news

వైఎస్ వివేకానందరెడ్డి హత్యకేసులో సిట్‌ అధికారులు దర్యాప్తు ముమ్మరం చేశారు. ఇప్పటివరకు 10 మంది అనుమానితులను అదుపులోకి తీసుకున్నారు. ఈ నేపథ్యంలో వచ్చిన సమాచారం, ఇప్పటి వరకు సేకరించిన ఆధారాలు, పరిగణలోకి తీసుకుని, సిట్ సంచలన నిర్ణయం తీసుకుంది. ఇవాళ జగన్‌ బంధువులను కూడా సిట్‌ అధికారులు ప్రశ్నించనున్నారు. ఆర్థిక లావాదేవీలు, కుటుంబ కలహాలపైనా సిట్ దృష్టి సారించింది. వివేకా హత్య ఘటనా స్థలంలో దొరికిన లేఖను అధికారులు ఫోరెన్సిక్‌ ల్యాబ్‌కు పంపారు. వివేకానందరెడ్డి కాల్స్‌ డేటాను పోలీసులు పరిశీలిస్తున్నారు. వివేకా హత్యపై జగన్‌ చేసిన వ్యాఖ్యలను ప్రభుత్వం సీరియస్‌గా తీసుకుందన్నారు. రెండు రోజుల్లోనే కేసు ఛేదిస్తామని పోలీసులు తెలిపారు. అయితే జగన్ ఫామిలీని విచారణ చేస్తే, ఎలాంటి రాజకీయ పరిణామాలు చోటు చేసుకొంటాయో చూడాలి.

లేఖపై లోతైన విచారణ... వైఎస్‌ వివేకానందరెడ్డి డ్రైవరుపై రాసినట్లుగా చెబుతున్న లేఖకు సంబంధించి ప్రస్తుతం లోతైన అధ్యయనం జరుగుతోంది. తీవ్ర గాయాలపాలైన వ్యక్తి లేఖ రాయడానికి ఎంత వరకూ అవకాశం ఉంటుందన్న దానిపైనే ప్రధానంగా అధికారులు దృష్టి సారించారు. వివేకా డైరీల్లోని రాతను, లేఖలోని రాతతో సరిపోల్చే బాధ్యతను ఇప్పటికే ఫోరెన్సిక్‌ నిపుణులకు అప్పగించారు. వివేకా ఇంటి వెనుక వైపు తలుపు తెరచుకుని ఉన్న క్రమంలో ఆ దిశగానూ విచారణ ముమ్మరం చేశారు. హంతకులు ముందుగానే లోపలికి వచ్చి మకాం వేశారా? లేక వివేకా లోపలికి వచ్చిన తరువాత ప్రవేశించారా? అన్న దిశగా విచారిస్తున్నారు.

‘సాక్ష్యాలు చెరపడం’పై దృష్టి... వివేకా హత్య కేసులో ప్రధానంగా ‘సాక్ష్యాలు చెరపడం’ అన్న అంశమే కీలకంగా మారింది. దీనిపై విచారణ బృందాలు దర్యాప్తు చేస్తున్నాయి. ఉదయం గుండెపోటుగా ప్రచారం జరగడం.. అనంతరం అనుమానాస్పద మృతిగా కేసు నమోదు కావడం.. వైద్యుల శవపరీక్ష అనంతరం హత్యగా ప్రాథమికంగా నిర్ధారణకు రావడంతో ‘ఉదయం’ ఏం జరిగిందన్న దానిపై విచారణ సాగుతోంది. వివేకా విగతజీవిగా పడి ఉన్నట్లు తొలుత గుర్తించిందెవరు? ఆ తరవాత వారు ఎవరికి సమాచారం ఇచ్చారు? అక్కడికి ఎవరెవరు చేరుకున్నారు? అనంతరం ఏం జరిగింది? అన్న దానిపైనా ఆరా తీస్తున్నారు. రక్తపు మరకలు కడిగేశారన్న విమర్శల నేపథ్యంలో ఆ దిశగానూ విచారణ జరుగుతోంది. పోలీసులకు ఆలస్యంగా ఫిర్యాదు చేయడం నుంచి కేసు లేకుండా ఒత్తిడి చేయడం వరకు పలు అంశాల్లో దర్యాప్తు సాగుతోంది.

