ముఖ్యమంత్రి వైఎస్ జగన్ మోహన్ రెడ్డి బయోపిక్ వ్యూహం సినిమాకి నిర్మాత దాసరి కిరణ్ కి టీటీడీ పాలకమండలి సభ్యత్వం కానుకగా ఇచ్చారు. జగన్ గురువు స్వరూపానంద సిఫారసుతో రియల్ ఎస్టేట్ వ్యాపారి బూదాటి లక్ష్మీనారాయణపై గతంలో బోర్డ్ మెంబెర్ ఇవ్వగా, ఇప్పుడు సీబీఐ కేసు నమోదు చేసి అరెస్టు చేసింది. దీంతో లక్ష్మీనారాయణ తన పదవికి రాజీనామా చేసారు. ఖాళీ అయిన టిటిడి పాలకమండలి సభ్యత్వాన్ని దాసరి కిరణ్ కి ఇవ్వడం తీవ్ర చర్చనీయాంశం అయ్యింది. టిడిపి ప్రభుత్వ హయాంలో శేఖర్ రెడ్డికి టీటీడీ పాలకమండలి సభ్యత్వాన్ని ఇవ్వడాన్ని తప్పుబట్టిన జగన్ ..అదే శేఖర్ రెడ్డికి తాను సీఎం అయిన వెంటనే పేరు జనాలు గుర్తు పట్టకుండా టీటీడీ మండలిలోకి తీసుకున్నారు. టీటీడీ పాలకమండలిని వైసీపీ క్విడ్ ప్రోకో వ్యవహారాల వేదికగా మార్చేశారనే ఆరోపణలున్నాయి. వివాదాస్పద నిర్ణయాలతో ఇప్పటికే టీటీడీ ప్రతిష్ట మంట గలిపారనే ఆరోపణలు ఎదుర్కొంటున్న సీఎం జగన్ .. ఇప్పుడు తన జీవితాన్ని సినిమాగా తీస్తున్న నిర్మాతకి ప్రతిఫలంగా టిటిడి పాలకమండలి సభ్యుడిని చేసేశారు. ముఖ్యమంత్రి జగన్ బయోపిక్ ``వ్యూహం`` సినిమాకి రాంగోపాల్ వర్మ దర్శకత్వం వహిస్తుండగా, ఈ సినిమాని దాసరి కిరణ్ కుమార్ నిర్మిస్తున్నారు. తన జీవితాన్ని సినిమాగా తీస్తున్నారనే ఒకే ఒక కారణంతో దాసరి కిరణ్ కుమార్ కీ టీటీడీ పాలకమండలి పదవి కట్టబెట్టడంపై వైసీపీలోనే తీవ్ర చర్చ నడుస్తోంది.