news

ఆంధ్రప్రదేశ్ లో పంచాయతీ ఎన్నికల పోరు, రోజు రోజుకీ ట్విస్ట్ ల దగ్గర నుంచి, ఇప్పుడు గంట గంటకీ ఒక ట్విస్ట్ వచ్చేలా పరిణామాలు మారుతున్నాయి. ఈ రోజు రాష్ట్ర ప్రభుత్వం, హైకోర్టు తీర్పు పై చాలెంజ్ చేస్తూ, సుప్రీం కోర్టులో వేసిన కేసు విచారణకు వస్తుందని అందరూ భావించారు. ఈ కేసు పై సుప్రీం కోర్టు ఏమి చెప్తుందా అని అందరూ భావించిన తరుణంలో, సుప్రీం కోర్టులో ప్రభుత్వం వేసిన పిటీషన్ తప్పుల తడకగా ఉంది అంటూ, వెనక్కు పంపించారు. అయితే తప్పులు సరి చేసి వేసే లోపు, సుప్రీం కోర్టు బెంచ్ టైం అయిపొయింది. దీంతో రేపు నోటిఫికేషన్ వస్తున్న సందర్భంలో, హౌస్ మోషన్ పిటీషన్ వేయటంతో పాటుగా, రేపు నోటిఫికేషన్ ఎలా ఆపాలి అనే దాని పై కూడా ప్రభుత్వం కసరత్తు చేస్తుంది. ఇక మరో పక్క ఈ రోజు ఎలక్షన్ కమీషనర్ నిమ్మగడ్డ రమేష్ కుమార్, గవర్నర్ ని కూడా కలిసారు. ఈ నేపధ్యంలో, ఈ రోజు జగన్ మోహన్ రెడ్డి, సీనియర్ ఐఏఎస్ ఆఫీసర్ లను తన వద్దకు పిలిపించుకున్నారు. పంచాయతీ రాజ్ శాఖ అధికారులు గోపాల కృష్ణ ద్వివేదీ, గిరిజా శంకర్‌ను జగన్ తన వద్దకు పిలిపించుకున్నారు. ముఖ్యంగా ఈ రోజు ఉదయం వీరు నిమ్మగడ్డతో భేటీ కావాల్సి ఉండగా, సుప్రీం కోర్టులో ప్రభుత్వం వేసిన పిటీషన్ పై ముఖ్యమంత్రితో చర్చించాలని, అందుకే సమావేశానికి సాయంత్రం హాజరు అవుతామని ఎన్నికల కమీషనర్ కు చెప్పారు.

అయితే ఇదే సమయంలో రేపు ఉదయం పది గంటలకు, వచ్చే నెల 4న జరుగనున్న మొదటి దశ పంచాయతీ ఎన్నికలకు సంబంధించిన నోటిఫికేషన్, రేపు ఉదయం విడుదల కానుంది. ఈ నేపధ్యంలో, మొదటి దశ ఎన్నికల పై ఎన్నికల కమీషనర్ వేగంగా పావులు కదుపుతూ ఉండటంతో, సాయంత్రం ఎన్నికల కమీషనర్ తో జరిగే భేటీలో ఏమి వివరించాలి అనే విషయం పై, జగన్, ఇరువురు సీనియర్ అధికారులకు దిశానిర్దేశం చేయనున్నారు. అయితే, ఎన్నికల కమిషన్ తో రాజీ పడి ఎన్నికలకు వెళ్తారా, లేక ఎన్నికలకు సహకరించం అంటూ, పాత పాటే పాడి, ఎన్నికలు తప్పించుకోవటానికి ఏమైనా కొత్త ఎత్తు ప్రభుత్వం వేస్తుందా అనేది చూడాలి. అయితే, ఉదయం 10 గంటలకు అపాయింట్మెంట్ ఇవ్వగా, అడిగారు కాబట్టి, మూడు గంటలకు అపాయింట్మెంట్ ఇవ్వగా, ఇప్పుడు నాలుగు గంటలు దాటినా వారు రాకపోవటంతో, సాయంత్రం 5 గంటలకు మీటింగ్‍కి హాజరుకావాలని, లేకపోతే ఇదే చివరి అవకాశం అంటూ మేమో జారీ చేసారు. దీంతో సీనియర్ ఐఏఎస్ ఆఫీసర్ గోపాల కృష్ణ ద్వివేదీ, గిరిజా శంకర్‌లకు, మేమో జారీ చేయటం సంచలనంగా మారింది. ప్రభుత్వ ఒత్తిడితోనే వాళ్ళు ఇప్పటికీ రాలేదా అనే విషయం ఇప్పుడు చర్చకు దారి తీసింది...

