ఎలక్ట్రానిక్‌ ఓటింగ్‌ యంత్రాలు (ఈవీఎం) ఇప్పటికీ లోపభూయిష్టంగానే ఉన్నాయని, వాటిని ఎవరైనా హ్యాక్‌ చేసేందుకు అవకాశం ఉందని ఆంధ్రప్రదేశ్‌ ప్రభుత్వ సాంకేతిక సలహాదారు వేమూరు హరికృష్ణ ప్రసాద్‌ పేర్కొన్నారు.రాష్ట్రంలో ఈ నెల 11న పోలింగ్‌ సందర్భంగా ఈ విషయం రుజువైందని తెలిపారు. ఓటు వేశాక వీవీప్యాట్‌లో 7 సెకన్లపాటు కనిపించాల్సిన స్లిప్‌ 3 సెకన్లే కనిపించిందంటే ఎక్కడో తేడా జరిగినట్టేనని, కోడ్‌ మారి ఉండవచ్చని పేర్కొన్నారు. ఈవీఎంలపై అనేక సందేహాలు వ్యక్తమవుతున్న నేపథ్యంలో మళ్లీ పేపర్‌ బ్యాలెట్‌ విధానానికే వెళ్లడం మంచిదని హరిప్రసాద్ అన్నారు.
ఈవీఎం పనితీరుపై ప్రశ్నిస్తే సమాధానం చెప్పుకోలేని పరిస్థితుల్లో ఈసీ కుంటిసాకులు చెబుతూ తప్పించుకునే ప్రయత్నం చేస్తోందని హరిప్రసాద్ విమర్శించారు. ప్రధాన ఎన్నికల కమిషనర్‌ సునీల్‌ అరోరాకు తనకు మధ్య జరిగిన చర్చల సారాంశాన్ని వివరించారు. ‘‘ఈనెల 10న ఎవరో వీవీప్యాట్‌ యంత్రాన్ని ప్రదర్శిస్తున్న వీడియో సోషల్‌ మీడియాలో వైరల్‌ అయ్యింది. అందులో ఏడు సెకన్లకు బదులుగా 3 సెకన్లే అభ్యర్థి పేరు, గుర్తు కనిపించాయి. ఇదే విషయాన్ని సీఈసీ వద్ద లేవనెత్తగా, టెక్నికల్‌ ఎక్స్‌పర్ట్‌ కమిటీ చైర్మన్‌ డీటీ సహానీతో చర్చించడానికి సాయంత్రం 4 గంటలకు రావాలని చెప్పారు. మేము వెళ్లాం. డిప్యూటీ ఎన్నికల కమిషనర్‌ సుదీప్‌ జైన్‌ చాలా సేపు మౌనంగా ఉండిపోయారు. మీ మీద కేసు ఉంది. కేసున్న వాళ్లతో మేం ఎలా మాట్లాడతాం? అని ప్రశ్నించారు’ అని చెప్పినట్లు హరిప్రసాద్ వివరించారు. కేసులున్నాయని చెప్పి బెదిరించి తనను చర్చలకు దూరం పెట్టాలని ఈసీ చూస్తోందని ఆరోపించారు.
సీఎం చంద్రబాబు వెంట ఏపీ ప్రభుత్వ ఐటీ సలహాదారు హోదాలో హరిప్రసాద్ ఈసీ దగ్గరకు వెళ్లారు. ఆయన వేసిన ప్రశ్నలకు ఈసీ సమాధానాలు ఇవ్వలేక మొహం చాటేసిందని టీడీపీ నేతలు ఆరోపిస్తున్నారు. తమ బృందం బయటకు వచ్చేసిన వెంటనే.. ఈవీఎంలపై చర్చకు రావాలంటూ లేఖ రాయడాన్ని నాటకంగా పేర్కొంటోంది. ఈవీఎంలకు సంబంధించిన వ్యవహారాలను ఉప ఎలక్షన్‌ కమిషనర్‌ సుదీప్‌ జైన్‌ చూస్తారని, అతనితో పాటు మరో ప్రొఫెసర్‌ కూడా ఉంటారని తెలియజేసింది. అయితే హరిప్రసాద్ మాత్రం ఈ బృందంలో ఉండకూడదని చెప్పింది. దీనిపైనే టీడీపీ నేతలు అభ్యంతరం వ్యక్తం చేస్తున్నారు. ఈవీఎంల పనితీరుపై చర్చించాలని అంటే.. విషయాన్ని పక్కదారి పట్టించేందుకు ఈసీ ప్రయత్నిస్తోందని అదే సమయంలో అసలు హరిప్రసాద్‌కు సంబంధించిన కేసులో చార్జ్‌షీట్‌ లేదని, ఉంటే చూపించాలని డిమాండ్‌ చేస్తున్నారు. ఈసీ వైఖరి దేనికి సంకేతమని నిలదీస్తున్నారు.