రాష్ట్ర పర్యటనలో ఉన్న కేంద్ర జలవనరులు, ఉపరితల రవాణా, పోర్టుల మంత్రి నితిన్‌ గడ్కరీ, ప్రకాశం జిల్లాలో పోర్ట్ నిర్మాణానికి సంబంధించి, కీలక ప్రకటన చేసారు. విభజన చట్టంలో ఉన్న నెల్లూరు జిల్లా దుగరాజపట్నంలో పోర్టు కుదరదు అని ఇప్పటికే కేంద్రం చెప్పిన సంగతి తెలిసిందే. అయితే, వాడరేవులో పోర్ట్ కు ఓకే అంటూ గడ్కరీ చెప్పారు. దీనికి కోసం, అక్కడ 3 వేల ఎకరాలు రాష్ట్ర ప్రభుత్వం ఇస్తే పోర్టు పెడతామని స్వయంగా నితిన్‌ గడ్కరీ ప్రకటించారు. అంతే కాదు, ఎలాంటి వివాదాలు లేని 3 వేల ఎకరాలు కావాలని, నొక్కి మరీ చెప్పారు. దీని పై రాష్ట్ర ప్రభుత్వానికి రాయాల్సిన లేఖను కూడా సిద్ధం చేశామని తెలిపారు. సాగరమాల ప్రాజెక్టు కింద ఆ ప్రాంతంలో పోర్టు ఆధారిత పారిశామ్రిక అభివృద్ధికి కూడా సహకరిస్తాం అని గడ్కరీ తెలిపారు. కొత్త పోర్టుపై రాష్ట్ర ప్రభుత్వంతో కలిసి స్పెషల్‌ పర్పస్‌ వెహికల్‌ (ఎస్పీవీ) ఏర్పాటు చేస్తామని గడ్కరీ ప్రతిపాదించారు.
అయితే దీని పై రాష్ట్ర ప్రభుత్వ వర్గాలు స్వాగాతిసున్నా, భూమి విషయం పై మాత్రం, సందేహాలు వ్యక్తం చేస్తున్నారు. ఎందుకంటే, ఇక్కడ భూమిలో అన్నీ మన ప్రతిపక్ష నేత కబంధ హస్తాలలో ఉన్నాయి. వాన్‌పిక్‌ ప్రాజెక్టుకు వైఎస్‌ ప్రభుత్వం అక్కడున్న ప్రభుత్వ భూమి సుమారు అయిదు వేల ఎకరాలకు పైగా, అలాగే ప్రైవేటు భూమి 1,825 ఎకరాల భూమిని అప్పగించింది. జగన్ అక్రమాస్తుల కేసుల్లో ఈ ప్రాజెక్టుకు చేసిన భూకేటాయింపు కూడా ఉంది. ఆ భూములు ఎన్‌ఫోర్స్‌మెంట్‌ డైరెక్టరేట్‌(ఈడీ) పరిధిలో ఉన్నాయి. గడ్కరీ ప్రతిపాదిస్తున్న నౌకాశ్రయానికి భూమి ఇవ్వాలంటే.. దీన్నుంచే కేటాయించాలి. ఈడీ పరిధిలోనున్న భూమిని ఇప్పటికిప్పుడు కేటాయించటం సాధ్యం కాకపోవచ్చని ఉన్నతాధికార వర్గాలు అభిప్రాయపడుతున్నాయి.
విభజన తర్వాత తెలుగుదేశం ప్రభుత్వం ఏర్పాటయ్యాక... ఆ భూముల స్వాధీనానికి రాష్ట్ర ప్రభుత్వం ప్రయత్నాలు చేసింది. కానీ... కేసుల నేపథ్యంలో అది కుదరలేదు. మొత్తానికి... ఎప్పుడో ముగిసిందనుకున్న ‘వాడరేవు’ కథ గడ్కరీ ప్రకటనతో మళ్లీ తెరపైకి వచ్చింది. అయితే.. పోర్టు ఏర్పాటు కోసం ఎలాంటి వివాదంలేని 3వేల ఎకరాలు భూములు అప్పగించాలని రాష్ట్ర ప్రభుత్వాన్ని నొక్కి మరీ చెప్తున్న గడ్కరీకి, అక్కడ జగన్ అక్రమాస్తుల కేసులో ఈ భూమి అంతా ఉందని తెలిసే ఇలా ప్రకటన చేసారా అనే అనుమానాలు కలుగుతున్నాయి. అలాంటప్పుడు, కేంద్ర ప్రభుత్వం, జగన్ అక్రమాస్తుల కేసుని ఒక కొలిక్కి తెస్తే, 3 వేల ఎకరాలు ఏమి ఖర్మ, 30 వేల ఎకరాలు ఇస్తామని రాష్ట్ర ప్రభుత్వం అంటుంది.