కేంద్ర ఎన్నికల సంఘం సభ్యుల మధ్య మరోసారి అభిప్రాయభేదాలు భగ్గుమన్నాయి. ముగ్గురు సభ్యుల్లో ఒకరైన అశోక్‌ లవాసా ఎన్నికల సంఘం నిర్వహిస్తున్న సమావేశాలకు గైర్హాజరవుతున్నట్లు తెలుస్తోంది. ప్రచార సభల్లో నేతలు ఎన్నికల కోడ్‌ను ఉల్లంఘిస్తున్నా ఎలాంటి చర్యలు తీసుకోకపోవడమే ఇందుకు ప్రధాన కారణం. దీంతోపాటు ఎన్నికల కోడ్‌ను ఉల్లంఘిస్తున్నారంటూ ప్రధాని నరేంద్ర మోదీ, భాజపా జాతీయాధ్యక్షుడు అమిత్ షాలపై కాంగ్రెస్‌ ఫిర్యాదు చేసిన అంశంలో ఈసీ క్లీన్‌చిట్‌ ఇచ్చిన విషయంలోనూ ఆయన అసంతృప్తితో ఉన్నారు. ఈవిషయమై ఆయన మే4న కేంద్ర ఎన్నికల కమిషనర్‌ సునీల్‌ అరోడాకు లేఖ కూడా రాశారు.
క్లీన్‌ చిట్‌ ఇచ్చే సమయంలో తన అభిప్రాయాలను పరిగణనలోకి తీసుకోవడం లేదని, మైనారిటీ నిర్ణయాలకు ప్రాధాన్యం దక్కడం లేదని అశోక్‌ ఆరోపించారు. ఈసీ ఆదేశాల్లో మైనారిటీ నిర్ణయాలనూ జత చేయాలని లేఖలో పేర్కొన్నారు. లేఖ రాసినప్పటికీ ఎన్నికల ప్రవర్తనా నియమావళి ఉల్లంఘన కేసులను ఈసీ సీరియస్‌గా తీసుకోలేదని, ఈ విషయంపై ఆయన మనస్తాపం చెందారని అశోక్‌ సన్నిహితులు మీడియాకు తెలిపారు. అరోడా, మరో సభ్యుడు సుశీల్‌ చంద్ర తీసుకుంటున్న నిర్ణయాలతో ఆయన బలవంతంగా సమావేశాలకు దూరంగా ఉండాల్సివస్తోందని వారు తెలిపారు. ప్రధాని మోదీ కొద్ది రోజుల క్రితం మాజీ ప్రధాని రాజీవ్‌ గాంధీ మీదా వ్యాఖ్యలు చేసిన విషయం తెలిసిందే.
దీనిపైనా ఈసీ ఎలాంటి చర్యలు తీసుకోలేదని, కనీసం ఇలాంటి వ్యాఖ్యలు చేయకుండా అభ్యర్థులను వారించడం వంటివి కూడా ఈసీ చేయలేదని సన్నిహితుల ముందు అశోక్‌ వాపోయినట్లు తెలుస్తోంది. ఈ విషయంపై అశోక్‌..అరోడాకు ఎన్ని సందేశాలు పంపినా వాటికి ఆయన సమాధానం ఇవ్వలేదని, దీంతో మనస్తాపం చెంది అశోక్‌ ఈసీ సమావేశాలకు దూరంగా ఉంటున్నారని సమాచారం. ఇప్పటికే అన్ని రాజ్యాంగ సంస్థలు, మోడీ, అమిత్ షా నాయకత్వంలో నాశనం అయ్యాయని, దేశమంతా ఆందోళన చెందుతున్న వేళ, ఇప్పుడు ఏకంగా ఎన్నికల కమిషన్ లో కూడా విభేదాలు రావటం చూస్తే, ప్రజలు సరైన నిర్ణయం తీసుకోకపొతే, ఈ దేశాన్ని ఇక ఆ దేవుడే రక్షించాలి.