బుధవారం రాత్రి దావోస్ లో మహీంద్ర సంస్థ గ్రూప్ అధిపతి ఆనంద్ మహీంద్రతో భేటీ అయ్యారు. భేటీ తరువాత ఆనంద్ మహీంద్ర ట్వీట్ చేస్తూ, "నా ప్రతి దావోస్ పర్యటనలో, చంద్రబాబుని కలవటమే హైలైట్... చంద్రబాబు భారత దేశంలోనే ఒక inspiring లీడర్.. ఆయనతో భేటీ ఎంతో కొత్త శక్తిని ఇస్తుంది అంటూ ట్వీట్ చేసారు... ఆంధ్రప్రదేశ్‌లో మహీంద్ర గ్రూపు మరింత శక్తిమంతంగా తన ఉనికిని చాటాలని, వ్యాపార, సేవా కార్యక్రమాలను విస్తరించాలని ముఖ్యమంత్రి చంద్రబాబు నాయుడు కోరారు. సెజ్ తరహాలో ప్రపంచ శ్రేణి పారిశ్రామిక నగరం నిర్మించాలని ప్రణాళికను రూపొందిస్తున్న మహీంద్ర గ్రూపు ప్రతిపాదనను సీఎం ముందుంచినప్పుడు ఆయన స్పందిస్తూ ఆ ఇండస్ట్రియల్ సిటీ సెజ్‌ను తమ రాష్ట్రంలో ఏర్పాటు చేయాలని కోరారు. తాము అన్ని విధాలుగా సహకరిస్తామని అన్నారు.
సెజ్ ఏర్పాటుకు అనువైన ప్రాంతాన్ని ఎంపిక చేసుకోవడానికి తమ రాష్ట్రానికి రావాలని ముఖ్యమంత్రి ఆనంద్ మహీంద్రకు విజ్ఞప్తి చేశారు. రాజధాని అమరావతి నిర్మాణం, ప్రణాళిక లో భాగస్వామి కావాలని ఆహ్వానించారు. అమరావతిలో పర్యావరణ హితమైన ఎలక్ట్రిక్ వాహనాల తయారీలో సహకరించాలని చంద్రబాబు కోరారు. రాష్ట్రంలో నైపుణ్య శిక్షణాభివృద్ధిలో భాగస్వామి కావాలని సూచించారు. ఇదిలా ఉంటే ప్యానల్ చర్చలో ‘మీ విజన్ ఏమిటి’ అని ముఖ్యమంత్రి చంద్రబాబు ఆనంద్ మహీంద్ర ప్రశ్నించగా, ‘ఏపీని ప్రపంచానికే ఒక ఆదర్శ రాష్ట్రంగా తీర్చిదిద్దాలన్నది నా విజన్’ అని ముఖ్యమంత్రి సమాధానమిచ్చారు.
‘భారత్‌కు ఆదర్శంగా కాదా?’ అని సమయస్ఫూర్తితో ప్రశ్నించగా ముఖ్యమంత్రి స్పందిస్తూ మూడు నాలుగేళ్లలో భారత్‌కు ఆదర్శంగా రూపొందిస్తామని చెప్పారు. ‘మా రాష్ట్రాన్ని ప్రపంచానికే ఒక ఆదర్శ నమూనాగా తీర్చిదిద్దటం నా స్వప్నం’ అని చంద్రబాబు వివరించారు. ఇదిలా ఉంటే మహీంద్ర కంపెనీ ఫ్రాన్స్ దేశానికి అరకు కాఫీ ఘుమఘుమలను అందిస్తోంది. ఆంధ్రప్రదేశ్ కాఫీని ప్యారిస్‌లో మార్కెటింగ్ చేస్తోంది. తాను నాంది ఫౌండేషన్ అధిపతిగా ఉంటూ ఏపీలో ఫౌండేషన్‌ను ముఖ్యమంత్రి సంతృప్తికి అనుగుణంగా నడుపుతున్నానని చెప్పారు.