రాష్ట్రంలో పర్యాటకరంగ అభివృద్ధికి వున్న ఏ ఒక్క అవకాశాన్ని వదులుకోకుండా వినూత్న ప్రాజెక్టులతో ముందుకురావాలని ముఖ్యమంత్రి నారా చంద్రబాబు నాయుడు అధికారులకు సూచించారు. దేశంలో ఏ రాష్ట్రంలోనూ లేనట్టు ఏపీని పర్యాటకులకు స్వర్గధామంగా తీర్చిదిద్దాలని చెప్పారు. గురువారం తన కార్యాలయంలో జరిపిన ఆంధ్రప్రదేశ్ టూరిజం, కల్చర్, హెరిటేజ్ బోర్డు సమావేశంలో పర్యాటకరంగ అభివృద్ధికి తీసుకోవాల్సిన చర్యలపై పర్యాటక శాఖ మంత్రి భూమా అఖిల ప్రియతో కలిసి అధికారులతో చర్చించారు. విజయవాడలో కళాక్షేత్రం ఆడిటోరియం, పవిత్ర సంగమం దగ్గర గ్రాండ్ థియేటర్ నిర్మాణం, అనంతపురం జిల్లాలో ఎఫ్ 3 రేస్ సర్క్యూట్ ఏర్పాటు, కొండపల్లి కోట – రాజమహేంద్రవరంలో హావలాక్ బ్రిడ్జి అభివృద్ధిపై అధికారులకు పలు సూచనలు చేశారు.
పర్యాటక శాఖ కోసం ఆరు కొత్త లోగోలను అధికారులు ముందుంచగా ముఖ్యమంత్రి వాటిని పరిశీలించి ఆంధ్రప్రదేశ్ పర్యాటకరంగానికి మరింత ప్రాచుర్యాన్ని కల్పించేలా, మన సంస్కృతిని ప్రతిబింబించేలా లోగో, ట్యాగ్‌లైన్ రూపొందించాలని చెప్పారు.
కొండపల్లి కోటకు సొబగులు
చారిత్రక ప్రాధాన్యత వున్న కొండపల్లి కోటను తీర్చిదిద్దడంలో భాగంగా కొండపల్లి ఎకో మ్యూజియం, ఎగ్జిబిషన్ ఏర్పాటు చేయాలని రాష్ట్ర ప్రభుత్వం భావిస్తోంది. రెడ్డిరాజులు, కుతుబ్‌షాహీల కాలం నాటి వైభవాన్ని కోటకు తిరిగి తీసుకురావాలని ప్రయత్నిస్తోంది. ప్రధానంగా ఎనిమిది ఎకరాల్లో విస్తరించి వున్న కోటను, పరిసరాలను సుందరంగా మలచనుంది. కొండపల్లి బొమ్మలకు సైతం ప్రాచుర్యం తీసుకువచ్చేందుకు పర్యాటక శాఖ చర్యలు చేపట్టనుంది. కొండపల్లి ఖిల్లా వున్న సుమారు 400 ఎకరాల అటవీ భూమిని అవసరమైతే డీనోటిఫై చేసి అభివృద్ధి పరిచేందుకు వున్న అవకాశాలను పరిశీలించాలని ముఖ్యమంత్రి అధికారులకు సూచించారు. కొండపల్లి కోట సహజత్వం చెక్కుచెదరకుండా వచ్చే ఏడాది మార్చి నాటికి అభివృద్ధి పనులు పూర్తి చేయాలని చెప్పారు.
చిత్తూరు జిల్లాలోని కంగుండి, గుంటూరు జిల్లాలోని కొండవీడు, బెల్లంకొండ, అనంతపురం జిల్లాలోని కుందుర్పి కోటలతో సహా అన్ని జిల్లాల్లోని కోటలను అభివృద్ధి చేయాల్సిన అవసరం వుందని అధికారులు ముఖ్యమంత్రి దృష్టికి తెచ్చారు. వీటికి ఒక్కోదానికి రూ. 2 కోట్ల నుంచి రూ. 7 కోట్ల వరకు వ్యయమవుతుందని వెల్లడించారు.
అత్యాధునికంగా కళాక్షేత్ర ఆడిటోరియం
విజయవాడలోని జీవీఆర్ ప్రభుత్వ సంగీత, నృత్య కళాశాలలోని 3.06 ఎకరాల విస్తీర్ణంలో ‘కళాక్షేత్ర ఆడిటోరియం’ త్వరలో నిర్మితం కానుంది. వందలాది మంది ప్రేక్షకులు ఒకేచోట ప్రదర్శనలు వీక్షించేందుకు వీలుకలగనుంది. ప్రస్తుతం వున్న ఆడిటోరియం స్థానంలో దీనిని నూతనంగా, అత్యాధునికంగా నిర్మిస్తారు. మినీ కాన్ఫరెన్స్ హాళ్లు, మీటింగ్ రూములు, విశాలమైన పార్కింగ్ ఇందులో వుంటాయి.
పవిత్రసంగమం దగ్గర గ్రాండ్ థియేటర్
ఇబ్రహీంపట్నంలోని పవిత్రసంగమం దగ్గర నదీముఖంగా అంతర్జాతీయ స్థాయిలో గ్రాండ్ థియేటర్ కొలువు దీరేలా ప్రణాళికలు సిద్ధం చేయాలని ముఖ్యమంత్రి అధికారులకు సూచించారు.
హావలాక్ బ్రిడ్జి అభివృద్ధికి చర్యలు
100 ఏళ్ల నాటి రాజమహేంద్రవరం-కొవ్వూరు రైల్వే వంతెనను పర్యాటకరంగ అభివృద్ధి కోసం వినియోగించుకునేందుకు రాష్ట్ర ప్రభుత్వానికి అప్పగించాలని రైల్వే శాఖ నిర్ణయించిందని, ఇందుకోసం రూ. 12.50 కోట్లతో పాటు 1,044 చ.మీ. భూమిని ప్రత్యామ్నాయంగా రైల్వేశాఖకు చెల్లించేందుకు అంగీకారం కుదిరినట్టు ముఖ్యమంత్రికి అధికారులు తెలిపారు. పాదచారులకు, సైకిలిస్టులకు, చిరు వ్యాపారులకు ఇది ప్రయోజనకారి కానుందని, పర్యాటకులను పెద్దసంఖ్యలతో ఆకట్టుకునేందుకు దోహదపడుతుందని చెప్పారు. ఈ వంతెనను పీపీపీ పద్ధతిలో అభివృద్ధి చేయాలని ముఖ్యమంత్రి స్పష్టం చేశారు.
