విజయవాడలో శరన్నవరాత్రి ఉత్సవాలను, తిరుపతిలో బ్రహ్మోత్సవాలను మంచి అవకాశాలుగా గుర్తించడంలో, పర్యాటక ఈవెంట్లుగా మలచడంలో మూడు ముఖ్యశాఖల అధికారులు తగిన శ్రద్ధ పెట్టలేకపోయారని ముఖ్యమంత్రి ఆవేదన వెలిబుచ్చారు. నిన్న అమరావతిలో జరిగిన సమీక్షా సమావేశంలో ముఖ్యమంత్రి ఈ వ్యాఖ్యలు చేశారు..
వచ్చిన ప్రతి ఒక్క అవకాశాన్నీ రాష్ట్ర ఆర్థిక అభివృద్ధిని ఊపందుకునేలా చేసేందుకు ఉపయోగించుకోవాలన్నదే తన ఆలోచనగా చెప్పారు. అమ్మవారి దర్శనార్థం విజయవాడకు వచ్చే భక్తులను మరింతగా ఆకర్షించే ఏర్పాట్లు చేసి వుండాల్సిందని, దూర ప్రాంతాల నుంచి వచ్చే వారు కనీసం రెండు రోజులు నగరంలోని వివిధ హోటళ్లలో ‘స్టే’ చేసేలా ఉంచగలిగితే బాగుండేదని అభిప్రాయపడ్డారు.
నగరాలు, పట్టణ ప్రాంతాలలో ఇటువంటి అవకాశాలను ఉపయోగించుకుని ఆర్థిక కార్యకలాపాల్లో జోరు పెంచడం అవసరం అని చెప్పారు. అదే రాష్ట్రాభివృద్ధికి సంకేతమని అన్నారు. దేవాదాయ, పర్యాటక, పురపాలక శాఖలు మూడూ మరింత సమన్వయం చేసుకుని పనిచేసి వుంటే ఫలితాలు తప్పకుండా కనిపించేవన్నారు.
పండగలు, విశేష ఉత్సవాలలో ఫుడ్ కోర్టులు, క్రాఫ్టు బజార్లు, వాణిజ్య ప్రదర్శనలు, సాంస్కృతిక కార్యక్రమాలు ప్రజలను ప్రబలంగా ఆకట్టుకుంటాయని, పర్యాటకానికి ఊతం ఇస్తాయని అన్నారు.