ఆంధ్రప్రదేశ్ రాష్ట్ర ప్రభుత్వానికి, ఆంధ్రప్రదేశ్ రాష్ట్ర ఎన్నికల సంఘానికి మధ్య, దాదాపుగా ఏడాదిగా, పోరు జరుగుతూనే ఉంది. ఈ పోరులో, ఎన్నికల సంఘం రాజ్యాంగ సంస్థ అయినా సరే, వాళ్ళ మాట ప్రభుత్వం వినటం లేదు కాబట్టి, అంతిమంగా ఇద్దరూ కోర్టులోనే తెల్చుకుంటున్నారు. అయితే ఇక్కడ కోర్టుల్లో ప్రతి సారి ఎన్నికల కమిషన్ కు అనుకూలంగానే తీర్పులు వస్తున్నాయి. ఒక్క హైకోర్టు మాత్రమే కాదు, సుప్రీం కోర్టులో కూడా ఇదే జరుగుతుంది. మొన్న హైకోర్టు సింగల్ బెంచ్ లో మాత్రమే, ప్రభుత్వానికి ఒకసారి ఊరట లభించింది. అయితే ఉదయం హైకోర్టు, ఎన్నికలు జరుపుకోవటానికి గ్రీన్ సిగ్నల్ ఇచ్చిన విషయం తెలిసిందే. అయితే దీని పై ప్రభుత్వం, ఈ రోజు సాయంత్రం సుప్రీం కోర్టులో అపీల్ చేసింది. హైకోర్టు ఇచ్చిన ఆదేశాల పై స్టే ఇవ్వాలని, సుప్రీం కోర్టుకు వెళ్లారు. అయితే ఇప్పుడు ఇక్క ప్రభుత్వానికి టెన్షన్ పట్టుకుంది. ఎందుకంటే , ఏది జరిగినా రేపే జరగాలి. రేపు సుప్రీం కోర్టు ఈ పిటీషన్ ను విచారణకు స్వీకరిస్తుందా లేదా అనేది తేలాలి. ఎందుకంటే, ఇది వరకు ఎన్నికల కమిషన్ ఇచ్చిన షెడ్యుల్ ప్రకారం, జనవరి 23న నామినేషన్లు స్వీకరణ మొదలుఅవుతుంది. అంటే ఎన్నికల ప్రక్రియ మొదలు అయిపోయినట్టే. రేపు విచారణకు రాకపోతే, మళ్ళీ వచ్చే వారం దాకా ప్రభుత్వం ఎదురు చూడాలి.

