గుంటూరు నగరంలో ఇవాళ పెను ప్రమాదం తప్పింది. పాత గుంటూరులోని మణి హోటల్ సెంటర్‌లో శనివారం మధ్యాహ్నం ఒక్క సారిగా మూడంతస్థుల భవనం కుప్పకూంది. అయితే ఈ భవనంలో ఎవరూ లేకపోవటంతో, ఎటువంటి ప్రాణనష్టం జరగలేదు, కాని ఈ ఘటన స్థానికంగా తీవ్ర కలకలం సృష్టించింది... భవనం కూలిన సమయంలో మిగతా ఆస్థులుకు కూడా ఏమి నష్టం జరగలేదు, అలాగే ప్రాణ నష్టం కూడా ఏమి జరగకపోవటంతో అందరూ ఊపిరి పీల్చుకున్నారు.
కృష్ణా పుష్కరాల సమయంలో గుంటూరు నగరంలోని ముఖ్యమైన రోడ్లను విస్తరించాలని అధికారులు నిర్ణయించారు. అయితే సమయం దాటిపోవడంతో అధికారులు ఆ పనులను నిలిపివేశారు. అలా నిలిపేసిన పనులను తాజాగా మళ్లీ మొదలుపెట్టారు. ఇందులో భాగంగా నందివెలుగు రోడ్డులోని మణి హోటల్ సెంటర్‌లో రోడ్డు విస్తరణ పనులకు అడ్డుగా ఉన్న పసుపులేటి నరసింహారావుకు చెందిన భవంతిని 60 శాతం మేర కూల్చేశారు.
దీనికి సంబందించి ఇంటి యజమానులకు నోటీసులు కూడా ఇచ్చారు. నోటీసులు అందుకున్న ఇంటి యజమానులు ఆ ఇంటిని ముందుగానే ఖాళీ చేశారు. అయితే, ఈ తవ్వకాల్లో భవంతి పునాది దెబ్బతింటంతో, శనివారం మధ్యాహ్నం పునాది కుంగిపోవటంతో భవంతి ఒక్కసారిగా కుప్పకూలింది. అక్కడ మరమ్మతులు చేసేందుకు వచ్చిన కార్మికులు బయటికి పరుగులు తీయడంతో పెను ప్రమాదం తప్పింది.