ఆంధ్రప్రదేశ్‌లో రూ.21వేల కోట్ల పెట్టుబడులు పెట్టేందుకు వివిధ ఔషధ కంపెనీలు ముందుకొచ్చాయి. ఈ మేరకు సీఎం చంద్రబాబు సమక్షంలో సచివాలయంలో మంగళవారం అవగాహనా ఒప్పందాల (ఎంవోయూ)పై సంతకాలు జరిగాయి. రాష్ట్ర ఆర్థికాభివృద్ధి మండలి ముఖ్య కార్యనిర్వహణాధికారి జాస్తి కృష్ణకిశోర్‌, ఆయా సంస్థల యాజమాన్యాలు ఎంవోయూలపై సంతకాలు చేశాయి. ఈ భారీ పెట్టుబడులతో 57 వేల మందికి ప్రత్యక్షంగా, 1.65 లక్షల మందికి పరోక్షంగా ఉపాధి అవకాశాలు దక్కనున్నాయి. ఈ సందర్భంగా మాట్లాడిన చంద్రబాబు.. రాష్ట్రంలో పెట్టుబడులు పెట్టేందుకు అనువైన సులభతర వాణిజ్య విధానాన్ని అమలు చేస్తున్నట్లు చెప్పారు.
రాష్ట్ర ప్రభుత్వంతో ఒప్పందం కుదుర్చుకున్న కంపెనీల్లో మారుతీ ఇస్పాత్‌ అండ్‌ ఎనర్జీ ప్రైవేట్‌ లిమిటెడ్‌, తెలుగు ఫార్మాస్యూటికల్స్‌ అండ్‌ కెమికల్‌ అసోసియేషన్‌, హ్యులెట్‌ ఫ్యాకర్డ్‌ ఇండియా (హెచ్‌పీ), జెడ్‌టీటీ ఇండియా ప్రైవేటు లిమిటెడ్‌, ఓజోవతి ప్రైవేట్‌ లిమిటెడ్‌, అవాంజ్‌ ఇన్వె్‌స్టమెంట్‌ ప్రైవేట్‌ లిమిటెడ్‌, గోదావరి యూనివర్సిటీ, అకలైట్‌ ఇండియా ప్రై. లిమిటెడ్‌, సిల్వర్‌ ఓక్స్‌ ఇంటర్నేషనల్‌ స్కూల్‌, శ్రేయాంధ్ర ఇండస్ట్రియల్‌ హెంప్‌ ఆంధ్ర ప్రైవేటు లిమిటెడ్‌, డ్రీమ్‌వ్యాలీ రిసార్ట్స్‌, ఎస్‌ఏపీఎల్‌ ఇండస్ట్రిస్‌ ప్రైవేట్‌ లిమిటెడ్‌ ఉన్నాయి. ముఖ్యమంత్రి చంద్రబాబు సమక్షంలో పారిశ్రామిక రంగంలో రూ.21,000 కోట్ల పెట్టుబడులు పెట్టేందుకు ఒకేరోజు 14 ఒప్పందాలు కుదిరాయి. రాష్ట్ర ఆర్థికాభివృద్ధి సంస్థ (ఏపీఈడీబీ) ముఖ్య కార్యనిర్వాహకాధికారి (సీఈవో) జాస్తి కృష్ణకిశోర్‌తో పారిశ్రామిక సంస్థల ప్రతినిధులు చేసుకున్న ఈ ఒప్పందాలతో ప్రత్యక్షంగా, పరోక్షంగా 2.22 లక్షల మందికి ఉపాధి లభించనున్నది.
కర్నూలు జిల్లాలో 200 ఎకరాల్లో రూ.1,227.01 కోట్ల పెట్టుబడితో ఉక్కు, అనుబంధ పరిశ్రమల ఏర్పాటుకు మారుతీ ఇస్పాత్‌, ఎనర్జీ సంస్థ ముందుకొచ్చింది. ప్రకాశం జిల్లాలో 1,100 ఎకరాల్లో ‘ఔషధాలు-రసాయనాల సంఘం’ ఆధ్వర్యంలో రూ.9 వేల కోట్లతో ఎంఎస్‌ఎంఈ ఔషధ పరిశ్రమలు ఏర్పాటు. ప్రత్యక్షంగా, పరోక్షంగా 1.95 లక్షల మంది ఉపాధి. పశ్చిమ గోదావరి జిల్లాలో రూ.710 కోట్ల పెట్టుబడితో విశ్వవిద్యాలయం ఏర్పాటు. కంప్యూటర్‌, బిజినెస్‌, అగ్రికల్చర్‌, మెడికల్‌ కోర్సులను ప్రవేశపెట్టే ఈ యూనివర్శిటీలో 4 వేల మందికి ఉపాధి లభిస్తుంది. చిత్తూరు శ్రీసిటీలో రూ.700 కోట్లతో ఆప్టికల్‌ ఫైబర్‌ కేబుల్‌ తయారీ ప్లాంట్‌, రూ.1,800 కోట్లతో లిథియం బ్యాటరీల పరిశ్రమ. రూ.4,800 కోట్ల పెట్టుబడితో 20 చోట్ల ఎల్‌ఎన్‌జీ టెర్మినల్‌, ఎల్‌సీఎన్‌జీ స్టేషన్లు. సిల్వర్‌ వోక్స్‌ ఇంటర్నేషనల్‌ స్కూల్‌ ఆధ్వర్యంలో అమరావతిలో అంతర్జాతీయ ప్రమాణాలతో కూడిన విద్యా సంస్థ ఏర్పాటు. రూ.35 కోట్ల పెట్టుబడితో 500 మందికి ఉపాధి. ‘శ్రేయాంత్ర ఇండస్ట్రియల్‌ హేంప్‌ ఆంధ్ర ప్రయివేట్‌ లిమిటెడ్‌’ రూ.1,000 కోట్ల పెట్టుబడితో జనపనార పరిశ్రమను ఏర్పాటు చేయనుంది. డ్రీమ్‌ వ్యాలీ రిసార్ట్స్‌ ఆధ్వర్యంలో రాష్ట్రంలో రూ.205 కోట్ల పెట్టుబడితో వినోద పార్కు, అయిదు నక్షత్రాల గోల్ఫ్‌ రిసార్ట్‌. హెచ్‌పీ ఇండియా ఆధ్వర్యంలో త్రీడీ ముద్రణ సాంకేతిక కేంద్రం.