మాజీ రాష్ట్రపతి, కాంగ్రెస్ సీనియర్ నేత ప్రణబ్ ముఖర్జీ రాష్ట్రీయ స్వయంసేవక్‌ సంఘ్‌(ఆరెస్సెస్‌) కార్యక్రమానికి, నాగపూర్ వెళ్ళిన విషయం తెలిసిందే. ఈ విషయంలో పెద్ద దుమరామే లేపింది. అయినా ప్రణబ్ ఎక్కడా వెనకడుగు వెయ్యలేదు. ఎవరు ఎన్ని విమర్శలు చేసినా, ఆయన అక్కడకు వెళ్లారు. అయితే, ఇప్పుడు బీజేపీ చేసిన ఫోటో మార్ఫింగ్ చూసి, ప్రణబ్ బెంబేలెత్తిపోయారని తెలుస్తుంది. ఈ కార్యక్రమంలో పాల్గొన్న ప్రణబ్ ఫొటోలను బీజేపీ ఐటి సెల్ మార్ఫ్‌ చేశారు. ప్రస్తుతం ఇవి సోషల్ మీడియాలో వైరల్‌ అవుతుండటంతో ప్రణబ్ కుమార్తె శర్మిష్ట ముఖర్జీ స్పందించారు. ఇలాంటిది జరుగుతుందని తాను ముందే చెప్పానంటూ భాజపాపై విమర్శలు చేశారు.
ఆరెస్సెస్‌ కార్యక్రమానికి ముఖ్య అతిథిగా హాజరయ్యేందుకు ప్రణబ్ ముఖర్జీ అంగీకరించడంతో ఆయన కుమార్తె, కాంగ్రెస్ నాయకురాలైన శర్మిష్ట కూడా భాజపాలో చేరవచ్చంటూ వార్తలు వెల్లువెత్తాయి. ఈ వార్తలను ఖండించిన శర్మిష్ట భాజపాపై విమర్శలు చేశారు. నాగ్‌పూర్‌ ఆరెస్సెస్‌ సభలో ప్రణబ్ ముఖర్జీ చేసిన ప్రసంగాన్ని అందరూ మర్చిపోతారని, ఫొటోలు, వీడియోలు మాత్రం అలాగే ఉంటాయన్నారు. ఆ ఫొటోలకు బూటకపు ప్రకటనలు జోడించి భాజపా ప్రచారం చేసే అవకాశముందని పేర్కొన్నారు. తాజాగా మార్ఫ్‌ చేసిన ప్రణబ్ ఫొటోలు సోషల్‌మీడియాలో కన్పించడంతో మరోసారి ఆమె భాజపాపై ధ్వజమెత్తారు.
మార్ఫ్‌ చేసిన ప్రణబ్ ఫొటోను ఓ నెటిజన్‌ షేర్‌ చేయగా.. దాన్ని ట్వీట్ చేస్తూ.. ‘చూశారా.. దీని గురించే నేను భయపడింది. మా నాన్నకు కూడా ఇదే విషయాన్ని చెప్పాను. ప్రణబ్ మాట్లాడి కొద్ది గంటలైనా కాకముందే.. భాజపా/ఆరెస్సెస్‌ ట్రిక్స్‌ విభాగం చురుగ్గా పనిచేసింది’ అని శర్మిష్ట పేర్కొన్నారు. కార్యక్రమం ప్రారంభమయ్యే సమయంలో ఆరెస్సెస్‌ నేతలు ప్రతిజ్ఞ చేయగా ప్రణబ్ మాత్రం మామూలుగా లేచి నిల్చున్నారు. అయితే ఈ ఫొటోలను కొందరు మార్ఫ్‌ చేశారు. ప్రణబ్ ముఖర్జీ కూడా ఆరెస్సెస్‌ నేతల మాదిరిగా తన కుడిచేతిని ఛాతి వరకు చాచి ప్రతిజ్ఞ చేస్తున్నట్లుగా మార్ఫింగ్ చేసి సోషల్‌మీడియాలో పెట్టారు. ఇప్పుడు ఈ ఫొటోలు వైరల్‌గా మారాయి.