అనంతపురం జిల్లాలో టీడీపీ అభ్యర్థుల ఖరారు అంశం గంట గంటకూ ఉత్కంఠ కలిగిస్తోంది. పోలింగ్‌కు ఇక కేవలం 25 రోజుల సమయమే ఉంది. ఈ పాటికి ప్రధాన పార్టీల అభ్యర్థులు ప్రచారంలో ము మ్మరంగా తిరగాల్సి ఉన్నా.. ఇంకా అన్ని స్థానాలకూ అభ్యర్థులు ఖరారు కాకపోవడం ఆందోళన కలిగిస్తోంది. టీడీపీ అభ్యర్థుల విషయంలో కొంత స్పష్టత ఉన్నా ఎంపీ జేసీ దివాకర్‌రెడ్డి పెట్టిన పేచీతో అధిష్ఠానం ఆచితూచి అడుగులు వేస్తోంది. ఆది నుంచి తాను చెప్పిందే జరగాలన్నట్టు టీడీపీలో దివాకర్‌రెడ్డి రాజకీయాలు నెరుపుతున్నారు. గత ఎన్నికల్లో అనంతపురం పార్లమెంటు స్థానం పరిధిలోని కొన్ని స్థానాల్లో దివాకర్‌రెడ్డి సూచించిన వారికే టికెట్లు కేటాయించారు. ఈ ఐదేళ్లలో జరిగిన రాజకీయ పరిణామాల నేపథ్యంలో 2019 ఎన్నికల్లో కొందరు సిట్టింగులను మార్చాలని కొంతకాలంగా ఆయన పట్టుబట్టుతున్నారు. ఈ విషయమై పలుమార్లు చంద్రబాబు సమక్షంలో కూడా వివిధ సభల్లో మాట్లాడారు. కాగా, ఈ ఎన్నికల్లో తాను బరిలో నిలవడం లేదని, తన కుమారుడు పవన్‌కుమార్‌రెడ్డికి అవకాశం ఇవ్వాలని సీఎం చంద్రబాబును అడిగి అనుమతి కూడా తీసుకున్నారు. ఈ మేరకు ఈనెల 6న చంద్రబాబు పవన్‌తోపాటు తాడిపత్రి ఎమ్మెల్యే ప్రభాకర్‌రెడ్డి కుమారుడు అస్మిత్‌రెడ్డిని కూడా దగ్గరకు పిలిపించుకుని ప్రోత్సహించి పంపించారు. అలాగే జిల్లాలో 14 అసెంబ్లీ స్థానాలకు గానూ దాదాపు 11 స్థానాలకు అభ్యర్థులను ఎంపిక చేసి.. గ్రీన్‌ సిగ్నల్‌ కూడా ఇచ్చా రు.

