news

నవ్యాంధ్ర ప్రయాణం 2014లో ఎలా మొదలైందో అందరికీ తెలుసు. రాజధాని కూడా లేని రాష్ట్రంగా మనలని రోడ్డున పడేసారు. హేళన చేసారు, తక్కువ చేసారు. ఆ కసిలో నుంచి నవ్యాంధ్ర ప్రయాణం మొదలైంది. రాజధాని కట్టుకోవటానికి చేతిలో పైసా లేదు. సంక్షోభాన్ని, అవకాశంగా మలుచుకునే అప్పటి ముఖ్యమంత్రి నారా చంద్రబాబు నాయుడు ఆలోచన, ఈ సమస్యను అధిగమించింది. రాష్ట్రానికి మధ్యలో, అన్ని వసతులు, వనరులు ఉన్న అమరావతి ప్రాంతాన్ని రాజాధానిగా ఎంపిక చేసారు. అక్కడ రైతులను ఒప్పించి, భూసేకరణ పధ్ధతిలో, రూపాయి ఖర్చు లేకుండా 33 వేల ఎకరాలు సమీకరించారు. అప్పట్లోనే కాదు, ఇప్పటికీ ఇది ఒక రికార్డు. ఒక్క సెంటు స్థలం కూడా ప్రభుత్వాలు, నిరసనలు లేకుండా ప్రజల నుంచి తీసుకోలేవు. అలాంటిది 33 వేల ఎకరాలు ప్రజల నుంచి చంద్రబాబు సమీకరించారు. అనుకున్నట్టే పనులు జరిగాయి. అక్కడ నుంచి పరిపాలన కూడా ప్రారంభం అయ్యింది. ఈ లోపు ప్రభుత్వం మారింది. చంద్రబాబు స్థానంలో, జగన్ మోహన్ రెడ్డి వచ్చారు. మొదటి నుంచి అమరావతి పై ఉన్న ద్వేషం, అధికారంలోకి వచ్చిన తరువాత ఎక్కువ అయ్యింది. నిర్మాణాలు ఆగిపోయాయి. ఏదో ఒక రోజు నిర్మాణాలు మొదలవుతాయి అనే ఆశలో ఉన్న రైతులకు, షాక్ ఇస్తూ, దేశంలో ఎక్కడ లేని, మూడు రాజధానుల ఫార్ములా తీసుకుని వచ్చారు.

అమరావతిలో కేవలం అసెంబ్లీ ఉంటుందని చెప్పారు. అప్పటి నుంచి అమరావతి రైతులు, ప్రభుత్వం పై పోరాటం మొదలు పెట్టారు. ఇప్పటికే 450 రోజులకు పైగా నిరసనలు కొనసాగుతున్నాయి. ఇదే విధంగా న్యాయ పోరాటం కూడా రైతులు చేస్తున్నారు. దాదాపుగా 60కు పైగా పిటీషన్లు ఆంధ్రప్రదేశ్ హైకోర్టులో పడ్డాయి. అయితే అప్పటి చీఫ్ జస్టిస్ జేకే మహేశ్వరి నేతృత్వంలో, ఈ కేసులు చాలా వేగంగా ముందుకు వెళ్ళాయి. సంక్రాంతి తరువాత, తీర్పు వస్తుందని అందరూ భావించిన సమయంలో, ఆయన ట్రాన్స్ఫర్ అయ్యారు. ఈ నేపధ్యంలో, కొత్త చీఫ్ జస్టిస్ ఏకే గోస్వామి వచ్చిన తరువాత, అమరావతి కేసు పై ఎలా ముందుకు వెళ్తారు అనే సస్పెన్స్ నెలకొంది. ఈ నేపధ్యంలోనే, అమరావతి కేసుల్లో కీలక పరిణామం చోటు చేసుకుంది. అమరావతి కేసులకు సంబంధించి, ఈ కేసులు వాదించటానికి, కొత్త బెంచ్ ఏర్పాటు అయ్యింది. జస్టిస్‌ ఏకే గోస్వామి, జస్టిస్‌ జోయ్‌ మల్య బాగ్చీ, జస్టిస్‌ ఎన్‌.జయసూర్యతో త్రిసభ్య ధర్మాసనం ఏర్పాటు అయ్యింది. అమరావతి కేసులు మళ్ళీ ఈ నెల 26 నుంచి విచారణ ప్రారంభం అవుతాయి. అయితే విచారణ కొనసాగిస్తారా, లేదా మళ్ళీ మొదటి నుంచి వాదనలు వింటారా అనే టెన్షన్ నెలకొంది. మరి ఏ నిర్ణయం తీసుకుంటారో చూడాలి.

