వారానికో వీడియో కాన్ఫరెన్స్‌.. రోజుకో టెలికాన్ఫరెన్స్‌.. ఎడతెగని సమీక్షలు.. చకాచకా నిర్ణయాలు.. ఇప్పుడివేం లేవు. రాష్ట్రంలో అటు రాజకీయ యంత్రాంగం.. ఇటు పాలనా యంత్రాంగం.. రెండిటిలోను స్తబ్ధత నెలకొంది. రాష్ట్రంలో అసెంబ్లీ, లోక్‌సభ ఎన్నికల పోలింగ్‌ 11వ తేదీనే ముగిసింది. అన్ని దశల్లో పోలింగ్‌ జరిగి.. ఫలితాలు వెలువడేందుకు మే 23 దాకా వ్యవధి ఉంది. అప్పటిదాకా రాష్ట్రంలో ఎన్నికల కోడ్‌ అమల్లో ఉంటుంది. చేయాల్సిన పనులేమో చాలా ఉన్నాయి. వాటిలో అధికార యంత్రాంగం చేయాల్సినవే ఎక్కువ. నియమావళి అమల్లో ఉండడంతో కొత్త నిర్ణయాలు చేసే అవకాశం లేదు. కొత్త పథకాల సంగతి తర్వాత.. కనీసం అమల్లో ఉన్న పథకాలూ సాగడం లేదు. రోజువారీ నిర్ణయాలు కూడా జరగడం లేదు. ఓపక్క తాగునీటి ఎద్దడి ముంచుకొచ్చింది.. గృహ నిర్మాణం, ఉపాఽధి హామీ పనుల కల్పన, కూలీలకు వేతనాల చెల్లింపు, కేంద్రం నుంచి రావలసిన నిధుల కోసం ప్రయత్నాలు.. అన్నీ ఎక్కడ వేసిన గొంగడి అక్కడే అన్నట్లుగా ఉన్నాయి.
చివరకు పురపాలక శాఖలో పన్నులు వసూలు చేసే సర్వర్లు స్తంభించినా పట్టించుకునే దిక్కు లేదు. ఇది ఖజానాలో జమ కావలసిన డబ్బు. ఇక ప్రభుత్వం చెల్లించాల్సిన బిల్లుల సంగతి చెప్పక్కర్లేదు. అవీ ఎక్కడివక్కడే ఆగిపోయాయి. చేసిన పనులకు బిల్లులు రాక.. సాగుతున్న పనులు ఆగిపోయి..అంతా స్తబ్దత నెలకొంది. పరిపాలనలో పూర్తి ప్రతిష్టంభన ఏర్పడింది. వస్తున్నాం.. వెళ్తున్నాం అన్నట్లుగా పాలనా యంత్రాంగం తీరు ఉంది. పైనుంచి చెప్పేవారు లేకపోవడం, తమకు తాము నిర్ణయాలు తీసుకుంటే ఏమవుతుందోనని అధికారుల్లో ఆందోళన.. మనకెందుకులే.. ఇంకో నెల ఇలానే నడిపించేద్దామన్న ఉదాశీన వైఖరి.. అధికారులు కార్యాలయాలకు వస్తున్నా.. ఏదో నిర్వేదం, ఏం చేయాలో తెలీని స్థితిలో పడిపోయారు.
చీకట్లో దేవులాటలా... ఎన్నికల కోడ్‌ అమల్లో ఉన్నా.. ముఖ్యమంత్రి చంద్రబాబు ఇటీవల కాలంలో కొన్ని అంశాలపై సమీక్ష జరిపారు. ప్రజల కోసం తప్పని పరిస్థితుల్లోనే సమీక్షలు చేయాల్సి వచ్చిందని, ప్రజా సమస్యలను గాలికి వదిలేయలేని స్థితిలోనే సమీక్షలు చేశామని ఆయన స్పష్టం చేశారు. దీనిపై వైసీపీ ఎన్నికల కమిషన్‌కు ఫిర్యాదు చేసింది. ముఖ్యమంత్రి పరిస్థితే ఇలా ఉండడంతో.. మంత్రులు సమీక్షలకు పూర్తిగా దూరంగా ఉంటున్నారు. వివాదాలకు తావివ్వడం ఎందుకన్న ఉద్దేశంతో అధికారులతో సమావేశాలు పెట్టడం లేదు. మరోవైపు.. ప్రభుత్వ ప్రధాన కార్యదర్శిగా ఎల్వీ సుబ్రమణ్యం కొత్తగా వచ్చారు. ఆయన వైఖరి ఏంటన్నది ఇతర ఉన్నతాధికారులకు ఇంకా అంతుపట్టలేదు. ఆయన ఫలానాది చేయమంటే చేద్దాం.. అడిగితే చూద్దాం.. అన్నట్లుగా కొందరు మిన్నకున్నారు. మరికొందరు ఏదైనా ఈ నెలరోజుల పాటు వాయిదా వేసేస్తే పోలా.. అన్న నిర్ణయానికి వచ్చేశారు. ప్రభుత్వ శాఖల ముఖ్య కార్యదర్శులు, కార్యదర్శులే ఇలా ఉండడంతో.. కింద ఆయా శాఖల్లోనూ ఏ పనులూ జరగడం లేదు. ప్రజల నుంచి వచ్చే దరఖాస్తుల పరిశీలన పూర్తిస్థాయిలో ఆగిపోయింది. ప్రభుత్వం-పాలనా యంత్రాంగం రెండూ ఒక రకమైన అచేతనావస్థకు చేరుకున్నాయి. కార్యాలయాలకు రావడం, పోవడం, ఏం చేస్తున్నారో తెలియని పరిస్థితి.. మొత్తంగా చూస్తే చీకట్లో దేవులాటలా పరిస్థితి తయారైందని వ్యాఖ్యానిస్తున్నారు.