శింగనమల, గుంతకల్లు, కళ్యాణదుర్గం మినహా మిగతా స్థానాలకు అభ్యర్థులెవరనేది టీడీపీ శ్రేణుకు స్పష్టమయ్యేలా సంకేతాలు పంపించారు. దీంతో ఎవరికి వారుగా ఆయా నియోజకవర్గాల్లో ప్రచారాలు కూడా ప్రారంభించారు. రెండు రోజుల క్రితం చంద్రబాబు ప్రకటించిన తొలి జాబితాలో ఆ 11 స్థానాలకూ అభ్యర్థుల పేర్లు ప్రకటిస్తారని ఆశించారు. హిం దూపురం పార్లమెంటు నియోజకవర్గ పరిధిలోని ఐదు నియోజకవర్గాలకు మాత్రమే అభ్యర్థులను ప్రకటించి తొమ్మిది స్థానాలు పెండింగ్‌లో ఉంచారు. దీంతో జిల్లాలోని టీడీపీ శ్రేణుల్లోనే కా కుండా ఆశావహుల్లోనూ గంటగంటకూ ఉత్కంఠ కొనసాగుతోంది. ఎంపీ జేసీ దివాకర్‌రెడ్డి పేచీతో టీడీపీ అభ్యర్థుల ఖరారులో ప్రతిష్ఠంభన నెలకొంది. కొంతకాలం నుంచి అనంతపురం పార్లమెంటు నియోజకవర్గ పరిధిలోని కొన్ని స్థానాల్లో సిట్టింగులను మార్చాలని ఆయన అధిష్ఠానం వద్ద డిమాండు చేస్తూ వస్తున్నారు. వాటిలో అనంతపురం అర్బన్‌, కళ్యాణదుర్గం, గుంతకల్లు, శింగనమల ఉన్నాయి. రాయదుర్గం విషయంలో కూడా కొంత గందరగోళం సృష్టించారు. నిజానికి ఈనెల మొదటి వారంలో చంద్రబాబు వద్ద జరిగిన సమీక్షలో రాయదుర్గంలో కాలవ శ్రీనివాసులు, అనంతపురం అర్బన్‌లో వైకుంఠం ప్రభాకర్‌ చౌదరి, తాడిపత్రిలో అస్మిత్‌రెడ్డి, ఉరవకొండలో పయ్యావుల కేశవ్‌లకు గ్రీన్‌ సిగ్నల్‌ ఇస్తూ నియోజకవర్గాల్లో ప్రచారాలు చేసుకోవాలన్నట్లు సంకేతాలు పంపించారు.

దీంతోపాటు హిందూపురం పార్లమెంటు నియోజకవర్గ పరిధిలోని దాదాపు అన్ని నియోజకవర్గాలకూ అభ్యర్థులను ఖరారు చేసి ప్రచారం చేసుకోవాల్సిందింగా చెప్పి పంపించారు. అప్పటికి జిల్లాలో కేవలం కళ్యాణదుర్గం, గుంతకల్లు, శింగనమల నియోజకవర్గాల అభ్యర్థులు మాత్రమే ఖరారు కావాల్సి ఉంది. ఆ సమయంలో రెండురోజుల క్రితం చంద్రబాబు విడుదల చేసిన తొలి జాబితాలో ఐదు స్థానాలకు మాత్రమే అభ్యర్ధులను ఖరారు చేస్తూ 9 స్థానాలు పెండింగ్‌లో ఉంచారు. ఇదే సమయమని భావించిన ఎంపీ జేసీ అదేపనిగా శుక్రవారం అమరావతికి వెళ్లి తన పరిధిలోని నాలుగు స్థానాల్లో సిట్టింగులను మార్చాలని, ఆ స్థానాల్లో తాను సూచించిన అభ్యర్థులకు సీట్లు ఇవ్వాల్సిందేనని టీడీపీ అధిష్ఠానానికి గట్టిగా చెప్పి వచ్చారు. అలా ఇవ్వకపోతే తాము పోటీలో ఉండబోమని కూడా చెప్పినట్టు సమాచారం. శరవేగంగా మారుతున్న ఈ పరిణామాలపై అధిష్ఠానం కూడా ప్రత్యామ్నా య ఆలోచన చేస్తున్నట్టు తెలుస్తోంది. అనంతపురం అర్బన్‌ నుంచి ఎస్‌ఆర్‌ కన్‌స్ట్రక్షన్స్‌ అధినేత సురేంద్రబాబును రంగంలోకి దించాలని జేసీ ప్రయత్నాలు చేసినట్టు సమాచారం.

