జగన్ మోహన్ రెడ్డి ఉన్నట్టుఉండి, ప్రధాని మోడి, హోం మంత్రి అమిత్ షా అపాయింట్మెంట్ కోరటం ప్రాధాన్యత సంతరించుకుంది. జగన్ మోహన్ రెడ్డి, ఈ రోజు సాయంత్రం కానీ, రేపు కానీ ఢిల్లీ వెళ్లనున్నారు. నిజానికి ఈ నెల నాలుగవ తేదీన, హోం మంత్రి అమిత్ షా తిరుపతిలో, దక్షిణాది రాష్ట్రాల ముఖ్యమంత్రులతో సమావేశం కావాల్సి ఉంది. అయితే అనివార్య కారణాల వల్ల ఆ సమావేశం వాయిదా పడింది. దీంతో అమిత్ షా ఆంధ్రప్రదేశ్ పర్యటన రద్దు అయ్యింది. ఆ సమావేశంలో ఎన్నో అంశాలు లేవనెత్తాలని జగన్ మోహన్ రెడ్డి భావించారని, ఆ సమావేశం రద్దు కావటంతో, ఇప్పుడు ఢిల్లీ వెళ్లి కలిసి విన్నవించుకోవాలని నిర్ణయం తీసుకున్నారు. దీంతో ఈ రోజు ఆంధ్రప్రదేశ్ ముఖ్యమంత్రి కార్యాలయం, ప్రధాని మోడీతో పాటుగా, కేంద్ర హోం మంత్రి అమిత్ షా అప్పాయింట్మెంట్ కూడా కోరారు. ఈ అప్పాయింట్మెంట్ లు ఖరారు అయితే, ఈ రోజు రాత్రి కాని, రేపు కాని జగన్ మోహన్ రెడ్డి ఢిల్లీ బయలుదేరి వెళ్లనున్నారు. అమిత్ షాతో రాష్ట్రానికి సంబంధించి అనేక అంశాలు ప్రస్తావిస్తారని, ముఖ్యంగా పోలవరం విషయంలో ఉన్న గందరగోళం పై చర్చిస్తారని చెప్తున్నారు. పోలవరం ఎత్తు తగ్గించే అంశం పై వార్తలు వస్తున్న నేపధ్యంలో, అలాగే కేంద్ర జల శక్తి శాఖ కూడా ఈ అంశం పై చర్చలు జరుపుతూ ఉండటంతో, జగన్ మోహన్ రెడ్డి ఢిల్లీ పర్యటన ఇప్పుడు ఆసక్తి రేపుతుంది.
అలాగే రాష్ట్రానికి సంబంధించిన ఇతర ఆర్ధిక పరమైన అంశాలతో పాటుగా, విభజన సమస్యల పై కూడా చర్చిస్తారని చెప్తున్నారు. దక్షినాది రాష్ట్రాల ముఖ్యమంత్రుల సమావేశంలో ఏ అంశాలు అయితే చర్చించాలని అనుకున్నారో, ఆ అంశాలు అన్నీ అమిత్ షా తో చర్చిస్తారని ముఖ్యమంత్రి కార్యాలయం చెప్తుంది. పనిలో పనిగా, ప్రధాని మోడీని కలిసి చాలా రోజులు అయిన నేపధ్యంలో, ప్రధాని మోడీ అపాయింట్మెంట్ కూడా కోరినట్టు తెలుస్తుంది. రాష్ట్రంలో నెలకొన్న తాజా పరిస్థితులు ఆయన వద్ద ప్రస్తావించనున్నారు. అయితే గత రెండు మూడు సార్లుగా జగన్, మోడీ అపాయింట్మెంట్ కోరుతున్నా, అది వీలు పడటం లేదు. ఈ సారైనా అపాయింట్మెంట్ లభిస్తుందని భావిస్తున్నారు. అయితే వీరి ఇరువురిలో ఒకరి అపాయింట్మెంట్ లభించినా, జగన్ మోహన్ రెడ్డి, ఢిల్లీ బయలుదేరి వెళ్లనున్నారు. అయితే జగన్ మోహన్ రెడ్డి ఇంట సడన్ గా ఢిల్లీ వెళ్ళటం పై, రాజకీయ కారణాలు కూడా ఉన్నాయని అంటున్నారు. పోలవరం కానీ, ఇతర సమస్యలు కానీ, ఇప్పుడు కొత్త ఏమి కాదని, వీటి కోసం ఇంట హుటాహుటిన జగన్ ఢిల్లీ పర్యటనకు వెళ్ళాల్సిన అవసరం ఏమి లేదనే వాదన కూడా ఉంది.