నా వంటిపై బట్టలు చించిన పోలీసులకు రేపు ఒంటిపై బట్టలు ఉంటాయా అంటూ మాస్ వార్నింగ్ ఇచ్చారు మాజీ ఎమ్మెల్యే చింతమనేని ప్రభాకర్. రేపు నా పుట్టిన రోజు సందర్భంగా ఏలూరు ప్రభుత్వ ఆసుపత్రి వద్ద రక్తదాన శిబిరం ఏర్పాటు చేయటం నేను చేసిన తప్పా అని ప్రశ్నించారు. హరిరామ జోగయ్య అదే ఆసుపత్రి వద్ద ఉన్నారనే వంకతో నా కార్యక్రమాన్ని అడ్డుకుని, తన పైన దాడి చేశారని ఆరోపించారు. ఇప్పటికే నాపై 31కేసులు పెట్టారు, నేను అన్నింటికీ తెగించి ఉన్నానన్నారు. జగన్మోహన్ రెడ్డి తాత దిగొచ్చినా తెలుగుదేశం పార్టీని ఏమీ చేయలేరని ధీమా వ్యక్తం చేశారు. నా చొక్కా చించిన పోలీసులని వదిలిపెట్టే ప్రసక్తి లేదన్నారు. చినిగిన చొక్కాతో పార్టీ కేంద్ర కార్యాలయానికి వచ్చి మీడియాతో మాట్లాడారు చింతమనేని. ఏం తప్పు చేశానని తన చొక్కా చించారని ప్రశ్నించారు. డీఎస్పీ సత్యనారాయణ దురుసుగా ప్రవర్తించారని ఆవేదన వ్యక్తంచేశారు. ఇప్పటికే తనపై 31 కేసులు పెట్టారని, దేనికీ భయపడేది లేదన్నారు. అత్యుత్సాహం చూపిన పోలీసులకు రిటర్న్ గిఫ్ట్ ఉంటుందని టీడీపీ మాజీ ఎమ్మెల్యే చింతమనేని ప్రభాకర్ హెచ్చరించారు.