ఏపీలో మంత్రివర్గ పునర్వ్యవస్థీకరణ జరగబోతోందా..? మంత్రి వర్గ విస్తరణ జరిగితే భారీగా మార్పులు చేర్పులు ఉంటాయా..? లేదంటే బీజేపీ వదులుకున్న రెండు మంత్రి పదవులకే పరిమితమవుతారా..? ఆ రెండు బెర్తులు ఎవరికి దక్కబోతున్నాయి. ప్రస్తుతం టీడీపీలో ఇదే అంశంపై విపరీతమైన చర్చ నడుస్తోంది. కామినేని శ్రీనివాస్, మాణిక్యాలరావు రాజీనామా తర్వాత ఖాళీ అయిన వైద్యఆరోగ్య శాఖతో పాటు దేవాదాయ శాఖను కొత్త వారికి అప్పగించాలనే యోచనలో సీఎం ఉన్నారని తెలియడంతో మంత్రివర్గంలో చోటు కోసం పెద్ద తలకాయలే ఎదురు చూస్తున్నట్టు ప్రచారం జరుగుతోంది. ఎప్పుడన్న‌ది క‌రెక్ట్ గా చెప్ప‌క‌పోయినా నెల రోజుల లోపే మంత్రి వర్గ విస్తరణ ఉండ‌వ‌చ్చ‌ని తెలుస్తోంది.
దీంతో మంత్రి ప‌ద‌వుల‌ను ఆశిస్తున్న ఆశావాహ‌లు త‌మ ప్ర‌య‌త్నాల‌ను ముమ్మ‌రం చేశారు. తాజాగా చేపట్టబోయే మంత్రివర్గ విస్తరణలో ఎవరెవరినీ తొలగించాలి...ఎవరెవరిని మంత్రివర్గంలోకి తీసుకోవాలనే విషయంపై 'చంద్రబాబు' ఇంకా ఒక నిర్ణయం తీసుకోలేదు. కానీ ఆయన సన్నిహితుల ద్వారా మంత్రి పదవులు కోల్పోయేవారు...నూతనంగా మంత్రివర్గంలోకి వచ్చేవారి వివరాలు బయటకుపొక్కాయి. రాష్ట్రంలో ముస్లిం నాయకుడికి మంత్రివర్గంలో ప్రాతినిధ్యం లభించే అవకాశం కనిపిస్తోంది. ముఖ్యమంత్రి చంద్రబాబు దీనిపై నిర్ణయం తీసుకున్నారని విశ్వసనీయ వర్గాలు తెలిపాయి. ఎమ్మెల్సీ ఎంఏ షరీఫ్ వైపు అధిష్ఠానం మొగ్గు చూపుతున్నట్లు ప్రచారం జరుగుతోంది. టీడీపీ నుంచి ఇద్దరు మైనారిటీలు ఎమ్మెల్సీలుగా గెలిచారు. వారిలో ఎన్‌ఎండీ ఫరూక్‌ ప్రస్తుతం శాసనమండలి చైర్మన్‌గా ఉన్నారు. మరో ఎమ్మెల్సీ షరీఫ్ ప్రస్తుతం మండలి నుంచి ప్రభుత్వ విప్‌గా ఉన్నారు. జలీల్‌ ఖాన్‌ ఇటీవల రాష్ట్ర వక్ఫ్‌ బోర్డు అధ్యక్షునిగా నియమితులయ్యారు.
వీరిలో ఫరూక్‌ రాయలసీమ వారు కాగా షరీఫ్ కోస్తా నాయకుడు. మైనారిటీల సంఖ్య రాయలసీమలో అధికంగా ఉండటంతో ఫరూక్‌ చేత మండలి చైర్మన్‌ పదవికి రాజీనామా చేయించి మంత్రి పదవి ఇస్తే ఎలా ఉంటుందనే చర్చ జరిగింది. అదే జరిగితే చైర్మన్‌ పదవిని మరో సీనియర్‌కు ఇవ్వాల్సి ఉంటుంది. ఆ పదవిలో ఫరూక్‌నే కొనసాగించి, షరీఫ్ ను మంత్రిని చేస్తే ముస్లిం మైనారిటీలకు రెండు ప్రధాన పదవులు ఇచ్చినట్లవుతుందన్నది ప్రస్తుతం టీడీపీ అధిష్ఠానం మదిలో ఉన్న ఆలోచనగా చెబుతున్నారు. పశ్చిమ గోదావరి జిల్లాకు చెందిన షరీఫ్ దీర్ఘకాలంగా పార్టీని అంటి పెట్టుకొని పనిచేస్తున్నారు. పార్టీ రాష్ట్ర కార్యాలయంలో అధిష్ఠానం ఏ బాధ్యత అప్పగించినా అంకిత భావంతో నిర్వహిస్తున్నారు. ఇక... ఖాళీగా ఉన్న రెండో మంత్రి పదవిపై టీడీపీ ఇంకా ఒక నిర్ణయానికి రాలేదు. భవిష్యత్‌ అవసరాల దృష్ట్యా దానిని కొంతకాలం అలాగే ఉంచి ఆ తర్వాత భర్తీ చేయవచ్చని అంటున్నారు.