అధికార పక్షాన్ని ప్రసన్నం చేసుకోవటం కోసమో, లేక అధికార పక్షానికి భయపడో, వివిధ వర్గాలు, కొన్ని కార్యక్రమాలు చేస్తూ ఉంటాయి. అది ఏ పార్టీ అధికారంలో ఉన్నా జరుగుతూనే ఉంటుంది. అధికారపక్షం మెప్పు కోసం, అన్ని విధాలుగా ప్రయత్నాలు చేస్తూ ఉంటారు. వారు ఏ పాట పాడితే, అది అందుకుని, వారికి భజన చేస్తూ ఉంటారు. అయితే ఇది కొంత వరకు పరవాలేదు కానీ, ఏకంగా రూల్స్ మార్చేస్తూ, లేక విషయం కోర్టులో ఉండగా కూడా అత్యుత్సాహం ప్రదర్శించే వారు కూడా ఉంటారు. ఇలాంటి ఘటన ఆంధ్రప్రదేశ్ లో చోటు చేసుకుంది. జగన్ మోహన్ రెడ్డి ప్రభుత్వం, అమరావతి రాజధానిని మూడు ముక్కలు చేస్తూ నిర్ణయం తీసుకున్నా, ఇంకా ఆ నిర్ణయం అమలులోకి రాలేదు. ఇప్పటికీ ఆంధ్రప్రదేశ్ రాజధాని అమరావతి గానే ఉంది. గతంలో అసెంబ్లీ ఏకగ్రీవంగా అమరావతిని ఆంధ్రప్రదేశ్ రాజధానిగా తీర్మించినదే ఇప్పటికీ ఉంది. అందుకే కేంద్ర ప్రభుత్వం కూడా, అమరావతిని ఆంధ్రప్రదేశ్ రాజధానిగా గుర్తించి, ఇండియా పొలిటికల్ మ్యాప్ లో చేర్చింది.
ఇక హైకోర్టుని కూడా అమరావతిలో నోటిఫై చేసారు. అయితే విజయవాడలో ఒక ప్రముఖ స్కూల్ మాత్రం, అత్యుత్సాహం చూపించింది. దేశంలో మూడు రాజధానులు ఉన్న రాష్ట్రం ఏది అంటూ, వివిధ ప్రశ్నలు, ఆన్లైన్ పరీక్షల్లో ఇచ్చింది. స్కూల్లో అమరావతి రాజధాని ప్రశ్నపై విద్యార్థుల తల్లిదండ్రుల మండిపడ్డారు. స్కూల్ యాజమాన్యాన్ని ఫోన్ చేసి అమరావతి రైతులు, తల్లిదండ్రులు నిలదీసారు. అమరావతి రాజధాని అంశం కోర్టులో ఉండగా.. 3 రాజధానులని స్కూల్ యాజమాన్యం ఎలా డిసైడ్ చేస్తుందన్న రైతుల ప్రశ్నించారు. ఈ విషయం సోషల్ మీడియాలో వైరల్ అవ్వటంతో, మెయిన్ స్ట్రీమ్ మీడియాలో కూడా వచ్చింది. దీంతో ఆ స్కూల్ యాజమాన్యం దిగి వచ్చింది. తప్పు జరిగిందని, సరిదిద్దుకుంటామని, స్కూల్ యాజమాన్యం ప్రకటన చేసింది. దీంతో ఈ వివాదం సద్దుమణిగింది.