రాష్ట్రానికి ప్రధాని మోదీ రాక మరో కుట్రలో భాగమని, దీన్ని నిరసిస్తూ ఎక్కడికక్కడ ధర్మపోరాట నిరసనలు చేయాలని ముఖ్యమంత్రి చంద్రబాబు నేతలకు పిలుపునిచ్చారు. రాష్ట్ర ప్రజల నిరసన ఇవాళ ప్రతిబింబించాలని సూచించారు. పార్టీ ముఖ్యనాయకులు, కార్యకర్తలతో ముఖ్యమంత్రి చంద్రబాబు శుక్రవారం టెలీకాన్ఫరెన్స్‌ నిర్వహించారు. కేంద్రం ప్రకటించిన విశాఖ జోన్ ఓ మాయా జోన్ అని, భాజపా దీనికి తగిన మూల్యం చెల్లించుకుంటుందని విమర్శించారు. ‘మోదీ పర్యటనకు వ్యతిరేకంగా నేడు రాష్ట్రవ్యాప్తంగా నల్లచొక్కాలతో నిరసన తెలపాలి..., నేనుకూడా నల్లచొక్కా ధరిస్తా’నని చంద్రబాబు నాయుడు అన్నారు. ఈ సందర్భంగా మాట్లాడుతూ... నరేంద్రమోదీ విశాఖ పర్యటన సందర్భంగా నిర్వహించే ధర్మపోరాట నిరసనలతో రాష్ట్రం హోరెత్తాలని టీడీపీ శ్రేణులకు పిలుపునిచ్చారు. నల్ల బెలూన్లు, నల్లజెండాలతో నిరసన తెలపాలన్నారు.
మరో ఐదారు రోజుల్లో ఎన్నికల షెడ్యూల్ ప్రకటించే అవకాశం ఉన్నందున, అన్నింటికీ సిద్ధంగా ఉండాలని నేతలకు దిశానిర్దేశం చేశారు. 12 పార్లమెంట్ నియోజకవర్గాల సమీక్షలు పూర్తి చేసుకున్నామని చెప్పారు. మిగిలిన 13 నియోజకవర్గాల సమీక్షలు కూడా త్వరలోనే పూర్తి చేస్తామని తెలిపారు. యుద్ధం గురించి రెండేళ్ల క్రితం చెప్పారని పవన్ వ్యాఖ్యలే భాజపా దుర్మార్గ రాజకీయాలకు రుజువని చంద్రబాబు అన్నారు. తాజాగా యడ్యూరప్ప వ్యాఖ్యలు అందుకు సాక్ష్యంగా నిలుస్తున్నాయని చెప్పారు. నిన్న కడప బహిరంగ సభలో పవన్ కళ్యాణ్ మాట్లాడుతూ, ఎన్నికల సమయంలో బీజేపీ యుద్ధం చేస్తుందని, తనకు రెండేళ్ళ ముందే తెలుసని చెప్పిన విషయం తెలిసిందే.
మరో పక్క, తెలుగుదేశం ఓట్లను తొలగించేందుకు ప్రయత్నిస్తోందని వైకాపా తప్పుడు ఫిర్యాదులు చేస్తోందని చంద్రబాబు మండిపడ్డారు. హైదరాబాద్ కేంద్రంగా ఓట్ల తొలగింపు కుట్ర జరుగుతోందన్నారు. ఫారం-7ను దుర్వినియోగం చేస్తున్నారని దుయ్యబట్టారు. కట్టల కట్టలు దరఖాస్తులు పంపిస్తున్నారన్న విషయం పొన్నూరు, నర్సీపట్నంలో బయటపడిందని గుర్తుచేశారు. వేలాది ఓట్లు తొలగించాలని తప్పుడు ఫిర్యాదులు చేస్తున్నారని, వైకాపా కుట్రలపై అప్రమత్తంగా ఉండాలని సూచించారు. వారి కుట్రలపై ఎన్నికల కమిషన్‌కు ఫిర్యాదు చేయాలని ఆదేశించారు. దొంగే దొంగ అనడం వైకాపాకు పరిపాటిగా మారిందని ఎద్దేవాచేశారతు. వాళ్లే ఓట్లు తొలగించి తెదేపాపై తప్పుడు ప్రచారం చేస్తున్నారని ధ్వజమెత్తారు.