విజయవాడ టిడిపి తరుపున మేయర్ అభ్యర్ధిగా బరిలోకి దిగిన కేశినేని శ్వేత, 11వ డివిజన్ లో విజయం సాధించారు. ఈ సందర్భంగా ఆమె మీడియాతో మాట్లాడుతూ, తనని గెలిపించిన 11వ డివిజన్ ప్రజలకు ధన్యవాదాలు చెప్పారు. ప్రతి ఒక్కరూ తనను, ఇంట్లో ఆడ పిల్లలాగ ఆదరించి, ఈ రోజు గెలిపించారని చెప్పారు. తన డివిజన్ లోనే కాకుండా, విజయవాడలో మొత్తం డోర్ టు డోర్ తిరిగానని, ఇది మొదటి సారి కాదని, ఇప్పటికి మూడు సార్లు తాను విజయవాడ మొత్తం తిరిగానని, 2014లో, 2019లో నాని గారి ఎన్నికల కోసం తిరిగితే, ఇప్పుడు తన కోసమే తాను తిరిగానని చెప్పారు. విజయవాడలో అభివృద్ధి మొత్తం టిడిపి హయాంలోనే జరిగిందని, డ్రైనేజి వ్యవస్థ కానీ, ట్రాఫిక్ రద్దీ నియంత్రించటం కానీ, ఇలా ఏ అభివృద్ధి అయినా టిడిపి హయాంలోనే జరిగిందని శ్వేత అన్నారు. అధికారంలోకి వచ్చిన వైసీపీ, ఈ రెండేళ్ళలో విజయవాడకు ఏమి చేయలేదని, విజయవాడ రోడ్డులు చూస్తుంటేనే ఇక్కడ పరిస్థితి ఎలా ఉందో అర్ధం అవుతుందని అన్నారు. ఇక విజయవాడలో ఓటిమి పై, పూర్తి వివరాలు వచ్చిన తరువాత స్పందిస్తామని చెప్పారు.