కేసు నమోదైనందుకు ఆర్టీ బస్టాండ్‌ వద్ద పులివెందుల కృష్ణ ధర్నా చేయడం మీ రౌడీయిజానికి నిదర్శనం కాదా.? 18. పరిటాల రవి హత్య కేసు నుంచి వైయస్‌ జగన్మోహన్‌రెడ్డిని కాపాడడానికి 60 రోజులు కష్టపడ్డానని మీ కుటుంబానికి అత్యంత సన్నిహితుడైన కిరణ్‌కుమార్‌రెడ్డి పేర్కొనడం మీ దుర్మార్గానికి, నిరంకుశత్వ, ఫ్యాక్షన్‌ రాజకీయాలకు నిదర్శనం కాదా.? 19. నలుగురు కుటుంబ సభ్యులుండే మీకు బెంగళూరులో 30 ఎకరాల భారీ కోట, పులివెందులలో ప్యాలెస్‌, హైదరాబాద్‌లో రాజమహల్‌ ఎక్కడి నుంచి వచ్చాయి. అమరావతి రాజధాని ప్రాంతంలో ఐదెకరాల్లో భారీ నివాస భవనం నిర్మిస్తున్న మాట వాస్తవం కాదా.? 20. ఎన్నికల అఫిడవిట్లో ఇళ్లు, వాహనాలు అసలు నాకు లేవంటూ పేర్కొనడం వాస్తవం కాదా.? విదేశాల నుంచి దిగుమతి చేసుకున్న అత్యంత ఖరీదైన బీఎండబ్ల్యు ఎక్స్‌ 5, కారు నెం.ఏపీ 09, బిఎన్‌2345, స్కార్పియో వాహన్‌ ఎపి 09, బివి 1229 మీరుపేరుపై లేవా? 21. అసెంబ్లీకి వచ్చి ప్రజా సమస్యలు పరిష్కరించాల్సింది పోయి రోడ్లపై తిరుగుతూ లక్షలాది రూపాయల జీతాలు తీసుకోవడం ప్రజా ద్రోహం కాదా.? 22. 13 జిల్లాల్లో పాదయాత్ర చేసిన నీవు.. కనీసం ఒక్కసారైనా నరేంద్ర మోడీ రాష్ట్రానికి చేసిన ద్రోహం గురించి మాట్లాడావా.? ముగింపు సభలో గంట పాటు మాట్లాడినా విభజన హామీలపై మోడీని ఎందుకు నిలదీయలేకపోయావ్‌.? 23. జయప్రకాశ్‌ నారాయణ, పద్మనాభయ్యతో కూడిన జేఎఫ్‌సీ ఏపీకి రూ.75వేల కోట్లు రావాలని నిర్ణయిస్తే.. పాదయాత్ర మొత్తంలో ఏనాడూ ప్రస్తావించకపోవడానికి కారణమేంటి.? నీ పాదయాత్రలో ఎన్ని సమస్యలను ప్రభుత్వం దృష్టికి తీసుకెళ్లావ్‌.? ఎన్ని సమస్యలను పరిష్కరించావ్‌.? అమరావతి నిర్మాణానికి అడ్డుతగిలావ్, పోలవరం విషయంలో పక్కరాష్ట్రాలతో కుమ్మక్కై కేసులు వేయాలని చూశావ్, పారిశ్రామిక సదస్సు సమయంలో రాష్ట్రంలో రాద్దాంతం సృష్టించావ్, ఆక్వా, కడప ఉక్కు పరిశ్రమను రాష్ట్ర ప్రభుత్వం ప్రతిష్టాత్మకంగా ఏర్పాటు చేస్తే దానిపైనా విమర్శలు చేశావ్. రాష్ట్రానికి రావాల్సిన వాటి విషయంలో పెగలని మీ నోరు.. అభివృద్ధిపై విమర్శలు చేయడంపై మాత్రమే పెగులుతోంది. ప్రతి పనిని అడ్డుకునేందుకు ప్రయత్నించావే తప్ప.. ఏనాడైనా రాష్ట్ర అభివృద్ధి కోసం ఆలోచించావా? అనునిత్యం రాష్ట్ర అభివృద్ధిని అడ్డుకోవడమే ధ్యేయంగా పని చేస్తూ అభివృద్ధి నిరోధకుడిగా మారావు.