ఈ లోపు నామినేషన్లు మొదలు అయి పోతాయి. సహజంగా, అసలు ఎన్నికల కమిషన్ నిర్ణయాల్లో, కోర్టులు జోక్యం చేసుకోవని చెప్తూ ఉండగా, ఎన్నికల ప్రక్రియ మొదలు అయిపోతే, అసలు అప్పుడు సుప్రీం కోర్టు, ప్రభుత్వ వాదనను అసలు పరిగణలోకి తీసుకునే అవకాసం ఉండదని అంటున్నారు. కాబట్టి రేపు ఒక్క రోజు ప్రభుత్వానికి సమయం ఉంది. ఇక పొతే గత ఏడాది ఎన్నికల కమిషన్, ఎన్నికలు వాయిదా వేసినప్పుడు , కోర్టులు జోక్యం చేసుకోలేదు, ఎన్నికల కమిషన్ నిర్ణయానికి వదిలేసాయి. ఇక ఆ తరువాత నిమ్మగడ్డను తొలగించినప్పుడు కూడా, కోర్టులు ఆ చర్యను తప్పుబట్టి, మళ్ళీ నిమ్మగడ్డకు ఇచ్చాయి. ఇక తరువాత ప్రభుత్వం, తమను ఇబ్బంది పెడుతుందని రమేష్ కుమార్ చెప్పిన ప్రతి సారి, రాజ్యాంగ సంస్థకు సహకరించాలని ప్రభుత్వాన్ని ఆదేశించాయి. ఇలా ప్రతి సారి, ఎన్నికల కమిషన్ విషయంలో, రాష్ట్ర ప్రభుత్వానికి ఎదురు దెబ్బ తగులుతూనే ఉంది. మరి ఈ సారి, ఈ మొత్తం ఎపిసోడ్ కి ఫైనల్ టచ్ గా సుప్రీం కోర్టు ఏమి చెప్తుందో చూడాలి. ఏది ఏమైనా, రేపు విచారణకు వస్తే, రేపే ఈ విషయం పై ఒక క్లారిటీ వచ్చే అవకాసం ఉంది.

ఆంధ్రప్రదేశ్ రాష్ట్రంలో పంచాయతీ ఎన్నికలకు అనుమతిస్తూ, రాష్ట్ర హైకోర్టు డివిజన్ బెంచ్ తీసుకున్న నిర్ణయాన్ని, సుప్రీం కోర్టులో నిన్న రాష్ట్ర ప్రభుత్వం పిటీషన్ దాఖలు చేసిన సంగతి తెలిసిందే. అయితే ఈ పిటీషన్ ఈ రోజు హియరింగ్ కి వస్తుందని అందరూ ఊహించారు. అయితే, రాష్ట్ర ప్రభుత్వం వేసిన పిటీషన్ లో తప్పులు ఉండటంతో, సుప్రీం కోర్టు రిజిస్ట్రీ పిటీషన్ ను వెనక్కు పంపించారు. తప్పులు సరి చేసి, మళ్ళీ వేయమన్నారు. అయితే తప్పులు సరి చేసి వేసే లోపు, బెంచ్ టైం అయిపోవటంతో, ఇక ఈ పిటీషన్ ఈ రోజు విచారణకు వచ్చే అవకాసం లేదు. ఇప్పటికే ప్రభుత్వం, పిటీషన్ లో అర్జెంటు అని చెప్పినా, తప్పులు ఉండటం, అది సరి చేసే లోపు సమయం అయిపోవటంతో, ఇక ఈ పిటీషన్ మళ్ళీ సోమవారమే విచారణకు వచ్చే అవకాసం ఉంది. అయితే దీని పై ప్రభుత్వం హౌస్ మోషన్ పిటీషన్ వేస్తుందా లేదా అనేది చూడాలి. ఎందుకుంటే రేపటి నుంచి ఎన్నికల నోటిఫికేషన్ వస్తుంది. రేపటి నుంచి నామినేషన్లు స్వీకరిస్తారు. ఒక్కసారి ఈ ప్రక్రియ మొదలైతే, ఇక సుప్రీం కోర్టు జోక్యం చేసుకునే అవకాసం ఉండక పోవచ్చని అంటున్నారు. సోమవారం ఈ పిటీషన్ విచారణకు వచ్చినా, ఇక ఎన్నికల ప్రక్రియ ఆపటం మాత్రం కుదరదు అని, న్యాయ కోవిదులు అంటున్నారు. మరో పక్క రాష్ట్ర ఎన్నికల కమిషన్ కూడా ఈ కేసులో ఒక కేవియట్ పిటీషన్ దాఖలు చేసింది. రాష్ట్ర ప్రభుత్వ పిటీషన్ గురించి వాదనలు వినే సమయంలో, తమ వాదన కూడా విని, నిర్ణయం ప్రకటించాలని కేవియట్ వేసారు.