ఆంధ్రప్రదేశ్ రాష్ట్రంలోని ఉద్యోగులు, పెన్షనర్ల అకౌంట్లలో జీతాలు, పెన్షన్లు, ఫస్ట్ తారీఖు వచ్చినా ఇంకా జమ కాలేదు. దీనికి కారణం, రిజర్వ్ బ్యాంకులో తలెత్తిన సాంకేతిక లోపం అని తెలుస్తోంది. ప్రతి సారీ, ప్రతీ నెల 30, 31 అర్ధరాత్రిలోగా ఉద్యోగులు, పెన్షనర్ల జీతాలు డిపాజిట్ అవుతాయి. రాష్ట్ర ప్రభుత్వం కొత్తగా ప్రవేశపెట్టిన సీఎఫ్ఎమ్‌ఎస్ ద్వారా మూడు రోజుల క్రితమే ఉద్యోగులు, పెన్షనర్లకు సంబంధించిన ఫైళ్లను రిజర్వ్ బ్యాంక్ అధికారులకు అందజేశారు. 4.5లక్షల మంది ఉద్యోగులు, 3.6లక్షల మంది పెన్షనర్ల ఫైళ్లను అందుకున్నట్లు రిజర్వ్‌బ్యాంకు ధృవీకరించింది.
కాగా 31 అర్ధరాత్రి జీతాలు డిపాజిట్ అవకపోవడంతో ఆర్థిక శాఖ ఉన్నతాధికారులతో ఉద్యోగ సంఘాలు, పెన్షనర్ల సంఘాలు సంప్రదింపులు జరిపారు. కాగా నిన్న సాయంత్రం నుంచి రిజర్వ్‌బ్యాంకులో సాంకేతిక లోపం తలెత్తినట్లు గుర్తించిన అధికారులు ఈ లోపాన్ని సరిచేసి ఉదయం పది గంటలలోపు జీతాలు డిపాజిట్ చేయనున్నట్లు రాష్ట్ర ఆర్థికశాఖ అధికారులకు సమాచారం అందజేశారు. మధ్యాహ్నం వరకు జీతాలు డిపాజిట్ అవకపోవడంతో మరోసారి ఈ విషయాన్ని రాష్ట్ర ఆర్థిక శాఖ అధికారులు... రిజర్వ్‌బ్యాంకు అధికారుల దృష్టికి తీసుకెళ్లారు.
అయితే ఆర్బీఐ సర్వర్లు ఇంకా మొరాయిస్తూనే ఉన్నాయని ఈరోజు రాత్రి వరకు లేదా రేపు ఉదయానికి పెన్షన్లు, వేతనాలు పడే అవకాశం ఉందని వారు తెలియజేశారు. అయితే రేపు ఆదివారం కావడంతో ఆర్బీఐ సాంకేతి సిబ్బంది విధులు నిర్వహిస్తుందా? లేదా? అనేది ప్రశ్నగా మిగిలింది. సోమవారానికి అయినా, ఈ సమస్య పరిష్కారం అవుతుందో, మరింత లేట్ అవుతుందో అని ఉద్యోగస్తులు భావిస్తున్నారు. ఇది ఇలా ఉండగా, రాష్ట్ర ప్రభుత్వం ఇచ్చే వృధ్యాప్య పెన్షన్లు, మిగిలిన పెన్షన్లు మాత్రం, ఈ రోజే ఇచ్చేసారు. ప్రతి నెల ఒకటవ తేదిన, పెన్షన్లు ఇచ్చే సంగతి తెలిసిందే.