శుక్రవారం కశ్మీర్ మాజీ సీఎం మెహబూబా ముఫ్తీతో సీఎం చంద్రబాబు మాట్లాడారు. రాజ్యాంగ పరిరక్షణ కోసం కృషి చేయాలని చంద్రబాబు ట్విట్టర్‌లో కోరారు. జమ్మూకశ్మీరు అసెంబ్లీ రద్దును ఫాసిస్టు చర్యగా ముఖ్యమంత్రి చంద్రబాబు అభివర్ణించారు. నరేంద్ర మోదీ ప్రభుత్వ రాజ్యాంగ వ్యతిరేక చర్యలకు ఇది పరాకాష్ఠగా పేర్కొన్నారు. రాజ్యాంగ నిర్మాతల ఆదర్శాలను కాలరాస్తూ సమాఖ్య స్ఫూర్తికి తూట్లు పొడిచేలా బీజేపీ వ్యవహరిస్తోందని గురువారం ఓ ప్రకటనలో ధ్వజమెత్తారు. నియంతృత్వ పెత్తందారీ పోకడలకు బీజేపీ నేతలు మూల్యం చెల్లించక తప్పదన్నారు. సీబీఐ కార్యాలయాన్ని సీబీఐ అధికారులే సీజ్‌ చేసే వరకూ వచ్చిందని..ప్రత్యర్థులపై కక్ష సాధించేందుకు ఐటీ దాడులు చేయిస్తూ.. ప్రతి వ్యవస్ధను దుర్వినియోగం చేస్తూ.. బీజేపీ నేతలు వాటి ప్రతిష్ఠను దిగజారుస్తున్నారని వ్యాఖ్యానించారు. రాబోయే ఎన్నికల్లో వారికి తగిన పాఠం చెప్పడానికి దేశ ప్రజలు ఎదురు చూస్తున్నారని పేర్కొన్నారు.
చంద్రబాబు ట్వీట్ చేస్తూ, "Spoke with @MehboobaMufti ji over the phone today. Expressed solidarity with all the leaders fighting against injustice to save and protect democracy. జమ్ము కాశ్మీర్ అసెంబ్లీని అర్ధాంతరంగా రద్దు చేయడాన్ని ఖండిస్తున్నాం. గడువు తీరకముందే శాసనసభను రద్దు చేయడం అప్రజాస్వామికం. కేంద్రంలో @narendramodi ప్రభుత్వ రాజ్యాంగ వ్యతిరేక చర్యలకు ఇది పరాకాష్ట. రాజకీయాలకు అతీతంగా దేశం మొత్తం ఈ దుశ్చర్యను ముక్త కంఠంతో ఖండించాలి. దానికి మెహబూబా ముఫ్తీ ట్వీట్ చేస్తూ "Thank you for your support Naidu ji at this juncture when J&K is going through a difficult phase." అని అన్నారు.
జాతీయ స్థాయిలో బీజేపీ వ్యతిరేక కూటమి బలోపేతంపై చంద్రబాబు జోరు పెంచుతున్న విషయం తెలిసిందే. దేశ రాజకీయాల్లో బీజేపీకి బలమైన ప్రత్యామ్నాయం, ప్రధాన ప్రతిపక్షమైన కాంగ్రెస్‌ను... ఇతర పార్టీలను ఒక తాటిపైకి తెచ్చేలా చొరవ తీసుకోవాలని నిర్ణయించారు. నాలుగేళ్ల పాలనలో ఎన్డీయే దేశంలోని పలు వ్యవస్థలను నాశనం చేసిందని చంద్రబాబు ఆరోపించారు. సీబీఐ, ఆర్బీఐ లాంటి స్వయం ప్రతిపత్తి ఉన్న సంస్థలను దెబ్బతీశారని కేంద్రంపై ఆయన నిప్పులు చెరుగుతూనే ఉన్నారు. ప్రస్తుతం దేశంలో ప్రజాస్వామ్యాన్ని రక్షించుకోవాల్సిన సమయం ఆసన్నమైందని హెచ్చరిస్తున్నారు. బీజేపీ విధానాల వల్ల దేశం ప్రమాదంలో పడిందని చంద్రబాబు ఆందోళన వ్యక్తం చేస్తున్నారు. దేశాన్ని ప్రమాదం నుంచి బయటపడేసేందుకే... తాను బాధ్యత తీసుకున్నాను. 40ఏళ్లుగా ప్రజాస్వామ్య విలువలు చూశానని, ప్రధాని మోదీ, అమిత్‌షా ఎన్ని దాడులు చేసినా భయపడేది లేదని ఆయన పదేపదే స్పష్టం చేస్తున్నారు.