సీబీఐ మాజీ జేడీ లక్ష్మీనారాయణ గురించి తెలియని వారు, రెండు తెలుగు రాష్ట్రాల్లో ఉండరు. గాలి జనార్ధన్ రెడ్డి, జగన్ మోహన్ రెడ్డి ల అక్రమ ఆస్థుల కేసులు విచారించిన వ్యక్తిగా మంచి పేరు ఉంది. సిబిఐలో వాలంటరీ రిటైర్మెంట్ తీసుకుని, ప్రస్తుతం రాజకీయాల వైపు నడుస్తున్న లక్ష్మీనారాయణ, ఏబీఎస్ ఛానల్ లో, ఓపెన్ హార్ట్ విత్ ఆర్కేలో ఇంటర్వ్యూ ఇచ్చారు. ప్రస్తుతం పరిస్థితులు చూస్తుంటే, సీబీఐ విశ్వసనీయతపై అనుమానాలు తలెత్తే పరిస్థితి నెలకొందని సీబీఐ మాజీ జేడీ లక్ష్మీ నారాయణ తెలిపారు. ఏపీ ప్రతిపక్ష నేత జగన్, కర్ణాటక మాజీ మంత్రి గాలి జనార్దన్ రెడ్డి లపై నమోదయిన కేసులను విచారించేటప్పుడు ఎలాంటి ఒత్తిడికి లోను కాలేదని వెల్లడించారు.
ఈ రెండు కేసుల విచారణతో తన ఇమేజ్ అమాంతం పెరిగిందని వ్యాఖ్యానించారు. తన అసలు పేరు వీవీ లక్ష్మీ నారాయణ కన్నా జేడీ లక్ష్మీ నారాయణగానే తాను ఎక్కువ ఫేమస్ అయ్యానని పేర్కొన్నారు. రహస్యంగా బెయిల్ కోసం తనకు డబ్బు ఆఫర్ చేసేంత ధైర్యం జగన్, గాలి జనార్ధనరెడ్డికి లేదని లక్ష్మీ నారాయణ అభిప్రాయపడ్డారు. రాజకీయాలతో ముడిపడిఉన్న ఈ కేసుల విచారణ సందర్భంగా తనకు ఎలాంటి ఇబ్బందులు రాలేదనీ, ఒకవేళ ఒత్తిడి వచ్చినా తప్పుకునేవాడిని కాదని తెలిపారు. తాను అమ్ముడుపోయే వ్యక్తిని కాదని ఆయన స్పష్టం చేశారు. కోర్టుల్లో సీబీఐ దాఖలు చేస్తున్న కేసులు వీగిపోవడం, అంతర్గత కుమ్ములాటలు చూస్తుంటే సంస్థ విశ్వసనీయత దెబ్బతింటోందని వ్యాఖ్యానించారు.
తాను రాజకీయాల్లోకి రావాలనుకుంటున్నట్లు చెప్పాగానే చాలామంది.. ‘ఎందుకయ్య బురదలోకి దిగుతావు?’ అని ప్రశ్నించినట్లు జేడీ తెలిపారు. దీంతో తాను స్పందిస్తూ..‘మనం బురద అని దిగకుంటే ఆ బురద ఇంకా కంపు కొడుతుంది. మంచివాళ్ల మౌనం దేశానికి ప్రమాదకరం. మంచి చేయాలన్న తపన ఉంది. ఓపిక ఉంది. అందుకే రాజకీయాల్లోకి రావాలనుకుంటున్నా’ అని జవాబిచ్చినట్లు వెల్లడించారు. భావసారూప్యమున్నవాళ్లు ఎవరైనా రాగలిగితే వాళ్లతో చర్చించడానికి తాను సిద్ధంగా ఉన్నానని తెలియజేశానన్నారు. ఎవరూ రాకపోతే స్వతంత్రంగా ముందుకెళ్తాని, ఇబ్బందేమీ లేదన్నారు. చాలెంజ్‌గా ముందుకు వెళ్లడం తానకెప్పుడూ ఇష్టమని, అసాధ్యమేమీ కాదనే అభిప్రాయాలున్నాయని వివరించారు.