news

మాజీ మంత్రి, సీనియర్ నేత అయిన వివేక కేసుకి సంబంధించి, సిబిఐ మొదటి అరెస్ట్ చూపించింది. వివేక కేసులో కీలకమైన వ్యక్తి అంటూ సిబిఐ చెప్తున్న సునీల్ యాదవ్ ని, నిన్న సిబిఐ గోవాలో అరెస్ట్ చేసింది. సునీల్ యాదవ్ ప్రధాన నిందితుడు అంటూ సిబిఐ అనుమానిస్తున్న తరుణంలో ఆయన గత కొంత కాలంగా తప్పించుకుని తిరుగుతున్నాడు. అంతే కాకుండా, సిబిఐ తన వెంట పడుతుంది, తన పై థర్డ్ డిగ్రీ ప్రయోగిస్తుంది అంటూ, తనను కాపాడాలి అంటూ, ఆయన ఏపి హైకోర్టులో కూడా పిటీషన్ దాఖలు చేసారు. అయితే ఈ పిటీషన్ వేసిన సందర్భంలోనే, సునీల్ యాదవ్ తన ఇంటికి తాళం వేసి, పారిపోవటం జరిగింది. ఈ నేపధ్యంలోనే సిబిఐ అధికారులు సునీల్ యాదవ్ కోసం, ప్రత్యెక బృందాలను పంపి మరీ గాలింపులు చేసారు. ప్రత్యేక నిఘా పెట్టటంతో, సునీల్ యాదవ్ గోవాలో తలదాచుకున్నట్టు సిబిఐకి సమాచారం రావటంతో, సిబిఐ అధికారులు గోవాకు వెళ్లి వారిని అక్కడ అరెస్ట్ చేసారు. అయితే అరెస్ట్ చేసిన తరువాత, కోర్టులో అరెస్ట్ చూపించాల్సిన అవసరం ఉంటుంది. ఈ నేపధ్యంలోనే సునీల్ యాదవ్ ని గోవా కోర్టులో హాజరు పరిచారు. ఈ రోజు సిబిఐ అధికారులు ఈ విషయాన్నీ ధృవీకరించారు. ఈ రోజు ఆయన్ను కోర్టులో హాజరు పరిచిన తరువాత, రిమాండ్ తీసుకుని, కడపకు తరలిస్తున్నారు.

రేపు ఉదయం ఆయన్ను కడపలో, ఆయన్ను కోర్టులో హాజరుపరిచి, మళ్ళీ రిమాండ్ కు పంపించి, సిబిఐ కస్టడీకి ఇవ్వమని కోర్టును అడిగే అవకాసం ఉంది. వివేక కేసులో సిబిఐ దర్యాప్తు వేగవంతం చేసింది. ఇప్పటికే అక్కడ ఉన్న వాచ్మెన్ రంగయ్య నుంచి వాంగ్మూలం తీసుకుని, ఆయన స్టేట్మెంట్ ను జడ్జి ముందు కూడా వినిపించారు. రంగయ్య ఇచ్చిన వాంగ్మూలం తరువాతే, ఈ ప్రక్రియ వేగవంతం అయ్యింది. ఈ దొంక అంతా కదిలింది. ఇంతకు సుపారీ మాట్లాడుకున్నారు, ఎంత మంది ఉన్నారు, ఇలా పూర్తి వివరాలు చెప్పాడు. అయితే ఇద్దరు ప్రముఖులు ఉన్నారని రంగయ్య చెప్పటం, ఆ ప్రముఖులు ఎవరు అనే విషయం మాత్రం ఇప్పటి వరకు తెలియలేదు. ఈ విచారణ ఇలా ఉంటే, అసలు విచారణ పై మాత్రం, అనుమానాలు వ్యక్తం చేస్తున్న వారు కూడా ఉన్నారు. వివేక కుమార్తె సునీత ఇచ్చిన అనుమాతిల్లోని ప్రముఖులను ఇప్పటి వరకు సిబిఐ విచారణ చేయక పోవటం పై, అందరినీ ఆశ్చర్యాన్ని కలిగిస్తుంది. ప్రముఖులను కూడా విచారణ చేయాలని, అప్పుడే అసలైన నిజాలు బయటకు వస్తాయని అంటున్నారు.