రాజధాని అమరావతిలో దళితుల అసైన్డ్ భూముల వ్యవహారానికి సంబంధించి ప్రతిపక్ష నేత చంద్రబాబునాయుడు, మాజీ మంత్రి పి నారాయణ ప్రమేయం ఉన్నట్టు సిఐడి ఎలాంటి ఆధారాలు చూపకపోవటంతో, నాలుగు వారాల పాటు ప్రాసిక్యూట్ చేయరాదంటూ హైకోర్టు సింగిల్ జడ్జి ఇచ్చిన తీర్పుపై ధర్మాసనం లేదా సుప్రీం కోర్టుకు అప్పీలకు వెళ్లే యోచనలో సీఐడీ అధికారులు ఉన్నారు. అసైన్ భూములకు సంబంధించి కేసు పెట్టిన సీఐడీ ఇందులో భాగంగా తమ వద్ద ఉన్న ఆధారాలతో ఈ నెల 23న విచారణకు రావాల్సిందిగా చంద్రబాబుకు ఇటీవలే నోటీసులు అందజేసింది. దీన్ని సవాల్ చేస్తూ చంద్రబాబు, మాజీ మంత్రి నారాయణ హైకోర్టులో క్వాష్ పిటిషన్ దాఖలు చేశారు. హైకోర్టు నాలుగు వారాల పాటు స్టే మంజూరు చేయటం వల్ల ఇబ్బందికర పరిస్థితులు తలెత్తుతాయని, సాక్షాలు తారుమారయ్యే అవకాశాలు ఉన్నాయనే వాదనతో హైకోర్టు డివిజన్ బెంచ్ లేదా సుప్రీం కోర్టులో అప్పీల్ పిటిషన్ వేసేందుకు సీఐడీ సన్నాహాలు చేస్తున్నట్లు సమాచారం. అసైన్ భూములు కొనుగోళ్లు చేసిన కొందరు వ్యక్తులు అప్పటి ప్ర భుత్వ పెద్దలకు సన్నిహితులుగా ఉన్నారని అవే భూములను ల్యాండ్ పూలింగ్ కింద సమీకరించి ప్రత్యామ్నాయంగా నివాస, వాణిజ్య స్థలాలను కేటాయించారనేది సీఐడీ ఆరోపణ. ఇందులో భాగంగానే జీవో 41 జారీ చేశారనేది ప్రభుత్వ వాదన. చంద్రబాబుపై నాన్ బెయిలబుల్ అరెస్ట్ వారెంట్ కేసుగా ఎస్సీ, ఎస్టీ అట్రాసిటీ చట్టం కిందకూడా సీఐడీ పోలీసులు కేసులు నమోదు చేశారు.

అయితే కోర్టు ఆధారాలు అడగగా, ఇప్పటిప్పుడు ఏమి ఆధారాలు లేవని, విచారణకు అనుమితి ఇస్తే, అప్పుడు ఇస్తాం అని సిఐడి చెప్పింది. వీటన్నింటిపై కౌంటర్ దాఖలు చేయాల్సిందిగా హైకోర్టు సింగిల్ జడ్జి తీర్పునిచ్చారు. నాలుగు వారాల పాటు ప్రాసిక్యూషన్ తో పాటు అరెస్టు చేయరాదని మధ్యంతర ఉత్తర్వులు జారీ చేశారు. ఈ ఆదేశాలు చంద్రబాబుతో పాటు మాజీ మంత్రి నారాయణకే వర్తిస్తుందని సింగిల్ జడ్జి స్పష్టం చేసిన నేపథ్యంలో రాజధాని తుళ్లూరు మండల గ్రామాల్లో సీఐడీ అధికారులు రైతులు, సీఆర్డీఏ, రెవెన్యూ అధికారుల నుంచి ఏమైనా ఆధారాలు సేకరించే పనిలో నిమగ్నమయ్యారు. దళిత రైతుల తరుపున ఫిర్యాదు చేసాను అంటున్న మంగళగిరి ఎమ్మెల్యే ఆళ్ల రామకృష్ణారెడ్డిని విచారించిన సందర్భంగా అసైన్ భూముల వ్యవహారంలో కొన్ని వాస్తవాలు వెలుగు చూసినట్లు చెప్తున్నారు కానీ, కోర్టు అడిగితే మాత్రం చెప్పలేక పోయారు. ఇదిలా ఉండగా ప్రాసిక్యూషన్ చేసేందుకు సీఆర్ డీఏ చట్టం అనుమతించదని దీనిపై లోతుగా విచారణ జరపాల్సిన అవసరం ఉందని న్యాయస్థానం అభిప్రాయపడిన నేపథ్యంలో సీఆర్‌డీఏ చట్టంతో పాటు ఇతర క్రిమినల్ కోడ్ ఆఫ్ ప్రొసీజర్‌లను సీఐడీ అధికారులు తిరగేస్తున్నట్లు తెలియవచ్చింది. ఇందులో భాగంగా సీఐడీ ఉన్నతాధికారులు రాష్ట్ర అడ్వొకేట్ జనరల్ కార్యాలయంలో సంప్రదింపులు జరుపుతున్నట్లు తెలుస్తుంది.