విజయనగరం జిల్లాలో టీడీపీ ప్రజాదర్బార్ సభలో అరుదైన దృశ్యం ఆవిష్కృతమైంది. ఓ వృద్ధురాలికి సీఎం చంద్రబాబు పాదాభివందనం చేశారు. వివరాల్లోకి వెళితే.. ప్రసంగం ముగియగానే సభావేదికపై నుంచి కిందకి నడుచుకుంటూ వెళుతుండగా.. పెంటమ్మ అనే వృద్ధురాలు స్టేజిపైకి వచ్చారు. ‘‘చంద్రబాబునాయుడికి ఓటు వెయ్యండి.. దొంగను నమ్మకండి.. బాబు చేసిన మేలును మరిచిపోవద్దు’’ అంటూ పిలుపునిచ్చారు. ఆ వృద్ధురాలి మాటలకు మురిసిపోయిన చంద్రబాబు ఆమె పేరు తెలుసుకుని.. ఆమెను మాట్లాడమని మైక్ ఇచ్చారు. అనంతరం ఆయన మాట్లాడుతూ.. ‘‘పెంటమ్మ ఆవేశం చూశారా.. ఆ ఉద్వేగం చూశారా.. ఆమెలో రాష్ట్ర ప్రజల కసి కనపడుతుంది. ఆమె డబ్బులు కోసం రాలేదు. టీడీపీని గుర్తించమని.. ముందుకు వచ్చారు. అదీ స్ఫూర్తి. అది అందరిలో ఉండాలి. ఆ స్ఫూర్తికి పాదాభివందనం చేస్తున్నా’’ అంటూ ఆమె కాళ్లకు మొక్కారు. దీంతో అక్కడున్నవారంతా ఆశ్చర్యపోయారు.

చంద్రబాబు మాట్లాడుతూ పార్లమెంట్‌లో ప్రధానమంత్రి నరేందరమోదీని టీడీపీ ఎంపీ గల్లాజయదేవ్‌ మిస్టర్‌ ప్రైమినిస్టర్‌ అని సంబోధించారని.. అంతే ప్రధాని ఆఫీసు నుంచి ఈడీకి ఫోన్‌ వెళ్లిందని.. వెంటనే జయదేవ్‌కి నోటీసులు వచ్చాయని సీఎం చంద్రబాబు అన్నారు. మోదీ వేధింపులు ఎలా ఉంటాయో దీన్నిబట్టి అర్థమవుతుందన్నారు. పీకల్లోతు అవినీతిలో ఉన్నవాళ్లు మాత్రం.. మోదీ ఆఫీసులో కూర్చొని ఉంటారని, దీన్నిబట్టి ఎవరు కాపలాదారో అర్థమవుతోందని అన్నారు. పెత్తందారీ వ్యవస్థ కోసం రాష్ట్రంపై దాడులు చేస్తారా? అంటూ సీఎం ఆగ్రహం వ్యక్తం చేశారు. ఏపీని దెబ్బతీసేందుకు కేసీఆర్‌ వస్తానంటున్నారని, రాష్ట్రం అభివృద్ధి చెందితే తెలంగాణ ఎత్తిపోతుందని కేసీఆర్‌‌కు భయం పట్టుకుందని.. అందుకే మనల్ని దెబ్బతీసి
అభివృద్ధి చెందకుండా చూసి రాజకీయం చేయాలనుకుంటున్నారని చంద్రబాబు విమర్శించారు.

ప్రజలు తమ ఓటుతో జగన్‌, కేసీఆర్‌, మోదీలకు బుద్ధి చెప్పాలని చంద్రబాబు పిలుపు ఇచ్చారు. హైదరాబాద్‌లో ఉన్నవారిని బెదిరిస్తున్నారని, నోటీసులు ఇస్తున్నారని సీఎం మండిపడ్డారు. టీడీపీ జోలికొస్తే ఖబడ్దార్‌.. జాగ్రత్త అంటూ చంద్రబాబు హెచ్చరించారు. మన పని అందరినీ కలపడమేనని... జగన్‌ పని అందరిని చంపడమేనని చంద్రబాబు అన్నారు. బొత్స సత్యనారాయణ, చిన్న శ్రీను రెచ్చిపోతున్నారని, తాను ఫోక్స్‌ వ్యాగన్‌ ఫ్యాక్టరీ తీసుకొస్తే.. బొత్స అవినీతి కారణంగా ఆ కంపెనీ వెళ్లిపోయిందన్నారు. ఏమీ పనిచేయని కేసీఆర్‌కు 88 సీట్లు వస్తే... రోజూ 18 గంటలు పనిచేసే టీడీపీకి 150 సీట్లు రావాలన్నారు. లబ్ధిదారులు బాధ్యత తీసుకుని టీడీపీని గెలిపించాలని చంద్రబాబు పిలుపు ఇచ్చారు.