news

ఏపీలో ఐటీ సోదాల సందడి సద్దుమణగకముందే... ఎన్‌ఫోర్స్‌మెంట్‌ డైరెక్టరేట్‌ (ఈడీ) రంగంలోకి దిగింది. కేంద్ర మాజీ మంత్రి, టీడీపీ ఎంపీ సుజనా చౌదరికి సంబంధించిన సంస్థల్లో ఈడీ సోదాలు నిర్వహించింది. చెన్నై నుంచి వచ్చిన సిబ్బంది ప్రత్యేక బృందాలుగా ఏర్పడి రెండు రోజుల క్రితం హైదరాబాద్‌తో పాటు ఏపీలో సోదాలు నిర్వహించినట్లు తెలిసింది. సీబీఐ మాజీ అధినేత విజయరామారావు కుమారుడు కె. శ్రీనివాస్‌ కల్యాణ్‌ రావుపై గతంలో సీబీఐ కేసు నమోదు చేసింది. దీనికి సంబంధించి సుజనా కంపనీలలో దాడి చేసినట్టు తెలుస్తుంది.

హైదరాబాద్‌లో విజయరామారావు కుమారుడు ఇంట్లో జరిపిన సోదాల్లో ఒకే చిరునామా పై వందకుపైగా కార్యాలయాలు నిర్వహిస్తున్నట్లు గుర్తించిన అధికారులు, అందుకు సంబంధించిన పత్రాలు స్వాధీనం చేసుకున్నట్లు సమాచారం. అక్రమ లావాదేవీల నియంత్రణ చట్టం (పీఎల్‌ఎంఏ) కింద కోట్ల రూపాయల బ్యాంకు రుణాలకు చెందిన పత్రాలను, నగదు లావాదేవీలకు సంబంధించిన ఆధారాలు, పలు అగ్రిమెంట్లు స్వాధీనం చేసుకున్నట్లు సమాచారం.
తప్పుడు సమాచారం, నకిలీ ధ్రువపత్రాలతో శ్రీనివాస్‌ బ్యాంకులను రూ.300 కోట్ల మేరకు మోసగించినట్లు 2016లో సీబీఐ కేసు నమోదు చేసింది. సుజనా చౌదరికి సంబంధించిన సంస్థల్లోనూ శ్రీనివాస్‌ డైరెక్టర్‌గా ఉన్నారు.

కేసు దర్యాప్తులో భాగంగా సీబీఐ అధికారులు అప్పట్లో శ్రీనివాస్‌ కార్యాలయాలు, ఆయన నివాసంలో జరిపిన సోదాల్లో పలు కీలక పత్రాలు స్వాధీనం చేసుకున్నారు. అందులో సుజనా చౌదరి సంస్థలతో శ్రీనివాస్‌ ప్రమేయానికి సంబంధించిన పత్రాలు బయటపడ్డాయి. వందల కోట్ల రూపాయల వ్యవహారం కావడంతో ఈడీ రంగంలోకి దిగినట్లు తెలుస్తోంది. కాగా, చెన్నై బృందం నిర్వహించిన తనిఖీలకు సంబంధించి తమకు ఎలాంటి సమాచారం లేదని ఈడీ హైదరాబాద్‌ జోన్‌ విభాగం వెల్లడించింది. మరోవైపు, శ్రీనివాస్‌ సంస్థలతో తమకు లావాదేవీలు ఉన్నందున ఆ వివరాలు తెలుసుకునేందుకే ఈడీ అధికారులు వచ్చారని, తమ కంపెనీల పై ఎలాంటి దాడులు జరగలేదని సుజనా సంస్థ ప్రతినిధి ఒకరు తెలిపారు.

