ఆంధ్రప్రదేశ్ ప్రభుత్వానికి, ప్రతి రోజు హైకోర్ట్ లో ఏదో ఒక ఎదురు దెబ్బ తగులుతూనే ఉన్నాయి. అనుభవారాహిత్యమో, లేక దూకుడుగా, తొందరపాటుగా చేస్తున్న నిర్ణయాలో ఏమో కాని, జగన్ ప్రభుత్వానికి, ప్రతి రోజు ఏదో ఒక ఎదురు దెబ్బ అటు హైకోర్ట్ లో కాని, ఇటు సుప్రీం కోర్ట్ లో కాని తగులుతూనే ఉంది. నిన్న కాక మొన్న వైసీపీ రంగులు పై, హైకోర్ట్ లో ఎదురు దెబ్బ తగలటం, అలాగే సుప్రీం కోర్ట్ కి వెళ్ళటం, అక్కడ కూడా, మళ్ళీ ఎదురు దెబ్బ తగలటం జరిగిన విషయం తెలిసిందే. అయితే ఇప్పుడు మరో విషయంలో, జగన్ ప్రభుత్వానికి ఎదురు దెబ్బ తగిలింది. రాష్ట్ర వ్యాప్తంగా ఉన్న పాఠశాలల్లో ఆంగ్ల మాధ్యమాన్ని తప్పనిసరి చేస్తూ ప్రభుత్వం గతంలో జారీచేసిన ఉత్తర్వులు.. తాజాగా రద్దు అయ్యాయి. గత ఉత్తర్వులను సవాల్ చేస్తూ ఏలూరుకు చెందిన డాక్టర్ గుంటుపల్లి శ్రీనివాస్, భాజపా నాయకుడు సుదీష్‌ రాంబొట్ల శ్రీనివాస్ దాఖలు చేసిన ప్రజా ప్రయోజన వ్యాజ్యంపై ఈ రోజు రాష్ట్ర ఉన్నత న్యాయస్థానం తీర్పును వెలువరించింది. ఆంధ్రప్రదేశ్ ప్రభుత్వం జారీ చేసిన జీవో 81, 85 లను రద్దు చేస్తూ తీర్పు ఇచ్చింది.
గత ఏడాది, ఏకపక్షంగా, ఆంధ్రప్రదేశ్ ప్రభుత్వం, ఇంగ్లీష్ మీడియం వైపు అడుగులు వేసింది. అయితే ఈ నిర్ణయం పై, అన్ని వర్గాల నుంచి వ్యతిరేకత వచ్చింది. ఎక్కడైనా ఆప్షన్స్ ఇస్తారు కాని, ఇలా ఒకేసారి బలవంతంగా ఇంగ్లీష్ మీడియం తప్పనిసరి అంటే ఎలా అంటూ, విమర్శలు వచ్చాయి. గతంలో చంద్రబాబు గారి హయంలో, మునిసిపల్ స్కూల్స్ లో, ఆప్షన్ పెట్టి, ఎవరికి కావలసినట్టు వారిని, ఇంగ్లీష్ కాని, తెలుగు మీడియం కాని, ఎంచుకునే వీలు కల్పించారు. అయితే, జగన్ మోహన్ రెడ్డి ప్రభుత్వం రాగానే, అన్ని రకాల ప్రభుత్వ స్కూల్స్ లో, ఈ ఏడాది నుంచే కేవలం ఇంగ్లీష్ మీడియం చేస్తూ, అందరూ ఇంగ్లీష్ లోనే చదువుకోవాలి అంటూ, ప్రభుత్వం ఒక నిర్బంధ జీవో తీసుకు వచ్చింది.
అయితే, ఒక పక్క అందరూ మాతృభాషకు ప్రాముఖ్యత ఇవ్వాలని చెప్తుంటే, జగన్ ప్రభుత్వం ఇలా తమ ఇష్టం వచ్చినట్టు చెయ్యటం పై, విమర్శలు వచ్చాయి. చంద్రబాబు నాయుడు కూడా, ఇలా నిర్భంధం వద్దు అని, ఆప్షన్స్ ఇవ్వాలని, ఎవరికీ కావలసింది వారు ఎంచుకుంటారని చెప్పారు. అలాగే టీచర్స్ కి కూడా ఆ సామర్ధ్యం లేదని, వాళ్లకు ట్రైనింగ్ ఇవ్వటం ఇవన్నీ టైం తీసుకుంటాయని, ఒక ఫేజ్ వైజ్ వెళ్లాలని, సలహా ఇచ్చారు. అయినా ప్రభుత్వం పట్టించుకోలేదు. తెలుగు మీడియం అవసరం లేదని, మీ పిల్లలు ఎక్కడ చదువుతున్నారు అంటూ, ఎదురు దాడి చేసారు. ఇక్కడ ఆప్షన్స్ ఇవ్వండి, రాజ్యాంగం ప్రకారం, మాతృభాషకు ప్రాధాన్యత ఇవ్వండి, ప్రపంచంలో ఎక్కడా లేని విధానం వద్దు అని ఎంత చెప్పినా వినకుండా ముందుకు వెళ్లి, ఈ రోజు హైకోర్ట్ లో ఎదురు దెబ్బ తగిలే పరిస్థితి వచ్చింది.