ఆంధ్రప్రదేశ్ రాష్ట్ర మాజీ చీఫ్ సెక్రటరీ నీలం సాహ్నీకి రాష్ట్ర ప్రభుత్వం బంపర్ ఆఫర్ ఇచ్చింది. ఆమె రిటైర్డ్ అయిన తరువాత ఆమెకు, ఒక సలహాదారు పదవి కట్టబెట్టిన సంగతి తెలిసిందే. చీఫ్ అడ్వైజర్ హోదాను ఆమెకు జగన్ ఇచ్చారు. అయితే తాజాగా ఆమెకు , ఆ పదవికి ఎంత జీతం, ఇతర సౌకర్యాలు ఏమిటి అంటి చెప్తూ, ఒక జీవో విడుదల చేసారు. నీలం సాహనీకి ఏకంగా క్యాబినెట్ ర్యాంక్ హోదా ఇస్తూ, జగన్ మోహన్ రెడ్డి నిర్ణయం తీసుకున్నారు. ఇక ఆమెకు ఇచ్చే జీతం కూడా నిర్ధారించారు. ఆమెకు రూ.2.5 లక్షల జీతం వస్తుందని, ఆ జీవోలో తెలిపారు. అంతే కాదు, ఆమెకు తొమ్మిది మంది సిబ్బందిని కూడా ప్రభుత్వ ఖర్చులతో పెట్టుకునేందుకు అనుమతి ఇచ్చారు. ఇక నీలం సాహనీ, జగన్ మోహన్ రెడ్డి ప్రభుత్వానికి ముఖ్య సలహాదారుగా, ఆ పదవిలో రెండేళ్ళు కొనసాగనున్నారు. అయితే ఇప్పటికే సలహాదారులు, వాళ్లకు ఇచ్చే లక్షల లక్షల జీతాల పై, విమర్శలు వస్తున్నా, ప్రభుత్వం మాత్రం వెనుకడుగు వేయటం లేదు. తమకు అనుకూలం అనుకుంటే చాలు, పదవులు ఏమి లేకపోయినా, కొత్త పదవులు సృష్టించి మరీ, పదవులు ఇస్తున్నారు. ఈ క్రమంలోనే, తనకు ఎంతో నమ్మకస్తురాలుగా పేరు తెచ్చుకున్న, నీలం సాహనీకి, రిటైర్డ్ అయిన తరువాత కూడా జగన్ మోహన్ రెడ్డి ప్రభుత్వం అధిక ప్రాధాన్యత ఇచ్చింది.

ఆమెకు మంచి పదవి ఇవ్వటం, జీతం ఇవ్వటంతో పాటుగా, క్యాబినెట్ ర్యాంక్ హోదా కూడా ఇచ్చారు. ముఖ్యంగా ఆమె పని తీరు నచ్చి, రిటైర్డ్ వయసు అయిపోయినా కూడా, జగన్ మోహన్ రెడ్డి ప్రభుత్వం, కేంద్రంతో మాట్లాడి, ఆరు నెలలు చీఫ్ సెక్రటరీ పదవి పొడిగించారు. కరోనా కాలంలో, ఆమె సేవలు రాష్ట్రానికి అవసరం అని, కేంద్రాన్ని ఒప్పించి, రెండు సార్లు, మూడు మూడు నెలలు పాటు, పొడిగింపు తెచ్చుకున్నారు. గతంలో ఎల్వీ శుభ్రమణ్యం వైఖరి నచ్చక ఆయన్ను అకారణంగా బదిలీ చేయటం, తరువాత నీలం సహానీ రావటం, ఆమె రిటైర్మెంట్ తరువాత కూడా, అధిక ప్రాధాన్యత ఇవ్వటం, జరిగిపోయాయి. 1984 బ్యాచ్ కు చెందిన నీలం సాహ్నీ, పదవీ విరమణ చేసిన తరువాత కూడా ఆమెకు ముఖ్యపదవి ఇచ్చారు. ముఖ్యంగా రాష్ట్ర విభజన తరువాత, ఉన్న అనేక అంశాల పై, కేంద్ర ప్రభుత్వంతో చర్చించి, కేంద్రంతో సంప్రదింపులు జరిపి, విభజన సమస్యలతో పాటుగా, పునర్విభజన చట్టంలో ఉన్న వివిధ అంశాలు పరిష్కరించే బాధ్యత ఇచ్చారు. అయితే ఆమె జీత భత్యాల పై విమర్శలు వస్తున్నా, విభజన సమస్యలు పరిష్కరిస్తే అంత కంటే ఏమి కావాలి. చూద్దాం.