విజయవాడలో, దుర్గా ఘాట్ నుంచి పవిత్రసంగమం ప్రాంతానికి బోటు షికార్ ని ఏపీటీడీసీ అధికారులు అందుబాటులోకి తీసుకువచ్చారు.
దుర్గా ఘాట్ నుంచి పవిత్రసంగమం వరకు రాను, పోనుఒక్కరికి రూ.300 టిక్కెట్‌ ధరగా అధికారులు నిర్ణయించారు. ఈ టిక్కెట్‌తో దుర్గాఘాట్‌ నుంచి బయలుదేరి, భవాని ఐలాండ్ కు వెళ్లి, అక్కడ నుంచి పవిత్రసంగమం ప్రాంతానికి చేరుకుంటుంది. అక్కడ ఎంత సేపైనా పర్యాటకులు గడపవచ్చు. తిరుగు ప్రయాణంలో బోటు వచ్చినపుడు టిక్కెట్‌ చూపితే సరిపోతుంది.
ఎదో ఒక వైపు మాత్రమే ప్రయాణం చెయ్యాలి అనుకునే వారు రూ.200 టిక్కెట్‌ను కొనుగోలు చేయాల్సి ఉంటుంది. ఏపీటీడీసీ అధికారులు మెకనైజ్డ్‌ బోట్లతో ట్రయల్‌ రన్‌వేశారు. ఎలాంటి ఇబ్బందులు లేకపోవటంతో ఈ సరికొత్త ప్యాకేజీని అందుబాటులోకి తీసుకువచ్చారు.
ఇది వరకు బోటు షికారు కి కాని, భవాని ఐలాండ్ కి కాని, వెళ్ళాలి అని, హరిత బెర్మ్‌పార్క్‌ దాకా వెళ్ళాల్సి వచ్చేది. దసరా ఉత్సవాలు, ట్రాఫిక్‌ ఆంక్షల కారణంగా, బోటింగ్‌ యూనిట్‌ను దుర్గాఘాట్‌కు మార్చారు అధికారులు.