మంత్రి దేవినేని ఉమా నిన్న, విజయవాడ దుర్గమ్మ దర్శనానికి వెళ్లారు. ఆయన ఆ సమయంలో చేసిన, పనితో అక్కడ ఉన్న ప్రజలు ఉమాని మెచ్చుకున్నారు. ఆ వివరాలు ఇలా ఉన్నాయి... బుధవారం సాయంత్రం అనంతపురం జిల్లా పర్యటన నుండి విజయవాడ చేరుకున్న మంత్రి దేవినేని నేరుగా విజయవాడ ఫ్లై ఓవర్ వద్ద గల వినాయకుడి గుడికి చేరుకొని, అక్కడనుండి ఉచిత దర్శనం కాలినడకన కనకదుర్గమ్మ దర్శనానికి వెళ్లారు. ఉచిత క్యూలైన్లలో ఉన్న సమస్యలను భక్తులను అడిగి తెలుసుకుంటూ ముందుకు వెళ్లారు. ఉదయం క్యూలైన్లలో ఉన్న భక్తులు ఇబ్బంది పడుతున్నారనే వార్తలు వచ్చాయి. దీంతో ఉమా, ప్రత్యక్షంగా ఉచిత క్యూలైన్లోకి వెళ్లి, అక్కడ ప్రజలు పడుతున్న సమస్యలు, ఆయన స్వయంగా చూసి, ప్రజలను అడిగి తెలుసుకున్నారు.

ఒక మహిళా భక్తురాలు మంత్రి దేవినేనితో మాట్లాడుతూ, వీఐపీలు ప్రత్యేక దర్శనానికి వెళుతుంటే తమకు చాలా కోపం వచ్చేదని, మీరు ఇలా సామాన్య భక్తుల్లా క్యూలైన్ లో వెళుతుంటే, తాము కూడా ప్రేరణ పొంది, మీరే వెళ్తున్నప్పుడు మాకు వచ్చిన ఇబ్బంది ఏంటి అని, మాకు ఇంకా ఉత్సాహంగా ఉంది. మీలాంటివారు ఉండటం వల్ల మాలాంటి భక్తులకు ఉత్సాహం వస్తుందని, ఏది ఏమైనా మీరు సామాన్య భక్తుల్లా రావడం చాలా అభినందించదగ్గ విషయమని అన్నారు. కొంత మంది భక్తులు మీరు విఐపి దర్శనం లైన్లో వెళ్ళవచ్చు కదా అని మంత్రికి సూచించారు. కానీ మంత్రి దేవినేని సామాన్య భక్తుల సమస్యలు తెలుసుకొని వాటిని పరిష్కరించడానికి తాను ఇలా వెళ్తున్నానని గత 14 సంవత్సరాలుగా ఇలా వెళ్తున్నానని, అప్పుడే నాకు సమస్యలు తెలుస్తాయి కానీ విఐపి దర్శనం లోకి పోతే మీ సమస్యలు నాకెలా తెలుస్తాయి. నేను అధికారులకు ఎలా చెప్పగలను అని అన్నారు.

గుడి వద్దకు చేరుకున్న మంత్రి దేవినేని కి ఆలయ ఈవో చైర్మన్ మరియు అధికారులు స్వాగతం పలికారు. వెంటనే మంత్రి దేవినేని క్యూలైన్లలో తాను గమనించిన సమస్యలను వారికి చెప్పి, వెంటనే పరిష్కరించే దిశగా చర్యలు తీసుకోవాలని, సామాన్య భక్తులకు ఎటువంటి ఇబ్బంది లేకుండా అన్ని చర్యలు తీసుకోవాలని, రేపటికి ఈ సమస్యలు ఉండ కూడదని వారిని ఆదేశించారు. క్యూలైన్లలో తమకు సమస్యలు చెప్పిన మహిళలను ఆలయ ఈవోతో మాట్లాడించారు. అనంతరం దూరం నుండే కనకదుర్గమ్మను దర్శించుకున్న మంత్రి దేవినేనికి ఆలయ అధికారులు తీర్థ ప్రసాదాలు అందజేశారు. అనంతరం మీడియాతో మాట్లాడుతూ వీఐపీల సేవలో తరించటానికి ప్రాముఖ్యత ఇవ్వకుండా సామాన్య భక్తులకు ప్రాముఖ్యత ఇచ్చి వారికి ఎటువంటి ఇబ్బంది లేకుండా అమ్మవారి దర్శనం చేయించాలని ఇందుకు ఆలయ ఈవో చైర్మన్ మరియు అధికారులకు తగు సూచనలు ఇస్తూ వాటిని సక్రమంగా అమలు చేసి భక్తుల మన్ననలను పొందాలని అన్నారు.