అధికారంలోకి వచ్చిన దగ్గర నుంచి , తన పై వ్యక్తిగతంగా కక్ష కట్టి, నిరాధారమైన ఆరోపణలు చేసి, తనని సస్పెండ్ చేసిన వారి పై, తన పై కుట్రలు పన్నిన వారి పై, సీనియర్ ఐపీఎస్ అధికారి ఏబీ వెంకటేశ్వరరావు సీరియస్ అయ్యారు. ఎక్కడ నుంచి తన పై కక్ష కట్టారో, అక్కడ నుంచే ఇప్పుడు మళ్ళీ మొదలు పెట్టారు. 2019 ఎన్నికల ముందు తన పై విజయసాయి రెడ్డి చేసిన ఆరోపణలు దగ్గర నుంచి సీనియర్ ఐపీఎస్ అధికారి ఏబీ వెంకటేశ్వరరావు పని మొదలు పెట్టారు. జూన్ 19న ఎంపీ విజయసాయి రెడ్డికి, ఐపీఎస్ అధికారి ఏబీ వెంకటేశ్వరరావు లీగల్ నోటీసులు పంపించారు. 2019 ఎన్నికల ముందు, తన పై తప్పుడు ఫిర్యాదులు చేసారు అంటూ ఏబీ వెంకటేశ్వరరావు లీగల్ నోటీసులు పంపించారు. ఎన్నికల ముందు ఇంటెలిజెన్స్ చీఫ్ గా ఉన్న సమయంలో, తన పై అప్పటి ఎన్నికల కమిషన్ కు తప్పుడు ఫిర్యాదు ఇచ్చారు అనేది ఏబీ వెంకటేశ్వరరావు ఆరోపణ. ఎన్నికల ముందు శ్రీకాకుళం జిల్లా నేత ఒకరు, 50 కోట్ల రూపాయలు కారులో తరలిస్తూ ఉండగా, పోలీసులు పట్టుకుంటే, ఏబివి ఫోన్ చేసి, వారిని వదిలేయమని చెప్పారు అంటూ, విజయసాయి రెడ్డి మీడియాతో చెప్పారని, అది తప్పుడు ఆరోపణలు అని, విజయసాయి రెడ్డి చెప్పిన దానిలో ఎలాంటి వాస్తవం లేదని, అప్పట్లోనే శ్రీకాకుళం ఎస్పీగా పని చేసిన ఆఫీసర్ దాన్ని ఖండించినట్టు చెప్పారు.

అయితే ఇదే విషయాన్ని కావాలని పదే పదే సాక్షిలో వేస్తూ, తన పరువుకు భంగం కలిగించారు అంటూ, విజయసాయితో పాటుగా, అప్పటి జగతి పబ్లికేషన్స్ ఎండి సజ్జల రామకృష్ణారెడ్డి, సాక్షి దినపత్రిక, సాక్షి ఛానెల్., అప్పటి సాక్షి పత్రిక సంపాదకులు శ్రీ రామచంద్రమూర్తి, సాక్షి ఛానెల్ ఎడిటర్ శ్రీ వి మురళిలను కూడా ఈ పరువు నష్టం దావాలో ప్రతివదులుగా చేర్చారు. తన పరువుకి నష్టం కలిగించే విధంగా వ్యాఖ్యలు చేసి, వాటిని వార్తలుగా ప్రచురించినందుకు, ఆరుగురికి పరువునష్టం నోటీసులు పంపారు ఏబీ వెంకటేశ్వరరావు. భేషరతుగా క్షమాపణ చెప్పాలని, లేదా లీగల్ గా ముందుకు వెళ్తానని చెప్పారు. అయితే ఈ కేసుతో మొదలు పెట్టి, అనేక కేసులు పై ఉక్కిరిబిక్కిరి చేయటానికి రెడీ అయ్యారు. ఇందులో విశేషం ఏమిటి అంటే, ఈ నోటీస్ పంపి పది రోజులు కూడా అవ్వక ముందే, ఆయన్ను ఏకంగా డిస్మిస్ చేయాలని కేంద్రానికి లేఖ రాసింది జగన్ ప్రభుత్వం. ఇది ఇంకా ఎన్ని మలుపులు తిరుగుతుందో చూడాలి.

