రాజధాని అమరావతిలో హైకోర్టు భవనాల నిర్మాణం నిర్ణీత గడువులోగా పూర్తవుతుందని హైకోర్టు చీఫ్ జస్టిస్ జస్టిస్ తొట్టత్తిల్ బి రాధాకృష్ణన్ ఆశాభావం వ్యక్తం చేశారు. భవన నిర్మాణాలు పూర్తయి, నోటిఫికేషన్ వెలువడిన అనంతరం రాష్ట్రానికి హైకోర్టును తరలిస్తామన్నారు. శనివారం రాజధాని పరిధిలోని నేలపాడు గ్రామం వద్ద నిర్మాణంలో ఉన్న హైకోర్టు భవనాలు, న్యాయమూర్తుల నివాస భవనాలను సీజే రాధాకృష్ణన్, పలువురు న్యాయమూర్తులు సందర్శించారు. సీఆర్డీఏ కమిషనర్ చెరుకూరి శ్రీ్ధర్, గుంటూరు జిల్లా కలెక్టర్ కోన శశిధర్ రాజధానిలో వివిధ ప్రభుత్వ భవనాల నిర్మాణాలు, జోనల్ ప్లాన్, తదితర అంశాలను పవర్‌పాయింట్ ప్రజంటేషన్ ద్వారా వారికి వివరించారు.
జ్యుడీషియల్ కాంప్లెక్ వెలుపల, లోపల జరుగుతున్న పనులను చీఫ్ జస్టిస్ నిశితంగా పరిశీలించి తగిన సూచనలు చేశారు. కాంప్లెక్స్ మధ్యభాగంలోని కట్టడం గురించి ఆరాతీశారు. అక్కడ అద్దాలు ఏర్పాటు చేస్తామని అధికారులు తెలిపారు. కాంప్లెక్స్ పనులకు సంబంధించి కొన్ని మార్పులను సీజే ప్రతిపాదించారు. ఫర్నీచర్, కోర్టు హాళ్ల డిజైన్, జడ్జీల చాంబర్లు, అడ్వకేట్ల కార్యాలయాలు, ఫుల్‌కోర్టు సమావేశ మందిరం, తదితర అంశాలపై సీఆర్డీఏ కమిషనర్‌తో చర్చించారు. జడ్జీలు, న్యాయవాదులు, కక్షిదారుల ప్రవేశమార్గాలు, కాంప్లెక్స్‌లో వారికి అనువైన స్థలాల గురించి అడిగి తెలుసుకున్నారు. జ్యుడీషియల్ కాంప్లెక్స్ దగ్గర ఏర్పాటు చేసిన డిజైన్లను పరిశీలించారు.
కేపిటల్ సిటీ, ఐకానిక్ భవనమైన హైకోర్టు డిజైన్లను తిలకించారు. జడ్జీల బంగ్లా పనులు, లోపల వసతుల్లో మార్పులు, చేర్పులను సూచించారు. ఐఏఎస్ అధికారుల నివాస భవనాల నిర్మాణాలను, మోడల్ ఫ్లాట్లు, జడ్జిల క్వార్టర్ల నిర్మాణాలను పరిశీలించి సంతృప్తి వ్యక్తం చేశారు. ‘‘ఈ(అమరావతిలోని) హైకోర్టుకు వచ్చే అవకాశం నాకు ఉండకపోవచ్చు. అవకాశం ఉంటే నేను తప్పనిసరిగా వచ్చేవాడిని. అంత బాగా ఇక్కడ వసతులు కల్పిస్తున్నారు’’ అని ముఖ్యమంత్రి చంద్రబాబు వద్ద ప్రధాన న్యాయమూర్తి వ్యాఖ్యానించినట్లు సమాచారం. తాము మూడు వారాల కిందట వచ్చినప్పటితో పోలిస్తే ఇప్పుడు పనుల వేగం బాగా పెరిగిందని న్యాయమూర్తులు పేర్కొన్నారు.