అనంతపురం జిల్లాలో కరువును తరిమివేయడానికి లక్ష పంట కుంటలు త్రవ్వించడంలో విశేష కృషి చేసిన ప్రస్తుత గుంటూరు జిల్లా కలెక్టర్ కోన శశిధర్‌ను సన్మానించి అభినందించారు ముఖ్యమంత్రి నారా చంద్రబాబు నాయుడు. 2015 సంవత్సరంలో అనంతపురం జిల్లాలో కలెక్టరుగా కోన శశిధర్ పని చేస్తున్న సమయంలో ముఖ్యమంత్రి నీరు - ప్రగతి కార్యక్రమంలో భాగంగా రాయదుర్గం నియోజకవర్గం గుమ్మగట్టు మండలం భైరవాని తిప్ప ప్రాజెక్ట్ వద్ద అనంతపురం జిల్లాలో తొలి పంట కుంట త్రవ్వకానికి ముఖ్యమంత్రి శ్రీకారం చుట్టారు.

ఆ సమయంలో ఆయన మాట్లాడుతూ అనంత జిల్లాలో కరువును పారద్రోలాలంటే పంట కుంటలే శరణ్యమని, తద్వారా భూగర్భ జలాలు పెంపొండమే కాక, ఆ పొలానికి సంపూర్ణంగా నీరు అంది వ్యవసాయాభివృద్దికి ఎంతో ఉపయుక్తంగా వుంటుందన్నారు. ముఖ్యమంత్రి ఇచ్చిన ఆదేశాలతో అప్పుడు అనంతపురం జిల్లా కలెక్టరుగా వున్న కోన శశిధర్, 16 నెలల కాలంలోనే 70 వేల పంట కుంటలు త్రవ్వించి ఘనతను సాధించారు. మిగిలిన 30 వేల పంట కుంటలు ప్రస్తుత అనంతపురం జిల్లా కలెక్టర్ పూర్తి చేయడంతో ముఖ్యమంత్రి సలహాలు, సూచనలు, ఆలోచనలు కార్యరూపం దాల్చాయి.

ముఖ్యమంత్రి రెండున్నర సంవత్సరాల క్రితం మొదటి పంట కుంటను ప్రారంభించిన ప్రాంతమైన భైరవాని తిప్ప ప్రాజెక్ట్ సమీపంలోనే లక్ష ఒకటవ పంట కుంటను త్రవ్వించిన సందర్భంగా ఏర్పాటు చేసిన బహిరంగ సభలో దాదాపు 70 వేల పంట కుంటలు అతి తక్కువ కాలంలో త్రవ్వించి అనంతపురం జిల్లా రైతులు కరువు బారిన పడకుండా కృషి చేసిన అప్పటి అనంతపురం జిల్లా ప్రస్తుత గుంటూరు జిల్లా కలెక్టరు కోన శశిధర్‌ను ప్రత్యేకంగా ముఖ్యమంత్రి అనంతపురం జిల్లాలో జరిగే ఈ కార్యక్రమానికి పిలిపించుకుని తన చేతుల మీదుగా ఘనంగా సత్కరించి ప్రశంసా పత్రం అందజేసి అభినందించారు. ఈ కార్యక్రమం అనంతరం కలెక్టర్ కోన శశిధర్ భైరవాని తిప్ప ప్రాజెక్ట్ ప్రాంతాన్ని కలియతిరిగి తన కృషి వలన నీరు లభ్యత వచ్చిన ప్రాంతాన్ని చూసి ఆనందం వ్యక్తం చేసారు.