ఎంపీ రఘురామరాజుకి, వైసీపీ నుంచి కష్టాలు ఎదురు అవుతూనే ఉన్నాయి. సొంత పార్టీని కొన్ని విషయాల్లో కరెక్ట్ చేసుకోమని చెప్పినందుకు, ఆయన్ను టార్గెట్ చేస్తూనే ఉన్నారు. ఈ రోజు పార్లమెంట్ ఆవరణలో ఎంపీ రఘురామరాజుని టార్గెట్ చేసారు, మరో వైసీపీ ఎంపీ గోరంట్ల మాధవ్. తనను అసభ్య పదజాలంతో గోరంట్ల మాధవ్ దూషించారు అంటూ రఘురామకృష్ణం రాజు ఆరోపించారు. పార్లమెంట్ ఆవరణలోనే అసభ్య పదజాలంతో దూషించటంతో, ఎంపీ రఘురామకృష్ణం రాజు, స్పీకర్ ఓం బిర్లాకు ఫిర్యాదు చేసారు. ఎంపీ రఘురామకృష్ణం రాజు తెలిపిన వివరాలు మేరకు, పార్లమెంట్ వాయిదా పడిన అనంతరం, పార్లమెంట్ సెంట్రల్ హాల్ లో, మరి కొంత మంది ఇతర రాష్ట్రాల ఎంపీలతో కూర్చుని ఉండగా, తన వద్దకు ఎంపీ గోరంట్ల మాధవ్ వచ్చి, ఎందుకు జగన్ కు వ్యతిరేకంగా ప్రెస్ మీట్లు పెడుతున్నావ్, ఇంకోసారి జగన్ కు వ్యతిరేకంగా ప్రెస్ మీట్లు పెడితే మీ అంతు చూస్తాం, వెంటనే ఇలాంటి ప్రెస్ మీట్లు ఆపేయాలి అంటూ, వేలు పెట్టి గోరంట్ల మాధవ్ హెచ్చరించారని తెలిపారు. రాయటానికి, చెప్పటానికి వీలు లేని పదాలు గోరంట్ల మాధవ్ ఉపయోగించారని, పార్లమెంట్ లాంటి పవిత్రమైన చోట, ఒక ప్రజాప్రతినిధి అయ్యి ఉంది, మరో ఎంపీని ఇష్టం వచ్చినట్టు, బూతులతో దూషించటంపై, ఇతర పార్టీ నేతలు కూడా షాక్ అయ్యారు.

అయితే ఆ సమయంలో రఘురామకృష్ణం రాజు ఎక్కడా రెచ్చిపోకుండా ఎంతో సమన్వయంతో వ్యవహరించి, ఆయనతో ఏమి మాట్లాడకుండా అక్కడ నుంచి వెళ్ళిపోవటంతో, పెద్ద గొడవ తప్పినట్టు అయ్యిందని తెలుస్తుంది. అయితే ఆ సమయంలో, గోరంట్ల మాధవ్, రఘురామకృష్ణం రాజుని హెచ్చరించే సమయంలో, ఆయన పక్కనే ఉన్న, ఇతర రాష్ట్రాల, పార్టీల ఎంపీలు అందరినీ కూడా తీసుకుని వెళ్లి, వెంటనే అక్కడికక్కడే, లోకసభ స్పీకర్ ఓం బిర్లాకు రఘురామకృష్ణం రాజు ఫిర్యాదు చేసారు. గోరంట్ల మాధవ్ తనని పార్లమెంట్ ఆవరణలో బెదిరించారని, అంతం చూస్తానని బెదిరించారని, దీనికి సహచర ఎంపీలే సాక్ష్యం అని కూడా ఆయన స్పీకర్ కు ఫిర్యాదు చేసారు. అంతే కాకుండా, అక్కడ సిసి కెమెరాలు కూడా ఉంటాయి కాబట్టి, అక్కడ వీడియో ఫుటేజ్ కూడా చూస్తే, మాటలు వినిపించకపోయినా వీడియోలో గోరంట్ల మాధవ్ హావభావాలు స్పష్టంగా తనని బెదిరించినట్టు కనిపిస్తాయని ఫిర్యాదు చేసారు. మరి దీని పై స్పీకర్ ఏమి నిర్ణయం తీసుకుంటారో చూడాలి.